ភ្នំពេញ: លោកស្រី សឿង រដ្ឋចាវី រដ្ឋលេខាធិការក្រសួងការបរទេស បានលើកឡើងថា កិច្ចប្រជុំពិគ្រោះយោបល់ក្រៅផ្លូវការថ្នាក់ឧត្តមមន្ត្រីអាស៊ាន និងចិន ស្តីពី ក្រមប្រតិបត្តិ (COC) នៅសមុទ្រចិនខាងត្បូង នឹងចាប់ផ្តើមប្រជុំ នៅសណ្ឋាគារអាំងទែកុងទីណង់តាល់ នៅរសៀលថ្ងៃទី១៣ ខែកញ្ញា ឆ្នាំ២០១២។
សេចក្តីជូនព័ត៌មានរបស់ក្រសួងការបរទេសកម្ពុជា បានបង្ហាញថា តាមសំណើររបស់កម្ពុជា និងមានការឯកភាពពីសមាជិកអាស៊ានទាំងអស់ កម្ពុជាបានធ្វើជាម្ចាស់ផ្ទះ នៃកិច្ចពិគ្រោះយោបល់ក្រៅផ្លូវការថ្នាក់ឧត្តមមន្ត្រីអាស៊ាន និងចិន ស្តីពី ក្រមប្រតិបត្តិ(COC) នៅសមុទ្រចិនខាងត្បូង។ នេះជាលើកទី៣ ដែលកម្ពុជា បានផ្តួចផ្តើមឲ្យមានកិច្ចប្រជុំស្តីពីក្រមប្រតិបត្តិនេះ ដើម្បីកាត់បន្ថយភាពតានតឹងនៅសមុទ្រចិនខាងត្បូង និងធ្វើការងារឆ្ពោះទៅរកការតាក់តែងក្រមប្រតិបត្តិ(COC)។
លោកស្រី សឿង រដ្ឋចាវី រដ្ឋលេខាធិការក្រសួងការបរទេស ដែលជាឧត្តមមន្ត្រីរបស់កម្ពុជា ក្នុងនាមជាប្រធានអាស៊ាន បានថ្លែងថា ក្នុងចំណោមឧត្តមមន្ត្រីអាស៊ានទាំងអស់គ្នា ចង់បន្តឲ្យមានការពិភាក្សាក្រៅផ្លូវការរវាងឧត្តមមន្ត្រីអាស៊ាន និងចិន គឺមានសារៈសំខាន់ខ្លាំងណាស់ ដើម្បីឈានទៅរកការពិភាក្សាជាផ្លូវការ នៃថ្នាក់អនុរដ្ឋមន្ត្រីអាស៊ាន និងចិន ទៅលើបញ្ហាតាក់តែងក្រមប្រតិបត្តិ COC ស្តីពីជម្លោះនៅសមុទ្រចិនខាងត្បូង។
លោកស្រីរដ្ឋលេខាធិការ បានមានប្រសាសន៍បន្តថា "បញ្ហាក្រមប្រតិបត្តិ COC សមុទ្រចិនខាងត្បូង គឺយើងពិភាក្សាគ្នា ហើយសមាជិកអាស៊ានទាំងអស់រីករាយ ចង់ឲ្យមានការបន្តការពិភាក្សាក្រៅផ្លូវការ។ ដូច្នេះនេះជាសញ្ញាវិជ្ជមានមួយ ដែលសម្តែងពីឆន្ទះរបស់អាស៊ាន និងចិន ក្នុងការប្តខិតខំធ្វើការជាបន្តទៀត នៅក្នុងបញ្ហាក្រមប្រតិបត្តិ COC សមុទ្រចិនខាងត្បូង"។
លោកស្រី សឿង រដ្ឋចាវី បានបញ្ជាក់ថា ឥឡុវនេះ យើងកំពុងតែដំណើរការយើងមិនទាន់អាចនិយាយថា អ្វីជាឧបសគ្គនៃការពិភាក្សាក្រមប្រតិបត្តិ COC សមុទ្រចិនខាងត្បូង រវាងឧត្តមមន្ត្រីអាស៊ាន និងឧត្តមមន្ត្រីចិនទេ ពីព្រោះយើងកំពុងដំណើរការនៃការពិភាក្សាក្រៅផ្លូវការ ដែលនឹងទទួលបានសញ្ញាវិជ្ជមាន សម្រាប់ឈានទៅដល់ការពិភាក្សាជាផ្លូវការ នៅពេលខាងមុខ ដែលប្រទេសអាស៊ានទាំងអស់ឯកភាពគ្នា ជាមួយចិន ពីព្រោះនេះ ជាសំណើររបស់ចិន ដែលស្នើសុំឲ្យមានកិច្ចប្រជុំបែបនេះ៕
