ភ្នំពេញ: រដ្ឋាភិបាលសហរដ្ឋអាមេរិក បានប្រកាសផ្តល់លុយ ៥ លានដុល្លារ ដល់ភាគីអន្តរជាតិ នៅសាលាក្តីកាត់ទោសអតីតមេដឹកនាំខ្មែរក្រហម។ សេចក្តីប្រកាសដូច្នេះ បានធ្វើឡើង ចំពេលដែលភាគីអន្តរជាតិ របស់តុលាការចម្រុះកាត់ទោសមេខ្មែរក្រហម កំពុងប្រឈមនឹងកង្វះថវិកា ពិសេសនៅខាងភាគីអន្តរជាតិ នឹងត្រូវអស់ថវិកា ចាប់ពីខែតុលា។
ក្នុងសន្និសីទកាសែត នៅរសៀលថ្ងៃទី១៣ ខែកញ្ញា ឆ្នាំ២០១២ នៅសណ្ឋាគារ ឡឺរ៉ូយ៉ាល់ លោកឯកអគ្គរដ្ឋទូតគោចរអាមេរិក ទទួលបន្ទុកកិច្ចការឧក្រិដ្ឋកម្មសង្គ្រាម លោក Stephen Rapp បានប្រកាសថា រដ្ឋាភិបាលអាមេរិក សន្យាផ្តល់លុយ ៥ លានដុល្លារអាមេរិក ដល់ភាគីអន្តរជាតិ ក្នុងតុលាការខ្មែរក្រហម។ សំណើរចំណាយថវិកាដល់សាលាក្តីខ្មែរក្រហមនោះ ត្រូវបានដាក់ទៅកាន់រដ្ឋសភាអាមេរិក ដើម្បីអនុម័តហើយ។ ការសម្រេចផ្តល់ជំនួយបន្ថែមដល់ភាគីអន្តរជាតិនេះ គឺដើម្បីផលប្រយោជន៍រួមរបស់តុលាការខ្មែរក្រហម។
លោក Stephen Rapp បានបន្ថែមថា ការសម្រេចចិត្តរបស់អាមេរិកក្នុងការផ្តល់ជំនួយបន្ថែម ៥ លានដុល្លារដល់តុលាការខ្មែរក្រហមដូច្នេះ ដោយសារតែការលើកឡើងពីបញ្ហាអំពើពុករលួយ ក្នុងតុលាការខ្មែរក្រហម បានដោះស្រាយចប់សព្វគ្រប់។ កាលពីឆ្នាំ២០០៩ សហរដ្ឋអាមេរិក បានផ្តល់ជំនួយដល់សាលាក្តីខ្មែរក្រហមចំនួន ១២ លានដុល្លារ។
ជាមួយនឹងការលើកឡើងដូច្នេះ លោកឯកអគ្គរដ្ឋទូតគោចរ Stephen Rapp ក៏បានឲ្យដឹងថា សហចៅក្រមស៊ើបអង្កេតអន្តរជាតិ ក្នុងតុលាការខ្មែរក្រហម ជនជាតិអាមេរិក ដែលទើបតែងតាំង នឹងមកបំពេញការងារក្នុងពេលឆាប់ៗនេះ ដើម្បីបន្តការស៊ើបអង្កេតលើសំណុំរឿង០០៣ និង០០៤។
ជាមួយគ្នានោះ លោកឯកអគ្គរដ្ឋទូតគោចរសហរដ្ឋអាមេរិក ក៏បានសម្តែងការស្វាគមន៍ចំពោះសាលាក្តីខ្មែរក្រហម ដែលកំពុងដំណើរការកាត់ក្តីលើសំណុំរឿង០០២ លើអតីតមេខ្មែរក្រហម ៣ រូប គឺលោកនួនជា លោកអៀងសារី និងលោកខៀវសំផន។
លោក Stephen Rapp ក៏បានស្វាគមន៍ចំពោះគម្រោងដោះលែងលោកស្រី អៀង ធីរិទ្ធ ដែលតុលាការខ្មែរក្រហម បានសម្រេច ដោយសំអាងថា លោកស្រីអតីតរដ្ឋមន្ត្រីក្រសួងសង្គមកិច្ចខ្មែរក្រហម មានជំងឺរង្វេងរង្វាន់ស្មារតីធ្ងន់ធ្ងរ និងមិនអាចព្យាបាលបាន។
សូមរម្លឹកថា លោក Stephen Rapp បានមកទស្សនកិច្ច នៅប្រទេសកម្ពុជា ចាប់ពីថ្ងៃទី១២ ដល់ទី១៣ ខែកញ្ញា ឆ្នាំ២០១២។ ក្នុងអំឡុងទស្សនកិច្ចនេះ លោកឯកអគ្គរដ្ឋទូត Rapp បានជួបជាមួយមន្ត្រីសាលាក្តីខ្មែរក្រហម និងភាគីពាក់ព័ន្ធដទៃទៀត ដើម្បីពិភាក្សាពីការគាំទ្រចាំបាច់ សម្រាប់អង្គជំនុំជម្រះវិសាមញ្ញ ក្នុងតុលាការកម្ពុជា (ECCC) ដើម្បីឲ្យតុលាការនេះ បំពេញការងារក្នុងអាណត្តិរបស់ខ្លួន៕