ភ្នំពេញ ៖ លោក Ron Kirk តំណាងពាណិជ្ជកម្មសហរដ្ឋអាមេរិក និងជាទីប្រឹក្សាពាណិជ្ជកម្មជាន់ខ្ពស់របស់លោកប្រធានាធិបតីអាមេរិក Obama នឹងធ្វើទស្សនកិច្ចនៅកម្ពុជា ហើយលោកនឹងទៅកាន់ខេត្តសៀមរាបនៃប្រទេសកម្ពុជា នៅថ្ងៃទី៣០ និង៣១ ខែសីហា ដើម្បីចូលរួមក្នុងកិច្ចប្រជុំរដ្ឋមន្ត្រីសេដ្ឋកិច្ចអាស៊ាន និងកិច្ចប្រជុំកំពូលផ្នែកធុរកិច្ច សហរដ្ឋអាមេរិក អាស៊ាន។
តំណាងពាណិជ្ជកម្មអាមេរិក Ron Kirk គ្រោងនឹងជួបប្រជុំផងដែរ ជាមួយក្រុមប្រឹក្សាសម្របសម្រួលក្របខ័ណ្ឌវិនិយោគ និងពាណិជ្ជកម្ម (TIFA) រវាងសហរដ្ឋអាមេរិក និងអាស៊ាន ដែលជាកិច្ចប្រជុំក្រៅផ្លូវការមួយ នៃរដ្ឋមន្ត្រីសេដ្ឋកិច្ចក្នុងកិច្ចប្រជុំកំពូលអាស៊ីខាងកើត និងកិច្ចប្រជុំធុរកិច្ចកំពូលជាលើកដំបូងរវាងសហរដ្ឋអាមេរិក និងអាស៊ាន។ កិច្ចប្រជុំធុរកិច្ចកំពូលជាលើកដំបូងរវាងសហរដ្ឋអាមេរិក និង អាស៊ានផ្តល់ឱកាសឲ្យតំណាងធុរកិច្ចរបស់សហរដ្ឋអាមេរិក និងអាស៊ានធ្វើការផ្លាស់ប្ដូរទស្សនៈលើ ការជំរុញកំណើនសេដ្ឋកិច្ច ការបញ្ចូលបច្ចេកទេសថ្មីៗ ហើយបង្ហាញអនុសាសន៍រួមក្នុងការពិភាក្សា ដោយផ្ទាល់ជាមួយរដ្ឋមន្ត្រីពាណិជ្ជកម្មអាស៊ាន៕