សមិទ្ធផលថ្មីខាងលើ គឺជាអំណោយផ្ដល់ជូនពីសម្ដេចតេជោ ហ៊ុន សែន និងលោកជំទាវកិត្ដិព្រឹទ្ធបណ្ឌិតប៊ុន រ៉ានីហ៊ុន-សែន ជូនដល់ភូមិស្រះទឹក សង្កាត់អូរស្មាច់ ក្រុងសំរោង ខេត្ដឧត្ដរមានជ័យ។
លោក គន់ គីម ដែលជាប្រធានក្រុមទីប្រឹក្សាផ្ទាល់សម្ដេចតេជោ ហ៊ុន សែន ផងនោះ បានថ្លែងថា សាលារៀន១ខ្នង ស្រះទឹក១កន្លែង និងផ្លូវក្រាលក្រួសក្រហម គឺក្រុមយុវជនស័គ្ម្រចិត្ដសម្ដេចតេជោ ហ៊ុន សែន ក្រុមទី១០៦ ដែលកំពុងវាស់វែងដីធ្លីជូនប្រជាជន នៅចំណុចភូមិស្រះទឹក សង្កាត់អូរស្មាច់ បានស្នើសុំទៅសម្ដេច និងលោកជំទាវនាពេលថ្មីៗកន្លងទៅនេះ ហើយសម្ដេចតេជោ និងលោកជំទាវ បានផ្ដល់ជូនភ្លាមៗ និងបានប្រគល់ឱ្យកងវិស្វកម្មតេជោ ហ៊ុន សែន សៀមរាប ដែលជាកងវិស្វកម្មដឹកនាំផ្ទាល់ពីសម្ដេច ឱ្យចុះមកពនិត្យទីតាំង ហើយក៏ចាប់ផ្ដើមបើកការដ្ឋាន ចុះមកស្ថាបនាភ្លាមៗជូនប្រជាជន នៅតំបន់នោះ។
លោក គន់ គីម បានថ្លែងថា ក្រុមយុវជនស័គ្ម្រចិត្ដសម្ដេចតេជោ ហ៊ុនសែន បានធ្វើការងារសង្គមផង និងការងារដល់គណបក្សប្រជាជនផង ព្រោះពួកគេ បានស្រាវជ្រាវអំពីចំណុចខ្វះខាត នៅតាមមូលដ្ឋាន ហើយបានលើកសំណើរជូនទៅសម្ដេច និងលោកជំទាវ ដោយប្រជាជននៅតំបន់ ថែមទាំងមិនដឹងខ្លួនទៀតផង។
លោក គន់ គីម បានបន្ដថា នេះមិនមែនជាលើកទី១ទេ ដែលក្រុមយុវជនចុះវាស់វែងដីធ្លីជូនប្រជាជន បានសុំសាលារៀន ស្រះទឹក និងផ្លូវគមនាគមន៍ ដើម្បីកសាងជូនប្រជាជននៅតាមតំបន់ ដែលប្រជាជនខ្វះខាត។ កន្លងមកសម្ដេច និងលោក ជំទាវធ្លាប់បានជួយអគារសិក្សា ចំនួន៤ខ្នង មានផ្លូវរាប់សិបគីឡូម៉ែត្រ និងស្រះទឹករួចមកហើយដែរ សំរាប់ខេត្ដឧត្ដរមានជ័យ។ អគារទាំងនោះ ក៏បានកសាងបានជាច្រើនភាគរយហើយដែរ។
ក្នុងរសៀលថ្ងៃដដែលនោះដែរ លោក គន់ គីម និងមន្ដ្រីក្រុមការងារជាច្រើនរូបទៀត បានចុះពិនិត្យមើលការជីកស្រះ១កន្លែង ស្ថិតនៅមិនឆ្ងាយពីទីតាំងសាលារៀន ដែលមានទំហំ ៥០ម៉ែត្រ គុណនិង ៥០ម៉ែត្រ ជំរៅ ៣,៥ ម៉ែត្រ។
ចំពោះផ្លូវក្រាលក្រួសក្រហម ១០គីឡូម៉ែត្រ លោកគន់ គីម បានឱ្យលោក ខេង សុមេធ បន្ដសិក្សាទៅតាមស្ថានភាពជាក់ស្ដែង ព្រោះតំបន់នោះ វាមានស្ថានភាពផ្លូវឡើងចុះ ក្រវិចក្រវៀន និងត្រូវកសាងស្ពានជាច្រើនកន្លែង ថែមទៀតផង៕