ភ្នំពេញ: សប្តាហ៍ទូរទស្សន៍ក្វាងស៊ី របស់ប្រទេសចិន និងទូរទស្សន៍ជាតិកម្ពុជា ទទកបានចាប់ធ្វើជាដៃគូជាមួយគ្នា ក្នុងការសហការផ្លាស់ប្តូរនូវព័ត៌មានឲ្យគ្នាទៅវិញទៅមក។ ពិធីបើកសម្ពោធនោះ បានធ្វើឡើង ជាផ្លូវការ កាលពីព្រឹកថ្ងៃទី២១ ខែសីហា ឆ្នាំ២០១២ នៅស្ថាននីយទូរទស្សន៍ជាតិកម្ពុជា ក្នុងរាជធានីភ្នំពេញ ក្រោមអធិបតីភាព លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងលោក ផាន គ័ងសៀ ឯកអគ្គរដ្ឋទូតចិន ប្រចាំនៅកម្ពុជា ព្រមទាំងលោក ស៊ីន ប៉ៃហៃ រដ្ឋមន្ត្រីក្រសួងព័ត៌មានចិន ប្រចាំខេត្តក្វាងស៊ី។
លោករដ្ឋមន្ត្រី ខៀវ កាញារីទ្ធ បានមានប្រសាសន៍នៅក្នុងពិធីនោះថាកម្មវិធីសប្តាហ៍ទូរសទ្សន៍ក្វាងស៊ីនេះ ដើម្បីបង្កើនចំណងទាក់ទងរវាងប្រទេសកម្ពុជា និងប្រទេសចិន នៃកិច្ចសហប្រតិបត្តិការយុទ្ធសាស្ត្រលើគ្រប់វិស័យ ហើយការបើកកម្មវិធី សប្តាហ៍ទូរទស្សន៍ ក្វាងស៊ី ដែលសហការជាមួយទូរទស្សន៍ជាតិកម្ពុជា និងធ្វើឲ្យប្រទេសទាំងពីរ អាចយល់អំពីគ្នា ទៅវិញទៅមក និងឃើញសក្តានុពល តំបន់សេដ្ឋកិច្ច នៃតំបន់ទាំងពីរ។
លោករដ្ឋមន្ត្រី ខៀវ កាញារីទ្ធ បានមានប្រសាសន៍បន្តទៀតថា “ជាពិសេសទៅទៀត យើងឃើញនៅពេល ដែលរដ្ឋាភិបាលចិន បានប្រគល់តួនាទី ឲ្យតំបន់ស្វ័យត ក្វាងស៊ី គឺជាច្រកទ្វារចេញចូល រវាងប្រទេសចិន និងតំបន់អាស៊ាននេះ គឺរឹតតែធ្វើឲ្យមានលទ្ធភាព ក្នុងការពង្រីកចំណងទាក់ទង ទាំងផ្នែកសេដ្ឋកិច្ច វប្បធម៌ វិស័យផ្សេងទៀត ដូចជា វិស័យព័ត៌មាន ជាដើម កាន់តែខិតចូលគ្នា។ នេះសំខាន់បំផុតគឺផ្លាស់ប្តូរឯកសារ រវាងទូរទស្សន៍ជាតិកម្ពុជា និងកម្មវិធីសប្តាហ៍ ទូរទស្សន៍ក្វាងស៊ី នៃតំបន់ស្វ័យត ក្វាងស៊ី និងការផ្លាស់ប្តូរអ្នកសារព័ត៌មានកម្ពុជា ជាមួយទូរទស្សន៍ ក្វាងស៊ី”។
លោករដ្ឋមន្ត្រី បានមានប្រសាសន៍បញ្ជាក់បន្តថា ឥឡូវនេះ យើងមានភាពយន្តឯកសារចំនួន ៦ ដែលនឹងចាក់ផ្សាយ សម្រាប់កម្មវិធីសប្តាហ៍ ទូរសទ្សន៍ ក្វាងស៊ី ប៉ុន្តែកម្ពុជាមានគំរោងរៀបចំភាពយន្តឯកសារកម្ពុជា យកទៅបញ្ចាំងនៅកម្មវិធីសប្តាហ៍ទូរសទ្សន៍ ក្វាងស៊ី ប្រទេសចិនវិញ។ កិច្ចសហការនេះ ត្រូវបន្តរហូត។
លោករដ្ឋមន្ត្រីបានមានប្រសាសន៍បន្តទៀតថា កម្ពុជាមានគំរោងរៀបចំភាពយន្តឯកសារ ដែលត្រូវយកទៅចាក់ផ្សាយតាមកម្មវិធីសប្តាហ៍ ទូរសទ្សន៍ក្វាងស៊ី ប្រទេសចិន។ ក្នុងនោះក៏មានការផ្សាយពីវិស័យទេសចរណ៍ អំពីសក្តានុពលសេដ្ឋកិច្ច និងមានទិន្នន័យព័ត៌មានមួយចំនួនទៀត តាមរយៈទីភ្នាក់ងារ សារព័ត៌មានកម្ពុជា AKP និងវិទ្យុជាតិ។
លោករដ្ឋមន្ត្រីក្រសួងព័ត៌មាន បានមានប្រសាសន៍បន្តថា កន្លងមក ប្រទេសចិន បានអនុញ្ញាតឲ្យប្រទេសកម្ពុជា នាំទំនិញជាង ១០០០ មុខ ចូលទៅកាន់ទីផ្សារប្រទេសចិន តែកម្ពុជាយើងមានលទ្ធភាពនាំចូលទំនិញ ទៅកាន់ទីផ្សារប្រទេសចិន បានតិចណាស់ ដោយយើងមិនទាន់មានលទ្ធភាពផលិតបាន ហើយនិងរបៀបត្រួតពិនិត្យគុណភាពទំនិញ ហើយពីឆ្នាំ២០១២ នេះតទៅ កម្ពុជាយើង និងមានលទ្ធភាពបញ្ជូនទំនិញនាំចូល ទៅប្រទេសចិនបានច្រើន៕