ភ្នំពេញ: មន្ត្រីអង្គការសង្គមស៊ីវិល និងសកម្មជនដីធ្លី បានធ្វើការជួបប្រជុំ ពិភាក្សាលើស្ថានការណ៍ ស្តីពី សិទ្ធិមនុស្ស លទ្ធិប្រជាធិបតេយ្យ និងនីតិរដ្ឋ នៅកម្ពុជា ប្រព័ន្ធតុលាការ អំពើពុករលួយ រួមទាំងបញ្ហាលោក ម៉ម សូណង់ដូ ដែលតុលាការកំពុងតែកាត់ទោស។
កិច្ចពិភាក្សានោះ បានធ្វើឡើង កាលពីព្រឹកថ្ងៃទី១៣ ខែកញ្ញា ឆ្នាំ២០១២ នៅភោជនីយដ្ឋាន អ៊ី អេន វេស្ស ក្នុងរាជធានីភ្នំពេញ។
លោក មាជ សុវណ្ណារ៉ា ប្រធានមជ្ឈមណ្ឌលព័ត៌មាន ខ្មែរប៉ុស្តិ៍ បានអះអាងថា “បញ្ហាសិទ្ធិមនុស្ស លទ្ធិប្រជាធិបតេយ្យ និងនីតិរដ្ឋនៅកម្ពុជា កំពុងមានសភាពធ្ងន់ធ្ងរ នឹងប្រឈមមុខនឹងគ្រោះថ្នាក់បំផុត ដោយសារការដឹកនាំមួយមាននិន្នាការឆ្ពោះទៅរកអំណាចផ្តាច់ការ។ សិទ្ធិសេរីភាពជាមូលដ្ឋាន ដូចជាសេរីភាពក្នុងការបញ្ចេញមតិ ជួបប្រជុំ បាតុកម្ម កូដកម្ម សេរីភាពសារព័ត៌មានសហជីព និងចលនាសង្គមដែលជាមូលដ្ឋាន និងជាសរសរគោលយ៉ាងសំខាន់ នៃលទ្ធិប្រជាធិបតេយ្យ ត្រូវបានរឹតបន្តឹង និងដាក់កម្រិតយ៉ាងធ្ងន់ធ្ងរ”។
លោក មាជ សុវណ្ណារ៉ា បានលើកឡើងថា កាលពីពេលថ្មីៗនេះ រដ្ឋាភិបាលបានចាត់វិធានការច្បាប់ប្រឆាំងសកម្មជនសិទ្ធិមនុស្ស និងលទ្ធិប្រជាធិបតេយ្យ ចំនួន ២រូប គឺលោក ម៉ម សូណង់ដូ ប្រធានវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យ ហើយនិងលោក ចាន់ សុវ៉េត អនុប្រធានស៊ើបអង្កេត នៃសមាគមអាដហុក។ លោកម៉ម សូណង់ដូ ត្រូវបានចាប់ខ្លួន និងដាក់ពន្ធនាគារ រង់ចាំការកាត់ទោសពីតុលាការ ចំពោះបទចោទប្រកាន់ ដែលមានចរិតនយោបាយ។ រីឯលោក ចាន់ សុវ៉េត ត្រូវបានតុលាការកោះហៅឲ្យចូលបំភ្លឺក្នុងបទចោទប្រកាន់ថា បានផ្តល់ជំនួយដល់ជនជាប់ចោទក្នុងករណីចោទប្រកាន់មកលើលោកម៉ម សូណង់ដូ ដូច្នេះដែរ។
ក្នុងកិច្ចពិភាក្សានោះ ក៏មានសកម្មជនដីធ្លីនៅបឹងកក់ ដែលរួមមាន អ្នកស្រី ទេព វន្នី ដែលបានតវ៉ាក្នុងជម្លោះដីធ្លីដ៏សកម្មភាព ក៏បានចូលរួមផ្តល់នូវមតិយោបល់ក្នុងកិច្ចពិភាក្សានោះផងដែរ៕