រាជធានីភ្នំពេញ ៖ ក្នុងជំនួបជាមួយឯកអគ្គរដ្ឋទូតឥណ្ឌាប្រចាំនៅកម្ពុជា កាលពីថ្ងៃទី២០ សីហា ឆ្នាំ២០១២ លោកថោង ខុន រដ្ឋមន្រ្តីក្រសួងទេសចរណ៍ បានស្នើឲ្យមានការហោះហើរត្រង់ពីប្រទេសឥណ្ឌាចូលមកកម្ពុជា ដែលការហោះហើរត្រង់នេះវានឹងធ្វើឲ្យចំនួនភ្ញៀវទេសចរឥណ្ឌា ចូលមកកម្សាន្តនៅក្នុងប្រទេសកម្ពុជាកាន់តែច្រើនឡើងថែមទៀត ។
មានប្រសាសន៍នៅក្នុងឱកាសនោះ លោករដ្ឋមន្ត្រីក្រសួងទេសចរណ៍បានចាត់ទុកការហោះហើរត្រង់ពីប្រទេសឥណ្ឌាចូលមកកាន់កម្ពុជា គឺជាការទាក់ទាញភ្ញៀវទេសចរឥណ្ឌាដ៏សំខាន់មួយសំរាប់កម្ពុជា ព្រោះក្នុងមួយឆ្នាំៗប្រជាជនឥណ្ឌារាប់លាននាក់ បាន ចេញ ទៅកម្សាន្តនៅក្រៅប្រទេស ។ លោករដ្ឋមន្រ្តីបានថ្លែងថា «ក្នុងចំណោមអ្នកទេសចរឥណ្ឌា២លាននាក់ ដែលបានធ្វើដំណើរមកកម្សាន្តនៅក្នុងតំបន់អាស៊ាន កម្ពុជាទទួលបានភ្ញៀវទេសចរឥណ្ឌាចំនួនតែ១ម៉ឺន ៥ពាន់នាក់ប៉ុណ្ណោះ ។
ដូច្នេះការហោះហើរត្រង់ពីឥណ្ឌាមកកាន់កម្ពុជាវានឹងធ្វើឲ្យកំណើនភ្ញៀវទេសចរឥណ្ឌាមានការកើនឡើងជាក់ជាពុំខាន»។ ទន្ទឹម នឹងនោះ លោកថោង ខុន ក៏បានស្នើឲ្យមានការចុះMOUរវាងឥណ្ឌា និងកម្ពុជា ដែលការចុះMOUនោះ អាចធ្វើនៅប្រទេសកម្ពុជា ឬប្រទេសឥណ្ឌាក៏បាន ។