ភ្នំពេញ: គណៈកម្មាធិការជាតិរៀបចំការបោះឆ្នោត (គ.ជ.ប) កាលថ្ងៃទី២០ ខែសីហា ឆ្នាំ២០១២ បានបើកវគ្គបណ្តុះបណ្តាលស្តីពីការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០១២ ដល់មន្ត្រី គ.ជ.ប ប្រធាន អនុប្រធាន ជំនួយការបណ្តុះបណ្តាល និងជំនួយការសេវាកម្មច្បាប់ នៃលេខាធិការដ្ឋានរាជធានី-ខេត្ត រៀបចំការបោះឆ្នោត (លធ/ខប) តំណាងគណបក្សនយោបាយ និងអង្គការមិនមែនរដ្ឋាភិបាល សរុបប្រមាណ ១៣៥នាក់។ នេះបើតាមសេចក្ដីប្រកាសព័ត៌មានពី គ.ជ.ប កាលពីថ្ងៃទី២០ ខែសីហាឆ្នាំ២០១២។
នៅក្នុងសេចក្ដីប្រកាសព័ត៌មាន លោកស្រី ស៊ីន ជុំបូ បានមានប្រសាសន៍ថា គោលបំណងរបស់ការពិនិត្យបញ្ជីឈ្មោះ និងចុះឈ្មោះបោះឆ្នោតប្រចាំឆ្នាំ២០១២នេះ ពុំមានការខុសប្លែកពីឆ្នាំមុនៗទេគឺ គ.ជ.ប ៖
១. ផ្ដល់ឱកាសដល់ប្រជាពលរដ្ឋ ដែលទើបគ្រប់អាយុបោះឆ្នោត និងអ្នកដែលពុំទាន់បានចុះឈ្មោះបោះឆ្នោតនៅឡើយ ឲ្យបានចុះឈ្មោះបោះឆ្នោត។
២. ផ្ដល់ឱកាសជូនប្រជាពលរដ្ឋដែលបានចុះឈ្មោះរួចហើយ ឲ្យទៅពិនិត្យមើលឈ្មោះ និងផ្ទៀងផ្ទាត់ទិន្នន័យរបស់ខ្លួន ដើម្បីឲ្យប្រាកដថា ឈ្មោះ និងទិន្នន័យរបស់គាត់ពិតជាត្រឹមត្រូវ និងមាននៅក្នុងបញ្ជីឈ្មោះបោះឆ្នោត។
៣. ធ្វើបច្ចុប្បន្នភាពបញ្ជីបោះឆ្នោត ដោយលុបឈ្មោះអ្នកស្លាប់ អ្នកបាត់បង់សិទ្ធិបោះឆ្នោត អ្នកមានឈ្មោះស្ទួន និងអ្នកផ្លាស់ទីលំនៅចេញពីឃុំ សង្កាត់ ពីព្រោះថា កាលណា គ.ជ.ប បានលុបឈ្មោះ ដូចដែលរៀបរាប់ខាងលើបានត្រឹមត្រូវ នោះបញ្ជីបោះឆ្នោតនឹងកាន់តែមានសុក្រឹតភាពទៅតាមនោះដែរ។
៤. ផ្ដល់ឱកាសជូនប្រជាពលរដ្ឋប្ដឹងតវ៉ាអំពីការបាត់ឈ្មោះ ឬ/និងប្ដឹងជំទាស់ទៅនឹងអ្នកដែលគ្មានសិទ្ធិចុះឈ្មោះបោះឆ្នោត តែមានឈ្មោះក្នុងបញ្ជីបោះឆ្នោត។
លោកស្រី ស៊ីន ជុំបូ បានបន្តថា លោក លោកស្រី ដែលមកទទួលវគ្គបណ្ដុះបណ្ដាលនៅថ្ងៃនេះ នឹងបណ្ដុះបណ្ដាលបន្តដល់សមាជិក ក្រុមប្រឹក្សា និងស្មៀនឃុំ សង្កាត់ ដែលជាអ្នកអនុវត្តន៍ការងារចុះឈ្មោះ និងលុបឈ្មោះអ្នកបោះឆ្នោតផ្ទាល់ និងត្រូវធ្វើផែនការការងាររបស់ខ្លួនឲ្យបានច្បាស់លាស់។
សេចក្ដីប្រកាសព័ត៌មានបានឲ្យដឹងដែរថា វគ្គបណ្ដុះបណ្ដាលនេះ មានគណបក្សនយោបាយចំនួន ៨ បានចូលរួម គឺគណបក្សប្រជាជនកម្ពុជា គណបក្សនរោត្តម រណឫទ្ធិ គណបក្សសាធារណរដ្ឋប្រជាធិបតេយ្យ គណបក្សខ្មែរឈប់ក្រ គណបក្សសម្ព័ន្ធដើម្បីប្រជាធិបតេយ្យ គណបក្សសញ្ជាតិកម្ពុជា គណបក្សចលនាប្រជាធិបតេយ្យ និងគណបក្សសង្គមប្រជាធិបតេយ្យ៕
