តាកែវ: ផ្លូវក្នុងក្រុងដូនកែវ ខេត្តតាកែវ លេខ៣១ ដែលលាតសន្ធឹងពីភូមិផ្សារតាកោ សង្កាត់រកាក្នុង ដល់ភូមិថ្នល់បែក សង្កាត់រកាក្រៅ មានប្រវែងមួយពាន់ម៉ែត្រ ត្រូវបានធ្វើការជួសជុលដោយចាក់ក្រួសក្រហម។ លោក ស្រី បេន អភិបាលនៃគណៈអភិបាលខេត្ត រួមជាមួយប្រធានមន្ទីរជុំវិញខេត្ត និងអង្គភាពប៉ូលិស ប៉េអឹម បានអញ្ជើញចុះពិនិត្យបើកការដ្ឋាន កាលពីថ្ងៃទី២១ ខែសីហា ឆ្នាំ២០១២ ដែលមានប្រជាពលរដ្ឋរស់នៅអមផ្លូវចូលរួម ចំនួន ១៥៧ នាក់។
លោក គាំ សុខុម នាយកទីចាត់ការហិរញ្ញវត្ថុសាលាខេត្ត បានឲ្យដឹងថា ផ្លូវក្រុងលេខ៣១ នេះ មានប្រវែងមួយពាន់ម៉ែត្រ ត្រូវធ្វើការជួសជុលដោយក្រាលក្រួសក្រហមលើខ្នងថ្នល់ មានទទឹងប្រវែង ៨ម៉ែត្រ ដែលចំណាយថវិកាខេត្តឆ្នាំ២០១២ អស់ចំនួន ៥៣១ លានរៀល ហើយការជួសជុលផ្លូវនេះ នឹងសម្រេចឲ្យហើយជាស្ថាពរ នៅបំណាច់ខែតុលា ឆ្នាំ២០១២ ខាងមុខនេះ។
លោក គាំ សុខុម បានឲ្យដឹងទៀតថា ផ្លូវលេខ៣១ នេះ នឹងឡើងគម្រោងក្រាលថ្មចាក់កៅស៊ូ នៅឆ្នាំ២០១៤ ដោយទុកឲ្យផ្លូវនេះ មានភាពហាប់រឹងមាំសិន។
ក្នុងឱកាសចុះទៅពិនិត្យនោះ លោក ស្រី បេន អភិបាលនៃគណៈអភិបាលខេត្ត បានមានប្រសាសន៍ទៅកាន់ប្រជាពលរដ្ឋថា ដើម្បីធ្វើឲ្យទីក្រុងមានសោភ័ណភាពល្អស្អាត ទាល់តែមានបងប្អូនប្រជាពលរដ្ឋទាំងអស់ សហការជាមួយអាជ្ញាធរ និងមន្ត្រីជំនាញ ទើបការអនុវត្តន៍ប្រកបដោយប្រសិទ្ធភាព។ នៅក្នុងឆ្នាំ២០១២នេះ ខេត្តមានគម្រោងជួសជុលផ្លូវជាច្រើនខ្សែ មានផ្លូវខ្លះក្រាលក្រួសក្រហម ផ្លូវខ្លះក្រាលថ្មចាក់កៅស៊ូ ព្រមទាំងដាក់ប្រព័ន្ធលូបង្ហូរទឹកខ្វាត់ខ្វែង៕