ឯកឧត្តមនាយឧត្តមសេនីយ៏ គន់ គីម ប្រធានក្រុមទីប្រឹក្សា សម្តេច នាយករដ្ឋមន្រ្តី ហ៊ុន សែនអគ្គមេបញ្ជា ការរង និងជានាយសេនាធិការចំរុះ កងយោធពល ខេមរភូមិន្ទ បានចួល រួមជា អធិបតីភាព ក្នុងកម្មវិធី បញ្ចុះបឋម សិលា នូវអាគារសិក្សាមួយខ្នង ដែលជាអំណោយ របស់ប្រមុខ រាជរដ្ឋាភិបាល សម្តេចតេជោ ហ៊ុន សែន និងលោកជំទាវ ។ អាគារសិក្សា១ខ្នង មាន៦បន្ទប់រួមនឹងស្រះទឹក មួយកន្លែងទំហំ៥០ម៉ែត្រ ៤ជ្រុង ដែលស្ថិតនៅភូមិស្រះទឹក ឃុំអូរស្មាច់ ក្រុងសំរោងខេត្តឧត្តរមានជ័យ ជាអំណោយ របស់រាជរដ្ឋាភិបាល តាមរយៈក្រុមយុវជនស្ម័គ្រចិត្ត ចុះវាស់វែងដីធ្លីស្របតាមបទបញ្ជាលេខ០១ប.ប។
កម្មវិធីដែលបាន ប្រព្រឹត្ត ឡើងកាលពីរសៀល ថ្ងៃទី២០ ខែសីហា ឆ្នាំ២០១២នេះ ក៏មានការចូលរួមពី លោក យឹម ធិន ប្រធានក្រុមប្រឹក្សាខេត្ត ឧត្តរមានជ័យ ឯកឧត្តមឧត្តម សេនីយ៏ឯក ឈិនច័ន្ទពណ៌ អគ្គមេបញ្ជាការរង និងជា គណៈបញ្ជាការឯក ភាពព្រំដែន ទិសទី៣ តំបន់ប្រាសាទ តាមាន់ និង ឯកឧត្តមឧត្តមសេនីយ៏ឯក ខេង សុមេធ អគ្គស្នងការ រងនគរបាលជាតិ និងជា មេបញ្ជាការកងវិស្វកម្ម សម្តេចតេជោ ហ៊ុន សែន ប្រចាំខេត្ត សៀមរាប និងក្រុមយុវជនស្ម័គ្រចិត្ត ជាច្រើនទៀត។ថ្លែងក្នុងឱកាស នោះដែរយុវតីជា សុ សិរីរតនា ប្រធានក្រុមទី១០៦នៃយុវនិស្សិតស្ម័គ្រចិត្ត សម្តេចតេ ជោ បានធ្វើសេចក្តី រាយ ការណ៍ឲ្យដឹង អំពីការ ទទួលបានអាគារសិក្សាថ្មីនេះ គឺផ្តើមចេញ ពីការគោរព ស្នើសុំ របស់យុវតី នៅ ក្នុងឱកាសដែល លោកជំទាវប៊ុនរ៉ានី-ហ៊ុនសែន បានទូរស័ព្ទមក កាន់ ក្រុមយុវជន ដើម្បីសាកសួរសុខទុក្ខ។ពាក់ព័ន្ធនឹងសកម្មភាព នៃការវាស់វែង ដីធ្លីជូន ប្រជាពលរដ្ឋ យុវនិស្សិត ជា សុសិរីរតនាបានរាយការណ៏ ឲ្យដឹង អំពីទំហំប៉ះពាល់ គឺស្មើ នឹងផ្ទៃដី៨.០០០ហិចតា ជាមួយដីសម្បទានសេដ្ឋកិច្ចក្រុមហ៊ុន គ្រីស្តាល់អាក្រូ ។ចំពោះ សកម្មភាពអនុវត្ត គឺត្រូវបានតម្រង់គោលដៅទៅកាន់ភូមិទាំង១៣ គឺភូមិ ស្រះទឹក ភូមិអូរឬស្សី ភូមិ គោកឈូក ភូមិស្រះព្រិច ភូមិច្រឹងខាងកើតភូមិច្រឹងខាងលិច ភូមិដងទង់ ភូមិ រំដួលជើងភ្នំ ភូមិអូរពក ភូមិផ្អុង ភូមិកូនគ្រៀល ភូមិបុស្សនិងភូមិគោក ប្រាសាទ ។ ជា លទ្ធផលពេញមួយខែ ក្រុមទី ១០៦នេះ សំរេចបានកំណត់ ព្រំតំបន់បាន ១០០% ចុះកំណត់ ហេដ្ឋារចនាសម្ព័ន្ធ ដែលមានស្រាប់ បានចំនួន៤ភូមិ សម្រង់សលាកប័ត្រព័ត៌មានបាន ចំនួន ៣.២៩៦ប័ណ្ណ និងវាស់វែង បាន៧៩៥ក្បាលដី ស្មើនឹង១.២៦៧ ហិចតា ។ មាន ប្រសាសន៏នាឱកាសនោះ ឯកឧត្តមនាយឧត្តមសេនីយ៏ គន់ គីម បានវាយតំលៃ ខ្ពស់ ចំពោះក្រុមយុវនិស្សិតស្ម័គ្រចិត្ត ទាំងអស់ ដែលមិនត្រឹមតែ បានខិតខំ បំពេញការងារ វាស់ វែង ដីធ្លីប្រកបដោយជោគជ័យ ប៉ុណ្ណោះទេ តែថែមទាំងបាន យកចិត្តទុកដាក់គិតគូរ អំពី ការ លំបាកខ្វះខាត របស់បងប្អូន ប្រជាពលរដ្ឋ នៅមូលដ្ឋាន ហើយមានសេចក្តី ក្លាហាន ហ៊ានស្នើ សុំទៅថ្នាក់ដឹកនាំ នូវអ្វីដែល ជាតំរូវការចាំបាច់ របស់ប្រជាពលរដ្ឋមាន ដូចជា៖ សាលារៀន ស្រះទឹកផ្លូវគមនាគមន៏ជាដើម។ ស្នាដៃទាំងនេះ គឺជាមោទនភាព រួមរបស់ យុវជនកម្ពុជាដោយហេតុថា៖យុវជនបានទទួលនូវការផ្តល់ឱកាស និងការជឿ ទុកចិត្តពី សំណាក់ រាជរដ្ឋា ភិបាលនៅក្នុងការចូលរួម គ្រប់កិច្ចការ សង្គមជាតិ៕