ភ្នំពេញ: មន្ត្រីជាន់ខ្ពស់នៃគណបក្សសង្គ្រោះជាតិ កាលពីរសៀលថ្ងៃទី២០ ខែសីហា ឆ្នាំ២០១២ បានដកលិខិតស្នើសុំបង្កើតគណបក្សរបស់ខ្លួន ពីក្រសួងមហាផ្ទៃវិញ ដោយហេតុផលថា បំពេញបែបបទមិនបានត្រឹមត្រូវ។ នេះបើតាមការឲ្យដឹងពីលោក ខៀវ សុភ័គ អ្នកនាំពាក្យក្រសួងមហាផ្ទៃ កាលពីល្ងាចថ្ងៃទី២០ ខែសីហា ឆ្នាំ២០១២។
លោក ខៀវ សុភ័គ បាននិយាយថា ពាក្យស្នើសុំដែលលោក ប៉ុល ហំម បានយកមកដាក់នោះ គឺនៅមានកង្វះខាតខាងផ្លូវច្បាប់ ហើយរូបលោក (ខៀវ សុភ័គ) ក៏បានជូនដំណឹងដល់លោក ប៉ុល ហំម រួចហើយ ហើយលោក ប៉ុល ហំម ក៏បានទទួលស្គាល់ថា នៅខ្វះខាតខាងផ្លូវច្បាប់ និងបានសុំដកលិខិតស្នើសុំបង្កើតគណបក្សរួចហើយដែរ។
លោក ខៀវ សុភ័គ បានបញ្ជាក់ថា "គាត់ (ប៉ុល ហំម) ឯកភាពទទួលស្គាល់កង្វះខាតផ្នែកផ្លូវច្បាប់មែន ហើយក៏មកទទួលពាក្យស្នើសុំយកទៅវិញហើយ ដើម្បីធ្វើការកែសម្រួល"។
រីឯលោក ប៉ុល ហំម អនុប្រធានគណៈកម្មាធិការបណ្ដោះអាសន្ន នៃគណបក្សសង្គ្រោះជាតិ បាននិយាយឲ្យដឹងដែរថា ខាងក្រសួងមហាផ្ទៃ បានផ្ដល់ដំណឹងថា លិខិតស្នើសុំបង្កើតគណបក្សថ្មីរបស់លោក នៅមានកន្លែងខ្លះមានកំហុស។ អ៊ីចឹងលោកទៅទទួលយកវិញ ដើម្បីយកមកកែកន្លែងដែលមានកំហុស។
លោក ប៉ុល ហំម បានទទួលស្គាល់ថា "យើងពិតជាមានកំហុសផ្នែកបច្ចេកទេសមែន ហើយមិនមែនមានបញ្ហានយោបាយអ្វីទេ"។ លោកបានបន្ថែមថា "នៅពេលណាដែលយើងកែសម្រួលរួចហើយ យើងនឹងយកពាក្យស្នើសុំនោះ ទៅដាក់ជូនក្រសួងមហាផ្ទៃវិញ"។
គួររម្លឹកថា សម្ព័ន្ធភាពគណបក្សប្រឆាំងសមរង្ស៊ី និងសិទ្ធិមនុស្ស បានយកសំណុំបែបបទ ទៅចុះបញ្ជីគណបក្សប្រឆាំងរួមគ្នាថ្មីមួយ ដែលមានឈ្មោះថា "គណបក្សសង្គ្រោះជាតិ" កាលពីព្រឹកថ្ងៃចន្ទ ទី២០ ខែសីហា ឆ្នាំ២០១២ នៅក្រសួងមហាផ្ទៃ ស្របតាមច្បាប់ស្តីពីគណបក្សនយោបាយ។ រីឯខាងក្រសួងមហាផ្ទៃ ក៏បានទទួលយករួចហើយដែរ។
ក្រសួងមហាផ្ទៃ មានសិទ្ធិ ១៥ថ្ងៃ ក្រោយពីទទួលសំណុំបែបបទសុំចុះឈ្មោះគណបក្សថ្មី ដើម្បីឆ្លើយតបថា ទទួលចុះ ឬក៏មិនទទួលចុះបញ្ជីជាផ្លូវការ សម្រាប់គណបក្សថ្មីនោះ៕