សៀមរាប ៖ ថ្ងៃវាទានុវាទ នៃការបង់ពន្ធលើមធ្យោបាយយានយន្តគ្រប់ប្រភេទត្រូវបានមកដល់ពេលកំណត់ ហើយត្រូវកម្លាំងសមត្ថកិច្ចពន្ធដារ ចុះធ្វើការត្រួតពិនិត្យ និង ផាកពិន័យទៅលើយានយន្តណា ដែលពុំបាន ទៅបំពេញនូវកាតព្វកិច្ចរបស់ខ្លួនជូនរដ្ឋ ដែលរាជរដ្ឋាភិបាលកម្ពុជា ក៏ដូចអាជ្ញាធរខេត្ត និងសាខាពន្ធដារ ខេត្ត បានធ្វើការផ្សព្វផ្សាយ ជូនដំណឹងដល់គ្រប់ម្ចាស់យានយន្ត កាលពីដើមឆ្នាំ២០១២ មកឲ្យចូលទៅធ្វើ ការបង់ពន្ធផ្លូវនៅទីស្នាក់ការពន្ធដារខេត្ត ហើយក៏ត្រូវបានក្រសួងសេដ្ឋកិច្ច និង ហិរញ្ញវត្ថុ បានធ្វើការពន្យាពេលមកដល់ ថ្ងៃទី ៣១ ខែ កក្កដា ឆ្នាំ២០១២ ជូនដល់បងប្អូនប្រជាពលរដ្ឋ និង អ្នកធ្វើអាជីវកម្មមួយចំនួន បានទៅបំពេញកាតព្វកិច្ចរបស់ខ្លួនក្នុងការបង់ពន្ធ ហើយមួយចំនួនក៏នៅតែមានការគេចវេសមិនមកបំពេញ កាតព្វកិច្ចបង់ពន្ធជូនរដ្ឋ ដែលធ្វើឲ្យបាត់នូវចំណូលលើសារពើពន្ធរបស់ជាតិ ។
តែចាប់ពីថ្ងៃទី ១៦ ខែ សីហា ឆ្នាំ២០១២ សមត្ថកិច្ចចំរុះដែលមានមន្ត្រីសាខាពន្ធដារខេត្ត មន្ត្រី សាលាខេត្ត សមត្ថកិច្ចនគរបាលខេត្ត កងរាជអាវុធហត្ថខេត្ត បានចុះធ្វើការត្រួតពិនិត្យនៅគ្រប់ មធ្យោបាយ យានយន្តគ្រប់ប្រភេទ ដែលមិនទាន់បានបំពេញកាតព្វកិច្ចបង់ពន្ធ លើមធ្យោបាយយានជំនិះរបស់ខ្លួន ដែល កំពុងធ្វើចរាចរណ៍នៅលើដងផ្លូវសាធារណៈ នៅក្នុងក្រុង និង ឆ្លងកាត់ខេត្តសៀមរាប ទាំងយានយន្តឯកជន និង រដ្ឋ ។
តាមការបញ្ជាក់របស់លោក សុខ សុន និង លោក ជា សូផាណារិទ្ធ មន្ត្រីសាខាពន្ធដារ ខេត្ត សៀមរាប ក្នុងការដឹកនាំក្រុមទាំងពីរ បានបញ្ជាក់ថា មកដល់ថ្ងៃទី ២០ សីហា ឆ្នាំ២០១២នេះ មានរយៈ ពេល០៥ថ្ងៃហើយ ដែលសមត្ថកិច្ចពន្ធដារ បានចុះធ្វើការ ត្រួតពិនិត្យលើគ្រប់មធ្យោបាយយានយន្តគ្រប់ ប្រភេទ ដែលមិនបានចូលទៅបំពេញកាតព្វកិច្ចក្នុងការបង់ពន្ធ ផ្លូវ ហើយត្រូវបានធ្វើការផាកពិន័យនោះមាន ចំនួន ៣៨៧ គ្រឿង ក្នុងម៉ូតូ ៣៧៦គ្រឿង រថយន្ត ១១គ្រឿង ។
គឿនវ៉េត