ភ្នំពេញ: ចៅក្រមស៊ើបសួរសាលាដំបូងរាជធានីភ្នំពេញកាលពីរសៀលថ្ងៃទី២០ ខែសីហា ឆ្នាំ២០១២ បានសម្រេចឃុំខ្លួន អតីត មន្ត្រីកងរាជ អាវុធ ហត្ថ ម្នាក់ និងបក្ខពួកម្នាក់ទៀតដែលគេចខ្លួនបាត់បានធ្វើសកម្មភាពយកកាំភ្លើងវាយក្បាល និង បណ្តាលឱ្យផ្ទុះអាវុធ ធ្វើឱ្យ ជនរងគ្រោះរងរបួស ក្រោមក្លៀក ព្រោះតែរឿងគំនុំ ដណ្តើមស្រី ដាក់ពន្ធនាគារក្រោមការចោទប្រកាន់ពីបទ កាន់កាប់អាវុធដោយគ្មានការអនុញ្ញាត និងប៉ុនប៉ង មនុស្ស ឃាត។
សមត្ថកិច្ច ប៉ូលិសការិយាល័យព្រហ្មទណ្ឌកម្រិតធ្ងន់ រាជធានីភ្នំពេញ សហការជាមួយសមត្ថកិច្ច ប៉ូលិសទួលគោក បានឃាត់ ឈ្មោះ សាន សុផល អាយុ៣២ឆ្នាំ អតីតមន្ត្រីកងរាជអាវុធហត្ថ រត់ចោលអង្គភាព ស្នាក់នៅផ្ទះលេខ២១៣ ផ្លូវលេខ១៩ ភូមិ១១ សង្កាត់ជ័យជំនៈ ខណ្ឌដូនពេញ កាលពីរសៀល ថ្ងៃទី១៧ ខែសីហា ឆ្នាំ២០១២ នៅតាមបណ្ដោយផ្លូវលំ ស្ថិតក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ បន្ទាប់ពី រត់គេចខ្លួន អស់រយៈពេល ជាងកន្លះ ខែរួចមក។
សមត្ថកិច្ចបានឱ្យដឹងថា ឈ្មោះសាន សុផល បានលួចស្រឡាញ់និងចង់ ដណ្តើមសង្សាររបស់មិត្តភ័ក្ត្រឈ្មោះ វុទ្ធា ហើយកាលពីអំឡុង ឆ្នាំ២០១១ ឈ្មោះ សាន សុផល បានណាត់ ឱ្យសង្សារ វុទ្ធា ទៅជួបនៅក្បែរ របងវិទ្យាល័យព្រះស៊ីសុវត្ថិ ដើម្បីសងប្រាក់ ជំពាក់ ១១០ដុល្លារ ហើយពេលនោះ នាងបាននាំសង្សារ និង មិត្តភក្តិ២នាក់ទៀតទៅជាមួយ។ ស្រាប់តែពេលនោះជនរងគ្រោះបានវាយទាត់ធាក់ឈ្មោះ សាន សុផល ជាច្រើនដៃនិងបានយកទូរស័ព្ទដៃ១គ្រឿងខ្សែ.ក១ខ្សែលុយក្នុងហោប៉ៅ ព្រោះតែខឹង ឈ្មោះសាន សុផល ចង់ដណ្តើមសង្សាររបស់គេ។
មកដល់យប់ថ្ងៃទី២៨ខែកក្កដា ឆ្នាំ២០១២ ឈ្មោះ សាន សុផល បានទទួលដំណឹងថា ជនរងគ្រោះនិងសង្សារ កំពុងស្នាក់នៅសណ្ឋាគារសម្បត្តិផល បន្ទប់លេខ៥១៦ នៃជាន់ទី៥ដែលមានទីតាំងនៅដីឡូត៍លេខ១៦ ផ្លូវលេខ១៥០ ក្រុមទី៦សង្កាត់ទឹកល្អក់ទី២ ខណ្ឌទួលគោកលុះនៅម៉ោងប្រមាណជិត ១រំលងអធ្រាត្រឈានចូលថ្ងៃទី២៩ខែ កក្កដា ឈ្មោះ សានសុផល បានឱ្យមិត្តភក្តិម្នាក់ឈ្មោះ វីនជូនទៅកាន់សណ្ឋាគារដើម្បីសងសឹក។
សមត្ថកិច្ចបានឱ្យដឹងទៀតថា ក្នុងពេលចូលទៅដល់បន្ទប់សណ្ឋាគារឈ្មោះសាន សុផល បានសួរនាំជនរងគ្រោះថា “ ហេតុអី បានជាឯង ព្រួតគ្នា វាយអញ” ខណៈនោះឈ្មោះ សាន សុផល ក៏ដកកាំភ្លើងខ្លី ម៉ាកកា៥៤ ពីចង្កេះ ស្ទុះទៅវាយក្បាល ជនរងគ្រោះ ទើបមានការតបតគ្នា ធ្វើឱ្យផ្ទុះអាវុធ១គ្រាប់ បណ្តាលឱ្យ ជនរងគ្រោះ រងរបួសត្រូវចំក្រោមក្លៀកខាងឆ្វេង រួចឈ្មោះសាន សុផល និង បក្ខពួក បានគេចខ្លួនតែម្តង៕
