រដ្ឋមន្ត្រីការបរទេសសហរដ្ឋអាមេរិកលោក ស្រីហ៊ីឡារីគ្លីងតុន បានមកដល់ប្រទេសសេណេហ្គាល់កាលពីថ្ងៃអង្គារ ដោយចាប់ផ្ដើមនូវដំណើរទស្សនកិច្ចមួយដែលនឹងនាំលោកស្រីទៅកាន់ប្រទេសស៊ូដង់ខាងត្បូង ដែលជាប្រទេសថ្មីបំផុតរបស់អាហ្វ្រិក និង ស្ថិតនៅក្នុងទស្សនកិច្ចឯកជនមួយទៅជួបរដ្ឋបុរសដែលមានវ័យចំណាស់របស់ទ្វីប មេដឹកនាំប្រឆាំងរបប អាប៉ាថេត អាយុ៩៩ឆ្នាំ លោក ណេលសិនម៉ាន់ដេឡា។
ដោយឡែកការយកចិត្តទុកដាក់ជាសាធារណៈរបស់លោកស្រីគ្លីងតុននោះនឹងស្ថិតនៅលើសមិទ្ធផលប្រជាធិបតេយ្យរបស់អាហ្វ្រិកនិងសក្ដានុភាពសេដ្ឋកិច្ច ដំណើរទស្សនកិច្ចនេះ ក៏បង្ហាញឲ្យឃើញផងដែរពីចំណងទាក់ទងសន្តិសុខ របស់សហរដ្ឋអាមេរិកនៅក្នុងការប្រឈមមុខនឹងការគំរាម ដែលកំពុងកើនឡើង ពីពួកសកម្មប្រយុទ្ធឥស្លាមនិយមរបស់ក្រុមណាកូទិក។
លោកស្រីចេនីហ្វើឃុក ប្រធានកម្មវិធីអាហ្វ្រិកនៅមជ្ឈមណ្ឌលសិក្សាយុទ្ធសាស្ត្រ និង អន្តរជាតិ នៅក្រុងវ៉ាស៊ីតោន និយាយថា «ការគំរាមសន្តិសុខកំពុងមើលឃើញកាន់តែច្រើន ហើយនៅក្នុងវិធីខ្លះមានគ្រោះថ្នាក់ជាងពីមុន។
ដំណើរទស្សនកិច្ចរបស់លោកស្រីគ្លីងតុន ដែលជាដំណើរចុងក្រោយរបស់លោកស្រី ក្នុងនាមជាអ្នកការទូតកំពូលរបស់អាមេរិកនោះ នឹងនាំលោកស្រីទៅកាន់ប្រទេសស៊ូដង់ខាងត្បូងនៅថ្ងៃសុក្រជាកន្លែងដែលលោកស្រីនឹងជាមន្ត្រីជាន់ខ្ពស់បំផុតរបស់សហរដ្ឋអាមេរិកដែលធ្វើទស្សនកិច្ចចាប់តាំងពីប្រទេសនេះ បានប្រកាសឯករាជ្យនៅក្នុងខែកក្កដា ឆ្នាំ២០១១មក។
កន្លែងឈប់សំចតទៀតនោះនឹងរួមមានប្រទេសអ៊ូហ្គាន់ដា ប្រទេសកេនយ៉ា ប្រទេសម៉ាឡាវី និង អាហ្វ្រិកខាងត្បូង ជាកន្លែងដែលលោកស្រីនឹងឈប់នៅភូមិស្រុកគូនូរបស់លោកម៉ាន់ដេឡានៅថ្ងៃច័ន្ទដើម្បីជួបជាឯកជនជាមួយមេដឹកនាំរំដោះដែលគោលគោរព ដែលបានបាត់មុខជាបណ្ដើរៗពីសាធារណជន ដោយសារការចូលនិវត្តន៍ជាផ្លូវការរបស់លោក៕