ភ្នំពេញ ៖ មន្ត្រីប៉េអឹមម្នាក់រួមទាំងបក្ខពួក៣នាក់ទៀតបន្ទាប់ពីផឹកស៊ីស្រវឹងធ្លាក់ភ្នែកបានបោកកែវបោកចានបោកកន្ថោជ័រដាក់ទឹកហើយដកកាំភ្លើងខ្លីភ្ជង់គំរាមស្រីៗបម្រើក្នុងហាងផ្អើលជាន់ជើងគ្នាតែត្រូវម្ចាស់ហាងទូរស័ព្ទប្ដឹងប៉េអឹមមូលដ្ឋានឲ្យចាប់ខ្លួននៅពេលនាំមកកាន់ទីបញ្ជាការកងរាជអាវុធហត្ថខណ្ឌដង្កោបានមួយភ្លែតក៏បានដោះលែងវិញ ធ្វើឲ្យម្ចាស់ហាងខកចិត្តយ៉ាងខ្លាំង។
ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង២៣និង២០នាទីយប់ថ្ងៃទី១១ ខែកញ្ញា ឆ្នាំ២០១២ នៅក្នុងហាងបៀរហ្គាឌិន ស្ថិតក្នុងភូមិម័ល សង្កាត់ដង្កោ ខណ្ឌដង្កោ។ ក្រុមជនបង្កមានបក្ខពួក៤នាក់ក្នុងនោះគេស្គាល់ឈ្មោះ ម្នាក់ គឺថោង គិរី ភេទប្រុសអាយុ៣១ឆ្នាំជាមន្ត្រីប៉េអិមនៃការិយាល័យសម្ភារៈបច្ចេកទេសស្នាក់នៅភូមិត្នោតជ្រុំ សង្កាត់ពុន ខណ្ឌមានជ័យ។
តាមម្ចាស់ហាងបានបំភ្លឺប្រាប់ថា មុនពេលកើតហេតុប៉េអឹមម្នាក់នេះបាននាំបក្ខពួក៣នាក់ទៀតចូលទៅផឹកស៊ីក្នុងហាងពៅរតនាយ៉ាងសប្បាយរីករាយដោយផឹកផងច្រៀងផង បន្ទាប់ពីផឹកស្រវឹងរៀងៗពួកគេបានបោកកែវ បោកធុងទឹកកកបែកអស់។
ប្រភពបន្តថា បន្ទាប់ពីបោកបែកអស់ហើយ មន្ត្រីប៉េអឹមរូបនេះបានហៅស្រីៗ បម្រើស្រាបៀរក្នុងហាងឲ្យមកចូលរួមអង្គុយកំដរពួកគេ តែពេលនោះដោយសារក្រុមស្រីៗ មានការភិតភ័យពេកមិនហ៊ានអង្គុយកំដរភ្ញៀវប្រភេទនោះទេ។ កាយវិការបែបនេះធ្វើឲ្យក្រុមបង្កនេះខឹងក៏ដកកាំភ្លើងខ្លីម៉ាកK-54ពីចង្កេះមកភ្ជង់គំរាមស្រីៗ ទាំងនោះ។ ម្ចាស់ហាងដោយឃើញបែបនេះក៏ទូរស័ព្ទប្ដឹងប៉េអឹមខណ្ឌដង្កោ ឲ្យចាត់ការតែនៅពេលប៉េអឹមខណ្ឌហៅជនបង្កទាំង៤នាក់នោះមកសួរនាំ ពួកគេបាននិយាយថាពួកគេមិនបានដកកាំភ្លើងភ្ជង់អ្នកណាទេ គ្រាន់តែបោកចានកំសាន្តពេលស្រវឹងប៉ុណ្ណោះ។ ក្រោយពីសួរនាំចប់ ក៏ឲ្យត្រឡប់ទៅផ្ទះវិញគ្មានវិធានការអ្វីទេធ្វើឲ្យម្ចាស់ហាងខកចិត្ត៕
វិទូ