លោក ចាន់ យុត្ថា អ្នកនាំពាក្យនិងជានាយកខុទ្ទកាល័យក្រសួងធនធានទឹកនិងឧតុនិយម បានឲ្យដឹងកាលពីថ្ងៃទី២០ ខែសីហា ឆ្នាំ២០១២នេះថា គម្រោងអភិវឌ្ឍន៍ធនធានទឹកស្ទឹងស្រែង ស្ថិតនៅក្នុងខេត្តសៀមរាប មានសាងសង់អាងទឹកធំៗចំនួនពីរ ជាមួយនឹងប្រឡាយមេ ប្រឡាយរង មានប្រវែងជាង ៨០ គីឡូម៉ែត្រ។
ប្រភពខាងលើបានឲ្យដឹងទៀតថា អាងទឹកដែលកំពុងសាងសង់ជំហានទីមួយ រក្សាទឹកទុកបានប្រមាណជា ៧០០លានម៉ែត្រគូប សម្រាប់ធានាការស្រោចស្រពលើដីស្រែ ប្រមាណជាម្ភៃប្រាំពាន់ហិកតា នៅក្នុងស្រុកសំរោងចុងកាល់ ខេត្តឧត្តរមានជ័យ ស្រុកភ្នំស្រុក ខេត្តបន្ទាយមានជ័យ និងនៅខេត្តសៀមរាប មានស្រុកស្រីស្នំនិងស្រុកក្រឡាញ់។ គម្រោងនេះចំណាយអស់ថវិកាប្រមាណជា៥០លានដុល្លារ។
តាមប្រភពដដែលបានឲ្យដឹងទៀតថា ប្រឡាយមេពីរខ្សែដែលកំពុងតែធ្វើការសាងសង់មានប្រវែង៨១គីឡូម៉ែត្រ ដោយនៅចំណុចមានទឹកហូរខ្លាំង ប្រឡាយនេះ ស្ថាបនាអំពីបេតុង។ ប្រឡាយទាំងពីរខ្សែនេះធ្វើបានជាង៣០គីឡូម៉ែត្រ ជាមួយនឹងសំណង់ស្ទាក់ទឹក និងសំណង់ទំនប់បង្ហៀរ។
នៅចន្លោះពីអាងទឹកទីមួយទៅអាងទឹកទីពីរ មានសាងសង់វារីអគ្គិសនីមួយដែលអាចផលិតភ្លើងបានប្រមាណជា១០ មេហ្គាវ៉ាត់។ គម្រោងនេះសម្រេចលទ្ធផល បានប្រមាណជា ២៥ភាគរយហើយ។ តាមផែនការត្រូវបញ្ចប់នៅដើមឆ្នាំ២០១៥។
គម្រោងអភិវឌ្ឍន៍ធនធានទឹកស្ទឹងស្រែងនេះ ត្រូវបានប្រភពដដែលបញ្ជាក់ថា នៅពេលធ្វើរួច មិនត្រឹមតែធានាបានទឹកសម្រាប់ស្រោចស្រពដំណាំស្រូវជាងពីរម៉ឺន ហិកតានោះទេ គឺថែមទាំងកាត់បន្ថយបាននូវគ្រោះទឹកជំនន់ថែមទៀតផង៕