កណ្ដាល ៖ កម្មករ-ការិនីរោងចក្រកាត់ដេរខូចម៉ូតិចស្កាយខូអិលធីឌី ដែលមានទីតាំងនៅភូមិស្វាយជ្រុំ ឃុំ បែកចាន ស្រុកអង្គស្នួល ប្រមាណជាង២០០នាក់ ក្នុងចំណោមកម្មករសរុបជាង១ពាន់នាក់បានធ្វើកូដកម្មអស់រយៈពេល៩ថ្ងៃមកហើយ ដើម្បីទាមទារដកប្រធានគ្រប់គ្រង និង សុំឡើងប្រាក់ខែគោលឲ្យបាន៧០ដុល្លារ និងទាមទារនូវលក្ខខណ្ឌការងារមួយចំនួន តែការទាមទារនេះ មិនទាន់ត្រូវបានដោះស្រាយនៅឡើយទេ ជាហេតុនាំឲ្យកម្មករបាននាំគ្នាមកឈរតាមផ្លូវជាតិលេខ៤ពោលគឺដើរចេញពីរោងចក្រប្រហែល២០០ម៉ែត្រប៉ុណ្ណោះ។
កម្មករនិយាយថា នៅព្រឹកថ្ងៃទី២១ ខែសីហា ឆ្នាំ២០១២នេះ ពួកគេបាននាំគ្នាមកនៅតាមផ្លូវជាតិលេខ៤ តែត្រូវបានសមត្ថកិច្ចរារាំងហាមឃាត់មិនឲ្យធ្វើអ្វីជារឿងខុសច្បាប់ឡើយ ដោយហេតុនេះហើយទើបពួកគេបានត្រឹមតែនៅតាមចិញ្ចើមផ្លូវលើកបដាជាពាក្យស្លោកដើម្បីបង្ហាញឲ្យមហាជនដឹងឮជាសាធារណៈ។ កម្មករបន្តថា កន្លងមកពួកគេធ្វើកូដកម្មនៅតែបរិវេណរោងចក្រប៉ុណ្ណោះ តែដោយសារគ្មានដំណោះស្រាយទើបពួកគេធ្វើបែបនេះ៕
វិទូ