បន្ទាយមានជ័យ ៖ អាជ្ញាធរខេត្តបន្ទាយមានជ័យ រួមជាមួយមន្ទីរសាធារណការ បន្ទាប់ពីចុះពិនិត្យផលប៉ះពាល់ពីជំនន់ទឹកភ្លៀងធ្លាក់ ពីថៃដែលធ្វើឲ្យលិចលំនៅដ្ឋានស្រែចម្ការនិងបានបុកផ្ដាច់ផ្លូវបំបែកពីផ្លូវជាតិលេខ ៥ ត្រង់អូរខៃដនសង្កាត់និមិត្តក្រុងប៉ោយប៉ែតបានត្រួតពិនិត្យដំណើរការដំឡើងស្ពានដែកថ្មីប្រវែង២២ម៉ែត្រជំនួសផ្លូវត្រង់ទឹកបុកដាច់។ ការចុះពិនិត្យនេះធ្វើឡើងកាលពីរសៀលថ្ងៃទី ១២ ខែកញ្ញា ឆ្នាំ២០១២។
មុនការចុះពិនិត្យការធ្វើស្ពានថ្មី របស់លោក អ៊ុង អឿន អភិបាលខេត្តបន្ទាយមានជ័យ លោក ទ្រី ណារិន អភិបាលរងខេត្តបន្ទាយមានជ័យ , លោក ង៉ោ ម៉េងជ្រួន អភិបាលក្រុងប៉ោយប៉ែតនិងមន្ត្រីបានទៅពិនិត្យនិងវាយតម្លៃបន្តបន្ទាប់ពីផលប៉ះពាល់ពីជំនន់ទឹកភ្លៀងធ្លាក់ពីថៃថ្ងៃទី ៩ ដល់ថ្ងៃទី ១១ ខែកញ្ញា ឆ្នាំ២០១២ ធ្វើឲ្យប៉ះពាល់ផ្នែកខ្លះនៃភូមិប៉ោយប៉ែត , ភូមិក្បាលកោះ សង្កាត់ប៉ោយប៉ែត ,ភូមិគីឡូម៉ែត្រលេខ៤ , ភូមិស្ទឹងបត់ សង្កាត់ផ្សារកណ្ដាល , ភូមិសុខសាន្ត , ភូមិអូរខៃដន សង្កាត់និមិត្តក្រុងប៉ោយប៉ែត និងភូមិសន្តិភាព ឃុំទួលពង្រស្រុកម៉ាឡៃ ដោយមានផ្ទះប្រជាពលរដ្ឋ ១៣០ ខ្នង ក្នុងនោះ ៣០ ខ្នង ប៉ះពាល់ធ្ងន់ធ្ងរ ហើយនិង ពិនិត្យទីតាំងត្រូវសង់ស្ពានដែកបេឡេជំនួសផ្លូវដែលទឹកបុកដាច់។
លោក អ៊ុង អឿន អភិបាលខេត្តបន្ទាយមានជ័យ រួមជាមួយលោក គឹម សុវណ្ណ ប្រធានមន្ទីរសាធារណការនិងដឹកជញ្ជូនខេត្ត , អាជ្ញាធរក្រុងប៉ោយប៉ែត បានចុះពិនិត្យស្ថានភាពទឹកជំនន់ដែលបានស្រកនិងដឹកនាំការស្ថាបនាស្ពានដែកបេឡេបណ្ដោះអាសន្នត្រង់ផ្លូវនៃទំនប់អាងអូរខៃដននៅភូមិយាងថ្មី ភ្ជាប់ទៅភូមិសុខសាន្ត , ភូមិអូរខៃដន , ភូមិសន្តិសភាព ដែលជំនន់ទឹកភ្លៀងបុកដាច់។
លោកអភិបាលខេត្តបានបញ្ជាក់ថា ដោយមានការយកចិត្តទុកដាក់ពីសុខទុក្ខនិងការលំបាករបស់ប្រជាពលរដ្ឋនិងតាមការណែនាំ របស់លោកឧបនាយករដ្ឋមន្ត្រី កែ គឹមយ៉ាន ប្រធានក្រុមការងារថ្នាក់កណ្ដាលចុះជួយខេត្តបន្ទាយមានជ័យ ក្នុងនោះមន្ត្រីជំនាញសាធារណការបានដំណើរការស្ទូច ,បុកគ្រឹះ និង សង់ស្ពាននេះ អោយរួចរាល់ឆាប់ៗនៅរវាង១ ឬក៏ ២ថ្ងៃ តាមការណែនាំរបស់លោកឧបនាយករដ្ឋមន្ត្រី កែ គឹមយ៉ាន ដើម្បីពលរដ្ឋ ព្រះសង្ឃ ឆ្លងកាត់បានស្រួលឡើងវិញ។
លោក គឹម សុវណ្ណ និយាយថា ដំបូងគេប្រុងសង់ស្ពានដែកបេឡេត្រឹម១៦ម៉ែត្រ តែបន្ទាប់មក មុខទឹកបុកថ្នល់ដាច់ធំឡើងទើបតម្រូវឲ្យមន្ទីរបន្ថែម ស្ពានដល់ ២២ ម៉ែត្រ។ ក្រុមជាងមមាញឹកសាងសង់។
គួរបញ្ជាក់ថា ប៉ុន្មានឆ្នាំចុងក្រោយនេះទឹកជំនន់ពីប្រទេសថៃ និងជំនន់ទឹកភ្លៀងតែងធ្វើឲ្យលិចលង់លំនៅឋាន ផ្លូវថ្នល់ ស្រែចម្ការ របស់ប្រជាពលរដ្ឋ ជាពិសេសនៅចំណុចភូមិដែលសាងសង់ស្ពានថ្មីខាងលើមានលំនៅឋានប្រជាពលរដ្ឋប្រមាណជា ១០ ខ្នង ដែលសង់នៅក្នុងប្រឡាយតែងរងផលប៉ះពាល់លិចលង់៕