ភ្នំពេញ ៖ ថវិកាចំនួន៥ម៉ឺនដុល្លារអាមេរិក ត្រូវបានលោកស្រី ហ៊ុន ម៉ាណា អគ្គនាយកនៃអគ្គនាយកដ្ឋានវិទ្យុ និងទូរទស្សន៍បាយ័ននិងជាប្រធានមូលនិធិបាយ័ន រួមជាមួយក្រុមចលនាយុវជនកម្ពុជា១៥៧នាក់ ដឹកនាំដោយលោក ម៉ឹង ពន្លក នាំយកទៅឧបត្តម្ភជូនដល់មន្ទីរពេទ្យគន្ធបុប្ផាដើម្បីចូលរួមជួយសង្គ្រោះកុមារទាំងឡាយ និងការចំណាយនានាក្នុងបន្ទីរពេទ្យនេះ ខណៈបច្ចុប្បន្នបន្ទីរពេទ្យដែលផ្ដល់សេវាព្យាបាលជម្ងឺដល់កុមារដោយឥតគិតថ្លៃ មួយនេះកំពុងតែប្រឈម និងការខ្វះខាតក្នុងការចំណាយលើការទិញថ្នាំពេទ្យនិងប្រាក់បៀរវត្សន៍បុគ្គលិក របស់ខ្លួននោះ។
តាមរយៈមូលនិធិបាយ័ន ទឹកប្រាក់សរុបទាំង៥ម៉ឺនដុល្លានេះគឺជាថវិកាចូលរួមរបស់ក្រុមចលនាយុវជនកម្ពុជា ១៥៧ចំនួន៤ម៉ឺនដុល្លារ និងក្រុមហ៊ុន អ៊ិន វី ស៊ី (ផលិតទឹកបរិសុទ្ធវីតាល់ ) ថវិកាចំនួន១ម៉ឺនដុល្លារអាមេរិក។ សូមបញ្ជាក់ថា កាលពីថ្ងៃទី១៤ ខែកក្កដា ឆ្នាំ២០១២កន្លងមក មូលនិធិបាយ័ន បាននាំយកថវិកាចំនួន៣០ម៉ឺនដុល្លាអាមេរិករួចមកហើយ ជូនដល់មន្ទីរពេទ្យគន្ធបុប្ផា ។ នាឱកាសនេះដែរ លោកស្រី ហ៊ុន ម៉ាណា ក្នុងនាមមូលនិធិបាយ័នបានថ្លែងអំណរគុណចំពោះការចូលរួមរបស់ក្រុមចលនាយុវជនកម្ពុជានិងក្រុមហ៊ុន អ៊ិន វី ស៊ី ដែលបានរួមគ្នាចំណាយថវិកាចូលរួមជួយដល់មន្ទីរពេទ្យជាពិសេសកុមារដែលកំពុងសំរាកព្យាបាលជម្ងឺនៅទីនេះ ។ ក្នុងនាមជាប្រធានមូលនិធិបាយ័ន លោកស្រី ហ៊ុន ម៉ាណា បានសន្យាថា លោកស្រីនិងខិតខំបន្ថែមទៀតក្នុងការគៀងគរថវិកាឲ្យបាន៥០ម៉ឺនដុល្លារអាមេរិកក្នុង១ឆ្នាំ ៗ ដើម្បីជួយដល់មន្ទីរពេទ្យគន្ធបុប្ផា ។
លោក ម៉ឹង ពន្លក ប្រធានចលនាយុវជនកម្ពុជា បានលើកឡើងថាដោយមើលឃើញពីតម្រូវការចាំបាច់របស់មន្ទីរពេទ្យគន្ធបុប្ផានិងក៏តបតាមការអំពាវនាវរបស់សម្តេចតេជោ នាយករដ្ឋមន្ត្រីនិងលោកជំទាវព្រឹទ្ធបណ្ឌិត ប្រធានកាកបាទក្រហមកម្ពុជានិងក្រោមការណែនាំពី លោកបណ្ឌិត ហ៊ុន ម៉ាណែតក្រុមចលនាយុវជនកម្ពុជាទាំងអស់បានគៀងគរប្រមូលថវិកាដើម្បីរួមចំណែកជួយសង្គ្រោះកុមារដែលជាទំពាំងស្នងឫស្សីឲ្យរួចផុតពីជម្ងឺផ្សេងៗ ។ គណៈគ្រប់គ្រងមន្ទីរពេទ្យគន្ធបុប្ផា បានសម្តែងក្តីត្រេកអរព្រមទាំងកោតសរសើរពីសមានចិត្តដ៏សប្បុរសថ្លៃថ្លារបស់លោកស្រីហ៊ុន ម៉ាណា និងលោក ម៉ឹង ពន្លក និងក្រុមចលនាយុវជនកម្ពុជាទាំងអស់។
លោកមានប្រសាសន៍ថា ពេលនេះមន្ទីរពេទ្យគន្ធបុប្ផាបានទទួលថវិកាជាបន្តបន្ទាប់ពីសប្បុរសជននានា ប៉ុន្តែទោះជាយ៉ាងណា ថវិកាទាំងអស់នោះពុំអាចឆ្លើយតបគ្រប់គ្រាន់ចំពោះតម្រូវការ និងការចំណាយរបស់មន្ទីរពេទ្យទាំង៤កន្លែងឡើយ ព្រោះឆ្នាំនេះការសង្គ្រោះកុមារដែលចូលមកសម្រាកព្យាបាលមានកំណើនឡើង ។ លោកបញ្ជាក់ថា ការផ្តល់ថវិកាឧបត្ថម្ភរបស់មូលនិធិបាយ័ន ក៏ដូចជាសប្បុរសជននានាតាមរយៈមូលនិធិគន្ធបុប្ផា ពិតជាបានចូលរួមចំណែកយ៉ាងធំធេងដល់ការចំណាយនានារបស់មន្ទីរពេទ្យ ៕