ភ្នំពេញ: ជនជាប់ចោទ អៀង ធីរិទ្ធ ត្រូវបានអង្គជំនុំជម្រះសាលាដំបូង ធ្វើការវាយតម្លៃឡើងវិញ អំពីសម្បទាខាងបញ្ហាស្មារតី ដោយបានសម្រេចជាថ្មី ដោយតម្កល់នូវសេចក្តីសម្រេចរបស់ខ្លួនលើកមុខ ដែលថាជនជាប់ចោទ អៀង ធីរិទ្ធ មានជំងឺកាន់តែធ្ងន់ធ្ងរឡើងៗ (ជាប្រភេទជំងឺអាលហ្សៃម៉ា Alzheimer ដែលជាជំងឺវង្វេងវង្វាន់ និងភ្លេចការចងចាំ) ហើយគាត់នៅតែមិនមានសម្បទាខាងបញ្ញាស្មារតីគ្រប់គ្រាន់ ក្នុងការចូលរួមសវនាការបាន ដូច្នេះអង្គជំនុំជម្រះសាលាដំបូង ត្រូវដោះលែងជនជាប់ចោទរូបនេះ ឲ្យនៅក្រៅមន្ទីរឃុំឃាំង គ្មានរយៈពេលកំណត់។
សេចក្តីប្រកាសព័ត៌មាន របស់អង្គជំនុំជម្រះវិសាមញ្ញក្នុងតុលាការកម្ពុជា នៅថ្ងៃទី១៣ ខែកញ្ញា ឆ្នាំ២០១២ បានឲ្យដឹងថា អង្គជំនុំជម្រះសាលាដំបូង បានចេញសេចក្តីសម្រេចលើការវាយតម្លៃឡើងវិញ អំពីសម្បទាខាងបញ្ញាស្មារតីរបស់ជនជាប់ចោទ អៀង ធីរិទ្ធ ក្នុងការចូលរួមសវនាការ។ ផ្អែកតាមរបាយការណ៍ និងសក្ខីកម្មរបស់អ្នកជំនាញផ្នែកវេជ្ជសាស្ត ដែលត្រូវបានតែងតាំងដោយតុលាការ នៅថ្ងៃនេះ អង្គជំនុំជម្រះសាលាដំបូងបានសម្រេចជាថ្មី ដោយតម្កល់នូវសេចក្តីសម្រេចរបស់ខ្លួនលើកមុខ ដែលថាជនជាប់ចោទ អៀង ធីរិទ្ធ មានជំងឺកាន់តែធ្ងន់ធ្ងរឡើងៗ (ជាប្រភេទជំងឺអាលហ្សៃម៉ា Alzheimer ដែលជាជំងឺវង្វេងវង្វាន់ និងភ្លេចការចងចាំ) ហើយគាត់នៅតែមិនមានសម្បទាខាងបញ្ញាស្មារតីគ្រប់គ្រាន់ ក្នុងការចូលរួមសវនាការបាន។
សេចក្តីប្រកាសព័ត៌មានដដែល បានលើកឡើងទៀតថា ក្រុមអ្នកជំនាញបានបញ្ជាក់ថា រហូតមកដល់ពេលនេះ ការព្យាបាលតាមគ្រប់មធ្យោបាយ ត្រូវបានប្រើប្រាស់អស់លទ្ធភាពហើយ ៗការចុះខ្សោយនៃដំណើរការខួរក្បាលរបស់ជនជាប់ចោទ នៅតែមិនអាចវិលត្រឡប់មកសភាពធម្មតាវិញបានទេ។ ដោយសារតែមិនអាចប៉ាន់ស្មានបានថា ជនជាប់ចោទរូបនេះ នឹងអាចត្រូវយកមកជំនុំជម្រះបាននៅពេលណានោះ អង្គជំនុំជម្រះសាលាដំបូង ក៏បានសម្រេចតម្កល់ការបំបែកកិច្ចនីតិវិធី នូវបទចោទប្រកាន់ប្រឆាំងនឹងជនជាប់ចោទ អៀង ធីរិទ្ធ នៅក្នុងសំណុំរឿង០០២ និងផ្អាកកិច្ចដំណើរការនីតិវិធីប្រឆាំងនឹងជនជាប់ចោទរូបនេះ ដោយមិនកំណត់រយៈពេល។ ដូចដែលសហព្រះរាជអាជ្ញា និងក្រុមមេធាវីការពារក្តីបានទទួលស្គាល់ដែរ នៅក្នុងកាលៈទេសៈនេះ អង្គជំនុំជម្រះសាលាដំបូង ត្រូវមានកាតព្វកិច្ចដោះលែងជនជាប់ចោទរូបនេះ ចេញពីមន្ទីរឃុំឃាំង។
ដោយសារតែកិច្ចដំណើរការនីតិវិធីប្រឆាំងនឹងជនជាប់ចោទ អៀង ធីរិទ្ធ ត្រូវបានផ្អាក ដោយមិនកំណត់រយៈពេល អង្គជំនុំជម្រះសាលាដំបូង មិនមានមូលដ្ឋានតាមផ្លូវច្បាប់ ដើម្បីដាក់លក្ខខណ្ឌដោយបង្ខំ លើជនជាប់ចោទរូបនេះបានឡើយ នៅពេលដោះលែង។ ដោយសារតែសមត្ថភាពខាងបញ្ញាស្មារតីរបស់ជនជាប់ចោទ លក្ខខណ្ឌដោយបង្ខំ ទោះក្នុងករណីណាក៏ដោយ មានការលំបាកក្នុងការអនុវត្តន៍។ ស្ថានភាពសុខភាពរបស់ជនជាប់ចោទ បានបង្ហាញថា ជនជាប់ចោទមិនមានសមត្ថភាពក្នុងការចងចាំ ឬអនុវត្តតាមលក្ខខណ្ឌទាំងនេះបានឡើយ។
ប្រភពដដែលបានបញ្ជាក់ទៀតថា ទោះជាយ៉ាងណាក្តី អង្គជំនុំជម្រះបានយល់ស្របជាមួយសហព្រះរាជអាជ្ញា ក្នុងការដាក់វិធានការជាក់លាក់មួយចំនួន នៅពេលដោះលែងជនជាប់ចោទ អៀង ធីរិទ្ធ នៅមានលក្ខណៈសមស្រប។ ហេតុដូច្នេះ អង្គជំនុំជម្រះបានរម្លឹកដល់ជនជាប់ចោទ អំពីកាតព្វកិច្ចរបស់ខ្លួន ដោយមិនត្រូវជ្រៀតជ្រែកកិច្ចការរដ្ឋបាលរបស់អង្គជំនុំជម្រះ ដូចជា មិនត្រូវទាក់ទងជាមួយសាក្សី ជនរងគ្រោះ ឬជនជាប់ចោទដទៃទៀត (លើកលែងតែស្វាមីរបស់គាត់ អៀង សារី)។
អង្គជំនុំជម្រះសាលាដំបូង ក៏បានស្នើឲ្យជនជាប់ចោទរូបនេះ មិនត្រូវចាកចេញពីដែនដីនៃព្រះរាជាណាចក្រ ត្រូវជូនដំណឹងដល់ការិយាល័យរដ្ឋបាល នៃអង្គជំនុំជម្រះវិសាមញ្ញក្នុងតុលាការកម្ពុជា មុននឹងផ្លាស់ប្តូរអាសយដ្ឋានរស់នៅណាមួយរបស់ខ្លួន និងមិនត្រូវទាក់ទងជាមួយប្រព័ន្ធសារព័ត៌មាន ពាក់ព័ន្ធនឹងដំណើរការនីតិវិធីរបស់អង្គជំនុំជម្រះវិសាមញ្ញក្នុងតុលាការកម្ពុជា។ ដោយសារតែជំងឺ អាលហ្សៃម៉ា ជាប្រភេទជំងឺដែលមិនអាចព្យាបាលបាននាពេលបច្ចុប្បន្ន ហើយក៏មិនមានមធ្យោបាយណាមួយ ក្នុងការព្យាបាលជំងឺនេះតទៅបាននោះ អង្គជំនុំជម្រះមិនបង្គាប់ឲ្យមានការវាយតម្លៃផ្នែកវេជ្ជសាស្ត្របន្ថែមទៀត ទៅលើជនជាប់ចោទរូបនេះទេ។
ប៉ុន្តែអង្គជំនុំជម្រះ យល់ព្រមធ្វើការពិគ្រោះយោបល់ជារៀងរាល់ឆ្នាំ ជាមួយអ្នកជំនាញផ្នែកវេជ្ជសាស្ត្រ ដែលត្រូវបានតែងតាំងដោយតុលាការ ដើម្បីបញ្ជាក់អំពីលទ្ធភាពនៃការរកឃើញការព្យាបាលយតាមបែបវេជ្ជសាស្ត្រថ្មីៗ ដែលតាមយោបល់របស់អ្នកជំនាញថា អាចនឹងជួយស្តារសម្បទាខាងបញ្ញាស្មារតីរបស់ជនជាប់ចោទ ឲ្យចូលរួមក្នុងការជំនុំជម្រះវិញបាន។ ដោយសារតែលទ្ធភាពនៃការរកឃើញ នូវការព្យាបាលជំងឺវង្វេងវង្វាន់ (ជំងឺអាលហ្សៃម៉ា) នាពេលបច្ចុប្បន្ននេះ មានលក្ខណៈមិនច្បាស់លាស់ ការណ៍នេះនាំឲ្យមិនមានមូលដ្ឋាន ក្នុងការបន្តឃុំខ្លួនជនជាប់ចោទរូបនេះបានឡើយ។
សេចក្តីប្រកាសព័ត៌មានរបស់អង្គជំនុំជម្រះ សូមបញ្ជាក់ផងដែរថា សេចក្តីសម្រេចដែលថា ជនជាប់ចោទមិនមានសម្បទាខាងបញ្ញាស្មារតីគ្រប់គ្រាន់ ក្នុងការចូលរួមសវនាការនេះ មិនមែនជាការសម្រេចសេចក្តីអំពីអត្ថិភាព ឬនត្ថិភាព នៃពិរុទ្ធភាពរបស់ជនជាប់ចោទ អៀង ធីរិទ្ធ នោះឡើយ ហើយក៏មិនមានអានុភាពដកការចោទប្រកាន់នានា ចេញពីជនជាប់ចោទរូបនេះដែរ៕