ភ្នំពេញ: លោក រ៉ុង ឈុន ប្រធានសហភាពសហជីពកម្ពុជា នៅថ្ងៃទី២១ ខែសីហា ឆ្នាំ២០១២នេះ បានផ្ញើលិខិតជូនលោក វង សូត រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ស្នើពិនិត្យអំពីការសុំចុះបញ្ជិកាសហភាពសហជីពកម្ពុជា។
លិខិតលោក រ៉ុង ឈុន ដាក់ជូនលោករដ្ឋមន្ត្រី បានលើកឡើថា សហភាពសហជីពកម្ពុជា បានទទួលលិខិតមួយច្បាប់ លេខ៩២៤ កប ចុះថ្ងៃទី១៣ ខែមិថុនា ឆ្នាំ២០១២ របស់ក្រសួងការងារ និងបណ្តុះបណ្តាលវិជ្ជាជីវៈ ចុះហត្ថលេខាដោយលោក សាត សាមុទ្រ អនុរដ្ឋលេខាធិការ បានបដិសេធមិនចុះបញ្ជិកា ឲ្យសហភាពសហជីពកម្ពុជា។
លោក រ៉ុង ឈុន បានបន្តថា ចំពោះឯកសារនៃការស្នើសុំចុះបញ្ជិកា របស់សហភាពសហជីពកម្ពុជា មិនដូចក្រសួងការងារ និងបណ្តុះបណ្តាលវិជ្ជាជីវៈ លើកឡើងនោះទេ ដូចជា ៖
- សមាសភាពអ្នកចូលរួមក្នុងអង្គសមាជ ដើម្បីធ្វើការបោះឆ្នោតជ្រើសរើសថ្នាក់ដឹកនាំសហសភាពសហជីពកម្ពុជា ជាសមាជិកតំណាងឲ្យកម្មករនិយោជិត ដែលក្រសួងការងារអះអាងថា មិនស្ថិតនៅក្រោមដែនអនុវត្ត នៃច្បាប់ស្តីពីការងារ គឺជាភ្ញៀវកិត្តិយស។
- ចំពោះលក្ខន្តិកៈរបស់សហភាពសហជីពកម្ពុជា មានសមាជិកភាពដែលបានចូលរួម នៅក្នុងសហភាពសហជីពកម្ពុជានេះ គឺស្ថិតនៅក្នុងដែនអនុវត្តនៃច្បាប់ស្តីពីការងារ មិនដូចក្រសួងការងារអះអាងទេ។
លោក រ៉ុង ឈុន បានបញ្ជាក់ក្នុងលិខិតថា ក្នុងករណីនេះ ក្រសួងការងារ និងបណ្តុះបណ្តាលវិជ្ជាជីវៈ ត្រូវអញ្ជើញភាគីសហភាពសហជីពកម្ពុជា ទៅពិភាក្សា និងកែតម្រូវលើចំណុចខ្វះខាត ចំពោះឯកសារស្នើសុំចុះបញ្ជិកា។ ក្រសួងការងារ និងបណ្តុះបណ្តាលវិជ្ជាជីវៈ មិនត្រូវបដិសេធមិនផ្តល់បញ្ជិកា ឲ្យសហភាពសហជីពកម្ពុជាភ្លាមៗនោះទេ៕
