ខេត្តព្រៃវែង ៖ ពិធីចែកកូនឈើជូនដល់ព្រះសង្ឃ ប្រជាពលរដ្ឋ និងស្ថាប័នមួយចំនួននៅទូទាំងខេត្តត្រូវបានប្រារព្ធឡើងកាលពីវេលាម៉ោង៨ព្រឹកថ្ងៃទី២០ សីហា ២០១២ នៅក្នុងសួនបណ្តុះកូនឈើសម្តេច ហ៊ុន សែន អ្នកលឿងដែលស្ថិតក្នុងភូមិព្រែកខ្សាយ ឃុំព្រែកខ្សាយ «ក» ស្រុកពាមរក៍ ក្រោមអធិបតីភាពលោកជា សំអាង អនុប្រធានរដ្ឋបាលព្រៃឈើនៃក្រសួងកសិកម្ម រុក្ខាប្រមាញ់ និងនេសាទ លោកអៀង សាវ៉េត នាយអធិការដ្ឋានរដ្ឋបាលព្រៃឈើមេគង្គ លោកប្រាក់ ណូម៉ា នាយខណ្ឌរដ្ឋបាលព្រៃឈើកំពង់ចាម ព្រមទាំងមានការនិមន្ត និងចូលរួមពីព្រះសង្ឃ ប្រជាពលរដ្ឋ អាជ្ញាធរដែនដីយ៉ាងច្រើនកុះករ ។
កូនឈើដែលត្រូវធ្វើពិធីចែកនាព្រឹកនេះ មានចំនួន២៩ប្រភេទដែលរួមមានទាំងឈើហូបផ្លែ និងប្រភេទឈើប្រណីតផងដែរ សរុបជាង៧ម៉ឺនដើម ចំណែកព្រះសង្ឃដែលបាននិមន្តមកទទួលកូនឈើមានចំនួន១០០អង្គស្មើនឹង៧០វត្ត និងប្រជាពលរដ្ឋប្រមាណជាង៤០០នាក់ មកពីគ្រប់ស្រុកទាំងអស់នៅទូទាំងខេត្ត និងមួយចំនួនទៀតមកពីខេត្តកណ្តាល ។ ប្រជាពលរដ្ឋដែលមកចូលរួមទទួលកូនឈើនៅក្នុងពិធីនេះ បានបង្ហាញពីភាពសប្បាយរីករាយ និងប្រាប់ពីគោលបំណងរបស់ខ្លួនថា ពួកគាត់នឹងយកកូនឈើទាំងនេះទៅដាំនៅផ្ទះរបស់ពួកគាត់ ព្រោះពួកគាត់ចង់បានផ្លែរបស់វាសម្រាប់ហូបនៅក្នុងក្រុមគ្រួសារ និងបានលក់សម្រាប់ដោះស្រាយជីវភាពផង ។
ដោយឡែកព្រះសង្ឃមួយអង្គដែលនិមន្តមកពីវត្តផ្នីត ក្នុងស្រុកមេសាង បានមានសង្ឃដីកាថា ដើមឈើផ្តល់នូវអត្ថប្រយោជន៍ច្រើនខ្លាំងណាស់សម្រាប់មនុស្សជាតិ គឺវាជួយទប់ទល់នឹងកម្តៅផែនដី ទាក់ទាញទឹកភ្លៀង ជារបាំងខ្យល់ព្យុះ កាត់បន្ថយបំរែបំរួលអាកាសធាតុធ្វើជាគ្រឿងបរិក្ខារ និងសំណង់ផ្សេងៗ និងជាពិសេសផ្តល់នូវផ្លែផ្កាសម្រាប់មនុស្សសត្វបរិភោគថែមទៀតផង ។ ព្រះតេជគុណបន្តទៀតថា កូនឈើដែលទទួលបាននាថ្ងៃនេះ នឹងយកទៅដាំនៅក្នុងបរិវេណវត្តផ្នីត ដើម្បីបានជាម្លប់សម្រាប់ឱ្យពុទ្ធបរិស័ទ្ធជិតឆ្ងាយបានជ្រកនៅពេលមកធ្វើបុណ្យទានក្នុងវត្ត ។