ភ្នំពេញ: ក្លឹបអ្នកកាសែតកម្ពុជា (ក.អ.ក) សូមជម្រាបជូនដំណឹងដល់អស់លោកលោកស្រី អ្នកនាង កញ្ញា ជាអ្នកសារព័ត៌មាន សិស្សានុសិស្ស និងនិស្សិតទាំងអស់ឱ្យបានជ្រាបថា (ក.អ.ក) នឹងបើកវគ្គបណ្ដុះបណ្ដាលផ្នែកកាត់តរូបភាព (Adobe Photoshop) ដែលវគ្គបណ្ដុះបណ្ដាល នេះនឹងចាប់ផ្ដើមចូលរៀន នៅថ្ងៃទី១៣ ខែសីហា ឆ្នាំ២០១២ ខាងមុខនេះ ចាប់ពីពេលវេលាម៉ោង ៧ ដល់ម៉ោង ៨ ព្រឹក រៀងរាល់ថ្ងៃចន្ទ ដល់ថ្ងៃសុក្រ នៅក្លឹបអ្នកកាសែតកម្ពុជា ផ្ទះលេខ ២២៦ ផ្លូវ ១៥៥ សង្កាត់ទួលទំពូង១ ខណ្ឌចំការមន រាជធានីភ្នំពេញ។
សេចក្ដីជូនដំណឹងរបស់ក្លឹបអ្នកកាសែតកម្ពុជា ធ្វើនៅភ្នំពេញ ថ្ងៃទី៣១ ខែកក្កដា ឆ្នាំ២០១២ បានបង្ហាញថា វគ្គបណ្ដុះបណ្ដាល ដែលមានរយៈពេល ១៥ ម៉ោង ក្រោមជំនួយឧបត្ថម្ភរបស់អង្គការខុនរ៉ាដ អាដិន ណៅអែរ គឺជាផ្នែកមួយនៃគម្រោងរបស់ក្លឹបអ្នកកាសែតកម្ពុជា ដើម្បីធ្វើអោយអ្នកសារព័ត៌មាន សិស្សានុសិស្ស និងនិស្សិតទាំងអស់ នៅក្នុងប្រទេសកម្ពុជា ចេះប្រើជំនាញនេះ ក្នុងការបំពេញការងារ។
ក្នុងកម្មវិធីនេះ មានចំណុចលំអិតតូចៗ រួមមាន ការកាត់តរូបភាព ការកែច្នៃរូបភាព ការដាក់ពណ៌លើរូបភាព ការកែពន្លឺ និងការកែច្នៃផ្សេងៗទៀត។ វគ្គបណ្ដុះបណ្ដាលនេះ នឹងផ្ដល់ជូនដល់អ្នកកាសែត សិស្សានុសិស្ស និង និស្សិតទាំងអស់ ដោយមិនមានការបង់ប្រាក់ឡើយ។
សមាជិក ក.អ.ក និងអ្នកសារព័ត៌មាន សិស្សានុសិស្ស និងនិស្សិតទាំងអស់ ដែលមានចំណាប់អារម្មណ៍នៅក្នុងវគ្គបណ្ដុះបណ្ដាល ផ្នែកកាត់តរូបភាព (Adobe Photoshop) នេះ សូមមេត្ដាចុះឈ្មោះនៅក្លឹបអ្នកកាសែតកម្ពុជា អោយបានមុនថ្ងៃទី១១ ខែសីហា ឆ្នាំ២០១២។
សំរាប់ព័ត៌មានបន្ថែម សូមមកទំនាក់ទំនងនៅក្លឹបអ្នកកាសែតកម្ពុជា ឬតាមទូរស័ព្ទ៖ 077 514 070៕