ឧត្ដរមានជ័យ-សៀមរាប: ថ្មីៗនេះគេបានឃើញថា មានប្រជាពលរដ្ឋជាច្រើនគ្រួសារបាននាំកូននាំចៅ ខ្លះជិះម៉ូតូ ខ្លះបើកគោយន្ដ ទៅបោះតង់ ដើម្បីចាប់ដីធ្លីរបស់រដ្ឋធ្វើជាកម្មសិទ្ធិ នៅចំណុចឃុំលំទង ស្រុកអន្លង់វែង ខេត្ដឧត្ដរមានជ័យ និងឃុំស្រែណូយ ស្រុកវ៉ារិន ខេត្ដសៀមរាប ដោយឃុំទាំងពីរស្ថិតនៅជាប់ព្រំប្រទល់នឹងគ្នា។
ចលនារបស់ប្រជាពលរដ្ឋចូលទៅកាប់ដីព្រៃរបស់រដ្ឋខាងលើ គឺមានសន្ទុះខ្លាំងក្លាឡើងច្រើនបំផុត ចាប់ពីថ្ងៃទី២៥ ខែកក្កដា ឆ្នាំ២០១២ កន្លងទៅ។ ដីព្រៃពីរប្រភេទ ដែលប្រជាជនចូលទៅកាន់កាប់ឆ្ការ និងបោះតង់ គឺមានផ្ទៃដីរបស់រដ្ឋ និងផ្ទៃដីរបស់ក្រុមហ៊ុនសំរោងរ៉ាប់ប័រ។
ក្រុមមន្ដ្រីមូលដ្ឋានឃុំលំទងបាននិយាយថា ប្រជាជនថ្មីៗដែលមកចាប់ដីធ្លីនៅតំបន់ខាងលើ គឺមិនអាចគណនាថា មានចំនួនប៉ុន្មានគ្រួសារពិតប្រាកដនោះឡើយ ដោយក្រុមមូលដ្ឋានថា មានច្រើនគ្រួសារ ដែលគ្រួសារខ្លះនៅរាយប៉ាយរបោះៗ និងនៅព្រៃដែលគេឆ្ការកាប់ដុតរួច។
មន្ដ្រីមូលដ្ឋានដដែលបាននិយាយថា ជាគោលការណ៍របស់ប្រជាពលរដ្ឋ ដែលមករស់នៅទន្ទ្រានកាន់កាប់ដីព្រៃរបស់រដ្ឋ ក៏ដូចជាដីព្រៃរបស់ក្រុមហ៊ុន គឺជាការខុសច្បាប់ ព្រោះថាពួកគាត់ទើបតែមកនៅពីរទៅបីថ្ងៃប៉ុណ្ណោះ មិនអាចផ្ដល់ដីធ្លី ដូចប្រជាពលរដ្ឋដែលមករស់នៅជាយូរណាស់មកហើយទេ។
ក្រុមមន្ដ្រីដដែលនិយាយទៀតថា ប្រជាពលរដ្ឋដែលមកចាប់ដីធ្លីខាងលើ គឺភាគច្រើនមកពីស្រុកអន្លង់វែង ខ្លះមានម៉ូតូ ខ្លះជិះគោយន្ដទាំងគ្រួសារ មកកាប់ព្រៃ ហើយក៏ចល័តចេញទៅបាត់ និងខ្លះទៀតកាប់ព្រៃ ហើយបោះតង់ស្នាក់នៅជាហូរហែ។ មានកន្លែងខ្លះទៀត ដែលជាព្រៃរបស់រដ្ឋនៅឃុំលំទង និងឃុំស្រែណូយ គឺប្រជាពលរដ្ឋទើបតែកាប់ឈើថ្មីៗ និងដើមឈើខ្លះមានទំហំធំៗ ត្រូវបានគេអារដោយរណាយន្ដដួលពេញព្រៃ មើលទៅគួរឱ្យស្ដាយស្រណោះបំផុត។ ករណីនេះដែរមិនមានឃើញមានជំនាញពាក់ព័ន្ធធ្វើការបង្ក្រាបឡើយ។
ប្រជាពលរដ្ឋមួយរូបដែលកំពុងបោះតង់ រស់នៅព្រៃតំបន់ភូមិគោកតាមោក ឃុំលំទង បានប្រាប់អ្នកយកព័ត៌មានគេហទំព័រ CEN ថា គាត់ចូលមកបោះតង់ និងឆ្ការព្រៃនៅចំណុចខាងលើ បានរយៈពេលប្រាំថ្ងៃហើយ ដោយគាត់មានគោយន្ដមួយគ្រឿង ជិះឌុបប្រពន្ធ និងចៅម្នាក់ ព្រមទាំងឆ្កែមួយក្បាលមកជាមួយផង។
ប្រជាពលរដ្ឋរូបនោះមានឈ្មោះ សៅ ម៉ោញ ភេទប្រុស អាយុ ៥៨ឆ្នាំ។ គាត់និយាយថា មុននេះគាត់ចេញពីភូមិឈើ ទាលជ្រុំ ឃុំថ្លាត ស្រុកអន្លង់វែង។ នៅឯភូមិឃុំខាងលើ ក្រុមគ្រួសាររបស់គាត់មានផ្ទះរស់នៅទីនោះ និងដីស្រែសម្រាប់ប្រកបរបរចិញ្ចឹមជីវិតផងដែរ ប៉ុន្ដែដោយមានគេប្រាប់ថា មានក្រុមយុវជនស្ម័គ្រចិត្ដកំពុងវាស់វែងដីធ្លី នៅចំណុចគោកតាមោក ក្រុមគ្រួសារគាត់ក៏ជិះគោយន្ដមកឆ្ការព្រៃ ចាប់យកដីរដ្ឋតែម្ដងទៅ ក្រែងបានគេវាស់វែងដូចគេនិយាយមែន។
ប្រជាពលរដ្ឋដដែលបាននិយាយទៀតថា ពេលគាត់មកបោះតង់ ក៏មានជំនាញមួយដែលគេមិនបញ្ចេញឈ្មោះ ឬអង្គភាព បានមកប្រាប់គាត់ថា "លោកពូឯងកុំអាលចេញទៅណា បន្ដិចទៀតនឹងមានក្រុមយុវជនមកវាស់ដី ជូនធ្វើជាកម្មសិទ្ធិតទៅថ្ងៃអនាគត"។
សូមបញ្ជាក់ដែរថា ប្រជាពលរដ្ឋដែលមកចាប់ដីខាងលើ គឺផ្អើលច្រើនឡើងៗ បន្ទាប់ពីមានក្រុមយុវជនស្ម័គ្រចិត្ដសម្ដេចតេជោ ហ៊ុន សែន កំពុងវាស់វែងដីធ្លីជូនប្រជាពលរដ្ឋ នៅចំណុចឃុំលំទង ស្រុកអន្លង់វែង។ ពេលប្រជាពលរដ្ឋដឹងដំណឹងនេះ ក៏នាំគ្នាមកចាប់ដីព្រៃរបស់រដ្ឋ និងដីព្រៃក្រុមហ៊ុនដាំកៅស៊ូ យកធ្វើជាកម្មសិទ្ធិផ្ទាល់ខ្លួន៕ K
