ភ្នំពេញ: លោក ម៉ម សារិន នាយកខុទ្ទកាល័យសម្តេច ជាស៊ីម ប្រធានព្រឹទ្ធសភា និងជាប្រធានគណបក្សប្រជាជនកម្ពុជា បានសរសេរលិខិតមួយច្បាប់ ទៅកាន់លោក គង់ គាំ ប្រធានស្តីទី គណបក្សសមរង្ស៊ី ដោយលើកឡើងថា សម្តេចជាស៊ីម ជាប់រវល់ការងារ មិនអាចជួបជាមួយគណៈប្រតិភូគណបក្សសមរង្ស៊ី បានទេ នៅពេលនេះ។
ក្នុងលិខិតចុះថ្ងៃទី២០ ខែសីហា ឆ្នាំ២០១២ របស់លោក ម៉ម សារិន នាយកខុទ្ទកាល័យសម្តេចជាស៊ីម ប្រធានព្រឹទ្ធសភា បានផ្ញើជូនលោក គង់ គាំ ប្រធានស្តីទីគណបក្សសមរង្ស៊ី ដោយមានកម្មវត្ថុ អំពីការសុំចូលជួបសម្តែងការគួរសមជាមួយសម្តេចអគ្គមហាធម្មពោធិសាល ជាស៊ីម ប្រធានព្រឹទ្ធសភា។
ក្នុងលិខិតរបស់នាយកខុទ្ទកាល័យដដែលនោះ បានលើកឡើងថា "ខ្ញុំសូមជម្រាបជូនឯកឧត្តមប្រធានស្តីទី មេត្តាជ្រាបថា អាស្រ័យដោយមានការជាប់រវល់ការងារ សម្តេចអគ្គមហាធម្មពោធិសាល ជាស៊ីម ប្រធានព្រឹទ្ធសភា មិនអាចទទួលជួបជាមួយគណៈប្រតិភូគណបក្សសមរង្ស៊ី បានទេ សូមមេត្តាអធ្យាស្រ័យ"។
ការបដិសេធតាមរយៈលិខិតយ៉ាងដូច្នេះ ត្រូវបាននាយកខុទ្ទកាល័យ ធ្វើឡើង ដោយយោងតាមមតិណែនាំដ៏ខ្ពង់ខ្ពស់របស់សម្តេចជាស៊ីម ប្រធានព្រឹទ្ធសភា នាថ្ងៃទី២០ ខែសីហា ឆ្នាំ២០១២។
គណបក្សសមរង្ស៊ី បានសរសេរលិខិត ចុះថ្ងៃទី១៩ ខែសីហា ឆ្នាំ២០១២ ដើម្បីស្នើសុំជួបសួរសុខទុក្ខសម្តេចជាស៊ីម ប្រធានព្រឹទ្ធសភា៕
