ភ្នំពេញ: កម្ពុជាបានធ្វើជាម្ចាស់ផ្ទះនៃកិច្ចប្រជុំរួមឧត្តមមន្ត្រីអាស៊ាន ដែលបន្តធ្វើនៅព្រឹកថ្ងៃទី១៣ ខែកញ្ញា ឆ្នាំ២០១២ នៅសណ្ឋាគារអាំងទែកុងទីណង់តាល់ ដើម្បីត្រៀមរៀបចំកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធដទៃទៀត នៅខែវិច្ឆិកា ឆ្នាំ២០១២ ខាងមុខ។ កិច្ចពិភាក្សារបស់ឧត្តមមន្ត្រីអាស៊ាន នៅថ្ងៃទី១៣ ខែកញ្ញានេះ បានផ្តោតសំខាន់លើសសរគ្រឹះទាំង ៣ របស់អាស៊ាន គឺផ្នែកនយោបាយ សេដ្ឋកិច្ច សន្តិសុខ និងផ្នែកសង្គមវប្បធម៌។
លោកស្រី សឿង រដ្ឋចាវី រដ្ឋលេខាធិការក្រសួងការបរទេស បានមានប្រសាសន៍ប្រាប់ក្រុមអ្នករាយការណ៍ព័ត៌មានថា កិច្ចប្រជុំរួមរបស់ឧត្តមមន្ត្រីអាស៊ាននៅពេលនេះ ផ្តោតការពិភាក្សាសំខាន់បំផុតទៅលើការរៀបចំកិច្ចប្រជុំកំពូលអាស៊ាន លើកទី២១ ដោយពេលនេះ ក្រុមឧត្តមមន្ត្រីអាស៊ាន បានពិនិត្យមើលលើកម្មវិធី និងចំណុចដែលថ្នាក់ដឹកនាំអាស៊ានគ្រោងពិភាក្សា គឺអ្វីៗទាំងអស់ ជាការត្រៀមសម្រាប់កិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធដទៃទៀត និងប្រទេសដៃគូសំខាន់ៗ ព្រមទាំងកិច្ចប្រជុំអាស៊ីបូព៌ា លើកទី៧ ទទួលបានជោគជ័យនៅឆ្នាំ២០១២ ដែលកម្ពុជាធ្វើជាប្រធានអាស៊ាន។
លោកស្រី សឿង រដ្ឋចាវី ដែលជាឧត្តមមន្ត្រីអាស៊ាន តំណាងឲ្យកម្ពុជា បានមានប្រសាសន៍បន្តថា នេះជាកិច្ចប្រជុំរួមរបស់ឧត្តមមន្ត្រីអាស៊ាន ដែលជាថ្នាក់អនុរដ្ឋមន្ត្រីក្រសួងការបរទេស របស់ប្រទេសសមាជិកអាស៊ាន និងមានការចូលរួមពីសំណាក់ឧត្តមមន្ត្រីសេដ្ឋកិច្ច របស់អាស៊ាន និងខាងសង្គមវប្បធម៌ ព្រមទាំងមានការចូលរួមពីសំណាក់សមាជិកគណៈកម្មាធិការអចិន្ត្រៃយ៍អាស៊ាន នៅទីក្រុងហ្សាកាតាផងដែរ។
លោកស្រីរដ្ឋលេខាធិការ បានមានប្រសាសន៍បន្តថា កិច្ចប្រជុំរួមរបស់ឧត្តមមន្ត្រីអាស៊ាន គឺពាក់ព័ន្ធនឹងសសរគ្រឹះទាំង ៣ របស់អាស៊ាន ដែលរួមមាន ផ្នែកនយោបាយ និងសេដ្ឋកិច្ច សន្តិសុខ និងផ្នែកសង្គម និងវប្បធម៌ ទើបមានការពិភាក្សារួមគ្នា មើលឲ្យបានគ្រប់ជ្រុងជ្រោយ ទាំងចំណុចត្រៀមពិភាក្សារបស់ប្រមុខរដ្ឋាភិបាលអាស៊ាន និងកម្មវិធីត្រៀមរៀបចំកិច្ចប្រជុំកំពូល លើកទី២១ និងកិច្ចប្រជុំពាក់ព័ន្ធ ដែលនឹងធ្វើឡើងនៅខែវិច្ឆិកា ក្នុងរាជធានីភ្នំពេញ។
សូមរម្លឹកថា ក្រុមឧត្តមមន្ត្រីប្រទេសសមាជិកអាស៊ាន និងប្រទេសដៃគូ ដែលមានកម្ពុជាជាម្ចាស់ផ្ទះ បានជួបប្រជុំគ្នារយៈពេល ៤ថ្ងៃ ចាប់ពីថ្ងៃទី១២ ខែកញ្ញា ឆ្នាំ២០១២ នៅរាជធានីភ្នំពេញ ដើម្បីត្រៀមរៀបចំកិច្ចប្រជុំកំពូលអាស៊ាន លើកទី២១ នាខែវិច្ឆិកាខាងមុខ។
សេចក្តីជូនព័ត៌មាន របស់ក្រសួងការបរទេសកម្ពុជា ចុះថ្ងៃទី១១ ខែកញ្ញា ឆ្នាំ២០១២ បង្ហាញថា ក្នុងនាមជាប្រធានអាស៊ាន ព្រះរាជាណាចក្រកម្ពុជា នឹងធ្វើជាម្ចាស់ផ្ទះ នៃកិច្ចប្រជុំថ្នាក់ឧត្តមមន្ត្រីអាស៊ាន នៅសប្ដាហ៍នេះ ចាប់ពីថ្ងៃទី១២ ដល់ថ្ងៃទី១៥ ខែកញ្ញា ឆ្នាំ២០១២ ដើម្បីត្រៀមរៀបចំ សម្រាប់កិច្ចប្រជុំកំពូលអាស៊ាន លើកទី២១ និងកិច្ចប្រជុំកំពូលពាក់ព័ន្ធមួយចំនួន ដែលនឹងប្រព្រឹត្តទៅនៅក្នុងខែវិច្ឆិកា ឆ្នាំ២០១២ នៅទីក្រុងភ្នំពេញ។
សេចក្ដីជូនព័ត៌មានដដែល បានបង្ហាញឲ្យដឹងថា កិច្ចប្រជុំថ្នាក់ឧត្តមមន្ត្រីអាស៊ាន រួម មាន៖
១. កិច្ចប្រជុំឧត្តមមន្ត្រីអាស៊ាន និងកិច្ចប្រជុំត្រៀមរួមគ្នា (JPM) ក្នុងនោះ មានកិច្ចប្រជុំឧត្តមមន្ត្រីអាស៊ាន កិច្ចប្រជុំឧត្តមមន្ត្រី នៃក្រុមប្រឹក្សាសេដ្ឋកិច្ចអាស៊ាន និងកិច្ចប្រជុំគណៈកម្មាធិការឧត្តមមន្ត្រី លើកទី១២ នៃក្រុមប្រឹក្សាសង្គមកិច្ច-វប្បធម៌អាស៊ាន ដើម្បីរៀបចំសម្រាប់កិច្ចប្រជុំកំពូលអាស៊ាន លើកទី២១ នាខែវិច្ឆិកាខាងមុខ។
២. កិច្ចប្រជុំឧត្តមមន្ត្រីអាស៊ានបូកបី (អាស៊ាន បូក ចិន ជប៉ុន សាធារណរដ្ឋកូរ៉េ) ដើម្បីរៀបចំសម្រាប់កិច្ចប្រជុំកំពូលអាស៊ានបូក លើកទី១៥។
៣. កិច្ចប្រជុំឧត្តមមន្ត្រីអាស៊ីបូព៌ា ដើម្បីរៀបចំសម្រាប់កិច្ចប្រជុំកំពូលអាស៊ីបូព៌ា លើកទី៧។
៤. កិច្ចប្រជុំឧត្តមមន្ត្រីអាស៊ាន-សហរដ្ឋអាមេរិក ដើម្បីរៀបចំសម្រាប់កិច្ចប្រជុំថ្នាក់ដឹកនាំអាស៊ាន-សហរដ្ឋអាមេរិក លើកទី៤។
៥. កិច្ចប្រជុំគណៈកម្មាធិការប្រតិបត្តិ នៃគណៈកម្មការសន្ធិសញ្ញា ស្ដីពី តំបន់អាស៊ីអាគ្នេយ៍គ្មានអាវុធនុយក្លេអ៊ែ ដើម្បីរៀបចំចុះហត្ថលេខាលើពិធីសារ នៃសន្ធិសញ្ញា ស្ដីពី តំបន់អាស៊ីអាគ្នេយ៍គ្មានអាវុធនុយក្លេអ៊ែ។
៦. តាមសំណើរបស់កម្ពុជា និងមានការឯកភាពពីសមាជិកអាស៊ានទាំងអស់ កម្ពុជាក៏នឹងធ្វើជាម្ចាស់ផ្ទះ នៃកិច្ចប្រជុំពិគ្រោះយោបល់ក្រៅផ្លូវការ ថ្នាក់ឧត្តមមន្ត្រីអាស៊ាន-ចិន ស្តីពី ក្រមប្រតិបត្តិ COC នៅសមុទ្រចិនខាងត្បូង។ នេះជាលើកទី៣ហើយ ដែលកម្ពុជាបានផ្តួចផ្តើមឲ្យមានកិច្ចប្រជុំ ស្តីពីក្រមប្រតិបត្តិនេះ ដើម្បីកាត់បន្ថយភាពតានតឹង នៅក្នុងសមុទ្រចិនខាងត្បូង និងធ្វើការងារឆ្ពោះទៅកាន់ការតាក់តែងក្រមប្រតិបត្តិ COC នេះ៕
