នៅក្នុងឱកាសអញ្ជើញចូលរួមជាអធិបតីក្នុងពិធីបើកកិច្ចប្រជុំរដ្ឋមន្រ្តីថាមពលអាស៊ានលើកទី
៣០ និងកិច្ចប្រជុំពាក់ព័ន្ធក្រោមប្រធានបទ «ការតភ្ជាប់អាស៊ានបៃតង» នៅវិមានសន្តិភាព រាជធានីភ្នំពេញថ្ងៃទី១២ ខែកញ្ញា
ឆ្នាំ២០១២ សម្តេចអគ្គមហាសេនាបតីតេជោ ហ៊ុន សែន មានប្រសាសន៍ថា «ខ្ញុំសូមស្នើឱ្យកិច្ចប្រជុំរដ្ឋមន្ត្រីថាមពលឤស៊ានលើកទី៣០ នេះត្រូវបន្តជំរុញការអនុវត្តផែនការសកម្មភាពសហប្រតិបត្តិការថាមពលឤស៊ាន២០១០-២០១៥ ដែលជាផែនទីបង្ហាញផ្លូវដ៏មានសារសំខាន់ នៅក្នុងកិច្ចសហប្រតិបត្តិការថាមពលឤស៊ាន
ដែលគាំទ្រដល់ការតភ្ជាប់ហេដ្ឋារចនាសម្ព័ន្ធថាមពល ការលើកកម្ពស់សមាហរណកម្ម
និងកំណើន សេដ្ឋកិច្ចក្នុងតំបន់ ដោយសម្តេចបានកត់សម្គាល់ថា ជាក់ស្តែងផែនការខ្សែបញ្ជូនថាមពលឤស៊ាន
និងបំពង់ឧស្ម័នអន្តរឤស៊ាន នៅពុំទាន់ទទួលបានលទ្ធផលគួរជាទីពេញចិត្តនៅឡើយនោះទេ»។
សម្តេចតេជោនាយករដ្ឋមន្រ្តីក្នុងតួនាទីជាប្រធានអាស៊ានបានថ្លែងថា
ការកំណត់ប្រធានបទ «ការតភ្ជាប់ឤស៊ានបៃតង»
នាពេលនេះ បានបង្ហាញពីការយកចិត្តទុកដាក់ខ្ពស់លើការផលិត និងការប្រើប្រាស់ថាមពល
ដែលកាត់បន្ថយជាអតិបរមា នូវផលប៉ះពាល់ដល់បរិយាកាស បរិស្ថានធម្មជាតិ និងសង្គម និងបានរួមចំណែកសំខាន់ដល់ការកាត់បន្ថយការប្រែប្រួលឤកាសធាតុ។
សម្តេចតេជោមានប្រសាសន៍បញ្ជាក់ថា
ខ្ញុំយល់ឃើញថា វិស័យថាមពលឤចមានជម្រើសមួយចំនួន ដែលនឹងរួមចំណែកដល់ការកាត់បន្ថយការប្រែប្រួលឤកាសធាតុ
និងការកាត់បន្ថយការបំភាយឧស្ម័នកាបូនិចទៅក្នុងបរិយាកាស ដោយយើងត្រូវបន្តយកចិត្តទុកដាក់ទាំងការផលិត
ការផ្គត់ផ្គង់ និងការប្រើប្រាស់ថាមពលឱ្យមានប្រសិទ្ធភាព រួមទាំងបង្កើនការប្រើប្រាស់ថាមពលកកើតឡើងវិញផងដែរ
ដូចជា ថាមពលវារីអគ្គិសនី, ថាមពលខ្យល់,
ថាមពលពន្លឺព្រះឤទិត្យ, ថាមពលកំដៅទឹកក្នុងដី, ថាមពលជីវម៉ាស, ថាមពលជីវឧស្ម័ន និងថាមពលជីវឥន្ធនៈជាដើម។ ម៉្យាងទៀត ប្រធានបទនេះ គឺពិតជាបានចូលរួមចំណែកដល់ការខិតខំប្រឹងប្រែងរបស់បណ្តាប្រទេសនៅក្នុងតំបន់ឤស៊ាន ដែលបានប្តេជ្ញាបង្កើនសមាមាត្រការប្រើ
ប្រាស់ថាមពលកកើតឡើងវិញឱ្យបាន១៥% នៃឤនុភាពដំឡើងសរុបនៅឆ្នាំ២០១៥
ខាងមុខនេះ ដើម្បីចូលរួមឱ្យបានខ្លាំងក្លាក្នុងការថែរក្សាបរិស្ថាន។
សម្តេចតេជោនាយករដ្ឋមន្រ្តីបានផ្តល់ជាអនុសាសន៍ថា យើងទាំងអស់គ្នាគួរស្នើដល់បណ្តាអ្នកផលិតត្រូវយកចិត្តទុកដាក់ឱ្យបានច្រើនថែមទៀត ក្នុងការសិក្សាស្រាវជ្រាវរិះរកមធ្យោបាយ
ដើម្បីធ្វើឱ្យផលិតផលទាំងនោះ មានគុណភាពល្អ, មានតម្លៃទាប
និងមានភាពងាយស្រួលក្នុងការប្រើប្រាស់ ដើម្បីសម្រេចគោលដៅអភិវឌ្ឍប្រភពថាមពលបៃតងឱ្យមានការរីកចម្រើនឆាប់រហ័ស។
ទាក់ទងនឹងកិច្ចសហប្រតិបត្តិការលើផ្នែកថាមពលនុយក្លេអ៊ែរស៊ីវិល
ដែលទើបបញ្ចូលនៅក្នុងផែនការសកម្មភាពសហប្រតិបត្តិការថាមពលឤស៊ាន សម្តេចតេជោនាយករដ្ឋមន្ត្រីបានមានប្រសាសន៍ថា វាជាប្រភពថាមពលដ៏សំខាន់មួយដែរ
ក៏ប៉ុន្តែការប្រើប្រាស់ប្រភពថាមពលមួយនេះ ទាមទារឱ្យមានការផ្សព្វផ្សាយឱ្យបានទូលំទូលាយថែមទៀត ដើម្បីលើកកម្ពស់ការយល់ដឹងជាសាធារណៈអំពីការវិវត្តបច្ចេកវិទ្យា
ផលប្រយោជន៍ និងហានិភ័យនៃថាមពលនុយក្លេអ៊ែរស៊ីវិល
។
សម្តេចតេជោនាយករដ្ឋមន្ត្រីបានធ្វើការកត់សម្គាល់ថា
ការប្រើប្រាស់ថាមពលនុយក្លេអ៊ែរសម្រាប់ការផលិតអគ្គិសនី
ត្រូវមានការសិក្សាឱ្យបានស៊ីជម្រៅទៅលើបច្ចេកវិទ្យា និងវិធានការសុវត្ថិភាពបន្ថែមច្រើនទៀត
ដើម្បីការពារគ្រោះថ្នាក់នុយក្លេអ៊ែរ ដែលឤចកើតឡើងដោយ កត្តាគ្រោះមហន្តរាយគ្រប់ប្រភេទ
ក្នុងនោះយើងក៏ឤចរៀនសូត្រឱ្យបានស៊ីជម្រៅអំពីបទពិសោធន៍ និងមេរៀននៃគ្រោះមហន្តរាយរោងចក្រនុយក្លេអ៊ែរ
ដែលបានកើតឡើងដោយរលកយក្សស៊ូណាមីនៅហ៊្វូគូស៊ីម៉ាប្រទេសជប៉ុនកាលពីខែមីនា
ឆ្នាំ២០១១ កន្លងទៅនេះ។ ដោយឡែកក្រៅអំពីថាមពលនុយក្លេអ៊ែរ ប្រសិនបើពិនិត្យអំពីពិធិកម្មនៃប្រភពថាមពលយើងក៏ឤចមើលឃើញដែរថា
ធ្យូងថ្មក៏បានដើរតួនាទីយ៉ាងសំខាន់សម្រាប់ផ្គត់ផ្គង់សេចក្តីត្រូវការថាមពលទាំងបច្ចុប្បន្ន
និងទៅអនាគតផងដែរ។ ប៉ុន្តែការប្រើប្រាស់ប្រភពថាមពលធ្យូងថ្មក៏ទាម ទារឱ្យមានការយកចិត្តទុកដាក់ទៅលើការប្រើប្រាស់បច្ចេកវិទ្យាទំនើបផងដែរ ដែលក្នុងនោះរួមមានបច្ចេកវិទ្យាធ្យូងថ្មស្អាត
និងបច្ចេកវិទ្យាចាប់យកកាបូន ដែលឤចកាត់បន្ថយជាអតិបរមានូវផលប៉ះពាល់ដល់បរិយាកាសដោយការបំភាយនៃឧស្ម័នពុល។
បច្ចុប្បន្ននេះ
នៅក្នុងស្ថានភាពនៃការតភ្ជាប់ខ្សែបញ្ជូនថាមពលឤស៊ាន និងបំពង់ឧស្ម័នអន្តរឤស៊ានដែលទើបតែបានផ្តើមចេញពីរូបភាពទ្វេភាគី ពីព្រោះនៅមានសេសសល់ការងារបច្ចេកទេស
និងបទប្បញ្ញត្តិផ្សេងៗទៀត ដើម្បីឆ្ពោះទៅការធ្វើសុខដុមនីយកម្មក្របខ័ណ្ឌបញ្ញត្តិកម្ម
និងស្តង់ដារបច្ចេកទេសមួយពេញលេញ សម្តេចតេជោនាយករដ្ឋមន្រ្តីថ្លែងថា ខ្ញុំជឿជាក់ថា ឤស៊ាននឹងបន្តពង្រឹង
និងពង្រីកជំហរឯកភាពគ្នាមួយក្នុងតំបន់ ដើម្បីរួមគ្នាដោះស្រាយ និងបំពេញភាពខ្វះចន្លោះទាំងឡាយ
ដែលនៅមានដូចជា ការតភ្ជាប់ឤស៊ាន ទាំងផ្នែកហេដ្ឋារចនាសម្ព័ន្ធរូបវន្តនេះ
និងការកាត់បន្ថយគម្លាតអភិវឌ្ឍន៍ក្នុងចំណោមប្រទេសក្នុងតំបន់នេះជាដើម។ ជារួមយើងទាំងអស់គ្នា
ពិតជាមានមោទនភាពចំញេះវឌ្ឍនភាពនៃការអនុវត្តផែនការសកម្មភាពសហប្រតិបត្តិការថាមពលឤស៊ាន២០១០-២០១៥
ពីព្រោះកិច្ចការនេះនឹងរួមចំណែក ដល់ការអភិវឌ្ឍថាមពលបៃតង, ការគាំទ្រដល់សន្តិសុខថាមពល និងភាពរឹងមាំផ្នែកសេដ្ឋកិច្ច ក្នុងប្រទេសនីមួយៗផង
និងតំបន់ឤស៊ានទាំងមូលផងដែរ។
សម្តេចអគ្គមហាសេនាបតីតេជោ
ហ៊ុន សែន មានប្រសាសន៍បញ្ជាក់ថា កម្ពុជាសូមគាំទ្រដល់ការរៀបចំឱ្យមានផែនទីបង្ហាញផ្លូវសម្រាប់អភិវឌ្ឍបច្ចេកវិទ្យាថាមពលស្អាតឤស៊ាន
ដែលជាការចូលរួមរបស់ឤស៊ានក្នុងការកាត់បន្ថយផលប៉ះពាល់ពីការប្រែប្រួលឤកាសធាតុ
និងធ្វើឱ្យឤស៊ានក្លាយជាតំបន់មានថាមពលបៃតង មានអត្រាបំភាយឧស្ម័នកាបូនិចតិច និងមានសេដ្ឋកិច្ចបៃតង។ ដើម្បីសម្រេចបានគោលដៅនេះ
និងការតភ្ជាប់ឤស៊ាន ក្នុងបរិការណ៍នៃការប្រែប្រួលឤកាសធាតុ ការគំរាមនៃគ្រោះមហន្តរាយធម្មជាតិ ជាមួយនឹងកំណើននៃសេចក្តី
ត្រូវការថាមពល អស្ថិរភាពនៃថ្លៃប្រេងឥន្ធនៈនៅលើទីផ្សារអន្តរជាតិ
និងដើម្បីសន្តិសុខថាមពល ក្នុងតំបន់របស់យើង ព្រមទាំងទប់ទល់នឹងការឡើងថ្លៃថាមពល សម្តេចតេជោនាយករដ្ឋមន្ត្រីក្នុងនាមជាប្រធានអាស៊ាន
បានដាក់ចេញនូវសំណើរជូនស្នើឱ្យកិច្ចប្រជុំរដ្ឋមន្រ្តីថាមពល អាស៊ានលើកទី៣០ ដោយផ្តោតការយកចិត្តទុកដាក់លើចំណុចមួយចំនួនដូចតទៅ៖
ទី១-ត្រូវបង្កើនកិច្ចសហប្រតិបត្តិការក្នុងតំបន់
និងជាមួយដៃគូសន្ទនា ក្នុងការផលិតឧបករណ៍ បរិក្ខារថាមពលកកើតឡើងវិញឱ្យមានគុណភាពប្រសិទ្ធភាពខ្ពស់ និងតម្លៃទាប ដើម្បីឱ្យប្រជាជនឤស៊ានឤចបង្កើនការប្រើប្រាស់ឧបករណ៍បរិក្ខារទាំងអស់នោះ។
ប្រការនេះ នឹងរួមចំណែកច្រើនដល់ការកាត់បន្ថយការប្រែប្រួលឤកាសធាតុ និងជំរុញដល់ការតភ្ជាប់ឤស៊ានបៃតងនោះ។
ទី២-បន្តដំណើរការពាណិជ្ជកម្មថាមពលឱ្យមានប្រសិទ្ធភាព ដើម្បីឈានទៅជំរុញបង្កើតឱ្យមានទីផ្សារថាមពលឤស៊ាន។
ពាក់ព័ន្ធទៅនឹងដំណើរការនេះ ត្រូវជំរុញការតភ្ជាប់ខ្សែបញ្ជូនថាមពលឤស៊ានឱ្យកើតជារូបរាង និងមានដំណើរការស្របគ្នាទៅនឹងផែនទីបង្ហាញផ្លូវរបស់ពាណិជ្ជកម្មថាមពលក្នុងមហាអនុតំបន់មេគង្គ
(GMS) ដែលនឹងឈានទៅបង្កើតបាននូវមជ្ឈមណ្ឌលសម្របសម្រួលថាមពលតំបន់នាពេលខាងមុខនេះ។
ទី៣-ដោយតម្លៃថាមពលមាននិន្នាការកើនឡើងជាទូទៅ ដូច្នេះយើងត្រូវយកចិត្តទុកដាក់ជំរុញ
ការតភ្ជាប់ខ្សែបញ្ជូនថាមពលឤស៊ានពីបណ្តាប្រភពផលិតអគ្គិសនីធំៗ ដូចជា
ស្ថានីយនុយក្លេអ៊ែរ, វារីអគ្គិសនី,
រោងចក្រផលិតថាមពលពីធ្យូងថ្ម ពីបណ្តាប្រទេសផ្សេងទៀត ដែលមានលក្ខណមាត្រដ្ឋានសេដ្ឋកិច្ច,
មានតម្លៃទាប ហើយប្រភពទាំងនោះ មានទីតាំងនៅកន្លែងដែលមានភាពអនុគ្រោះក្នុងការគ្រប់គ្រង,
ការការពារបរិស្ថាន ព្រមទាំងមានសមត្ថភាពផ្គត់ផ្គង់ធនធានមនុស្ស
និងធនធានហិរញ្ញវត្ថុ។ ការពង្រីកបាននូវការតភ្ជាប់ហេដ្ឋារចនាសម្ព័ន្ធរូបវន្តនេះ គឺជាគន្លឹះសម្រាប់កាត់បន្ថយគម្លាតនៃការអភិវឌ្ឍ
ក្នុងចំណោមប្រទេសសមាជិក និងសម្រាប់ធានានូវភាពជោគជ័យនៃសមាហរណកម្មឤស៊ាន ដូចបានលើកឡើងក្នុងផែនការមេស្តីពីការតភ្ជាប់ឤស៊ាន។
ទី៤-ត្រូវបន្តកិច្ចខិតខំប្រឹងប្រែងអនុវត្តបន្ថែមទៀត តាមបណ្តាលក្ខខណ្ឌតម្រូវនានា
ដើម្បី សម្រេចបានផែនការសកម្មភាពនៃកិច្ចសហប្រតិបត្តិការថាមពលឤស៊ានឆ្នាំ២០១០-២០១៥
ពី ព្រោះថា កិច្ចការនេះនឹងធ្វើឱ្យឤស៊ានកាន់តែលេចត្រដែតឡើងក្នុងចំណោមតំបន់នានានៅលើពិភពលោក
ហើយប្រជាជនឤស៊ានកាន់តែមានវឌ្ឍភាពខ្ពស់ជាលំដាប់។ ដោយឡែកកិច្ចការនេះ នឹងតម្រូវឱ្យមានការចូលរួមច្រើនទៀតពីភាគីពាក់ព័ន្ធនានានៅគ្រប់កម្រិត
ជាពិសេសការគាំទ្រ និងការចូលរួមពីវិស័យឯកជន និងពីប្រជាជនឤស៊ានទាំងមូលផងដែរ។
ក្នុងន័យនេះ យើងត្រូវគិតរួមគ្នារកវិធានការគន្លឹះ
ដើម្បីកៀរគរការចូលរួមគាំទ្រពីវិស័យឯកជន និងពីប្រជាជនឤស៊ានទាំងមូល។
សូមបញ្ជាក់ថា កិច្ចប្រជុំរដ្ឋមន្ត្រីថាមពលអាស៊ានក្រោមប្រធានបទស្តីពីការតភ្ជាប់អាស៊ានបៃតងបានប្រព្រឹត្តទៅក្រោមវត្តមានរដ្ឋមន្ត្រីថាមពលកម្ពុជា
ជាសហប្រធានជាមួយរដ្ឋមន្ត្រីថាមពល ចិន ជប៉ុន និងសាធារណរដ្ឋកូរ៉េ និងមានការចូលរួមពីរដ្ឋមន្ត្រីថាមពលអាស៊ាន និងសមាជិកប្រតិភូ អគ្គលេខាធិការអាស៊ាន ព្រមទាំងដៃគូសន្ទនាអាស៊ានរួមមានចិន ជប៉ុន សាធារណរដ្ឋកូរ៉េ អូស្ត្រាលី ញូហ្សេឡែន ឥណ្ឌា រុស្សី អាមេរិក ទីភ្នាក់ងារថាមពលអន្តរជាតិ (IEA) វិទ្យាស្ថានស្រាវជ្រាវសេដ្ឋកិច្ចតំបន់អាស៊ាន
និងអាស៊ីបូព៌ា(ERIA) និងផ្នែកឯកជនសរុបប្រមាណ៤៥០នាក់៕