ភ្នំពេញ: មន្ត្រីជាន់ខ្ពស់រាជរដ្ឋាភិបាលកម្ពុជា បានបញ្ជាក់ថា ការចាត់បញ្ជូនក្រុមឧក្រិដ្ឋជន ជនជាតិចិន ពីប្រទេសកម្ពុជា ប្រគល់ទៅឲ្យរដ្ឋាភិបាលចិនវិញនោះ គឺពុំមានការប៉ះពាល់ចំណងការទូតរវាងប្រទេសទាំងពីរទេ។ ក្នុងនោះ កម្ពុជារង់ចាំតែសំបុត្រយន្តហោះ ដើម្បីបញ្ជូនក្រុមឧក្រិដ្ឋជន ទៅកាន់ប្រទេសចិនវិញ។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងជាអ្នកនាំពាក្យរាជរដ្ឋាភិបាល បានមានប្រសាសន៍យ៉ាងនេះថា ការបញ្ជូនពួកឧក្រិដ្ឋចិន ដែលអាជ្ញាធរនគរបាលប្រទេសកម្ពុជា ប្រគល់ទៅឲ្យរដ្ឋាភិបាលចិន ដើម្បីផ្តន្ទាទោសពួកគេតាំងពេលមុននោះ តាមច្បាប់នៃប្រទេចិន គឺពុំបានធ្វើឲ្យមានការប៉ះពាល់ដល់ទំនាក់ទំនងការទូតរវាងប្រទេសទាំងពីរឡើយ។
លោករដ្ឋមន្ត្រី ខៀវ កាញារីទ្ធ បានមានប្រសាសន៍បញ្ជាក់យ៉ាងនេះថា "ធម្មតាយើងមានការសហការគ្នា យើងបានដឹងស្រាប់ហើយថា ជាមួយចិន យើងសហការគ្នា ទាំងផ្នែកសេដ្ឋកិច្ច ហើយក្នុងនោះ ក៏មានផ្នែកមួយទៀត គឺឧក្រិដ្ឋកម្មឆ្លងដែន។ ដូច្នេះនៅក្នុងវិស័យ ដែលយើងត្រូវសហការគ្នា”។
ចំណែកលោកឧត្តមសេនីយ៍ឯក ខៀវ សុភ័គ អ្នកនាំពាក្យនៃក្រសួងមហាផ្ទៃ នៅរសៀលថ្ងៃទី២១ ខែសីហា ឆ្នាំ២០១២ បានមានប្រសាសន៍ថា ក្រសួងមាហាផ្ទៃ បានរៀបចំឯកសារចាត់បញ្ជូនជនជាតិចិន ១៥នាក់ ដែលអាជ្ញាធរនគរបាលកម្ពុជា ចាប់ខ្លួននៅក្រុងច្បារមន ខេត្តកំពង់ស្ពឺ កាលពីថ្ងៃទី៨ ខែសីហា ឆ្នាំ២០១២ កន្លងមកនេះ បញ្ជូនទៅឲ្យរដ្ឋាភិបាលចិនវិញ នៅពេលខាងមុខឆាប់ៗនេះ។
លោកឧត្តមសេនីយ៍ ខៀវ សុភ័គ បានមានប្រសាសន៍បន្តថា មកដល់ពេលនេះ រង់តែសំបុត្រយន្តហោះមកទេ សម្រាប់បញ្ជូនពួកជនជាតិចិនទាំង ១៥ នាក់ ទៅកាន់ប្រទេសចិន នៅក្នុងសប្តាហ៍ខាងនេះ បន្ទាប់ពីសំបុត្រយន្តហោះ មកដល់នោះ ពីព្រោះឯកសារតាមផ្លូវច្បាប់ បានបំពេញចប់រួចរាល់ហើយ។
ចំណែកលោកឧត្តមសេនីយឯក គៀត ចន្ទថារិទ្ធ បានមានប្រសាសន៍ថា "យើងកំពុងសហការជាមួយចិនបន្ថែមទៀត ក្នុងការធ្វើការស៊ើបអង្កេត ហើយមកដល់ពេលនេះ សមត្ថកិច្ចនគរបាលយើង បានធ្វើការបង្រាបចាប់ខ្លួនជនជាតិចិន នៅក្នុងប្រទេសកម្ពុជា បានចំនួន ៣ លើក មកហើយ ដែលមានចំនួនរាប់រយនាក់"។
លោកឧត្តមសេនីយ៍ឯក គៀត ច័ន្ទថារិទ្ធ បានលើកឡើងយ៉ាងនេះ បន្ទាប់ពីជនជាតិចិន ១៥ នាក់ ចុងក្រោយ ត្រូវសមត្ថកិច្ចកម្ពុជា ចាប់ខ្លួនបាន កាលពីថ្ងៃ៨ សីហា ឆ្នាំ២០១២ នៅក្នុងផ្ទះសំណាក់ អប្សរា ស្ថិតនៅតាមបណ្តោយផ្លូវជាតិលេខ៤ ក្រុងច្បារមន ខេត្តកំពង់ស្ពឺ។
នេះជាលើកទី៣ហើយ ដែលសមត្ថកិច្ចកម្ពុជា ចាប់ខ្លួនជនជាតិចិន ដែលពាក់ព័ន្ធនឹងឧក្រិដ្ឋកម្មឆ្លងដែន តាមរយៈការគម្រាមទារប្រាប់តាមប្រព័ន្ធអ៊ិនថឺណេត។ ជនជាតិទាំងនោះ សរុបទាំងអស់ ២៣១ នាក់ រួមបញ្ចូលករណីចុងក្រោយ នៅខេត្តកំពង់ស្ពឺ។
ករណីទី១ សមត្ថកិច្ចរបស់នគរបាលជាតិកម្ពុជា ចាប់បាន ១៦៧ នាក់ ស្រី ៤៩ នាក់ កាលពីថ្ងៃ៩ ខែមិថុនា ឆ្នាំ២០១១ នៅខេត្តព្រះសីហនុ ចាប់បាន ៣៨នាក់ ស្វាយរៀងចាប់បាន ៦១នាក់ និងរាជធានីភ្នំពេញ ចាប់បាន ៦៨នាក់។
លើកទី២ សមត្ថកិច្ចចាប់បាន ៤៩នាក់ កាលពីថ្ងៃទី១៨ ខែឧសភា ឆ្នាំ២០១២ បានបញ្ជូនក្រុមឧក្រិដ្ឋជនឆ្លងដែនទាំងនោះ ទៅកាន់ប្រទេសចិនវិញ។
ករណីទី៣ នៅថ្ងៃ៨សីហា ឆ្នាំ២០១២ សមត្ថកិច្ចចាប់បាន ១៥ នាក់ ស្ថិតនៅក្រុងច្បារមន ខេត្តកំពង់ស្ពឺ។
សមត្ថកិច្ចបានសង្កត់ធ្ងន់ថា ជនជាតិចិនប្រមាណជាង ៥០០ នាក់ ត្រូវបានចាប់ខ្លួន និងបញ្ជូនទៅប្រទេសចិនវិញ បន្ទាប់ពីពួកគេពាក់ព័ន្ធនឹងករណីចាប់ជម្រិតឆ្លងប្រទេស ដែលមានទឹកប្រាក់ជាង ១០០ លានដុល្លារអាមេរិក កាលពីឆ្នាំ២០១០ ឆ្នាំ២០១១ និងឆ្នាំ២០១២៕
