អគ្គនាយកដ្ឋាននយោបាយនិងកិច្ចការបរទេសក្រសួងការពារជាតិប្រជុំបូកសរុបលទ្ធផលការងារឆមាសទី១ឆ្នាំ ២០១២ និងលើកទិសដៅបន្ដ
ឯកឧត្តម ឧត្តមសេនីយ៍ឯក ណឹម សុវត្ថិ អគ្គនាយកនៃអគ្គនាយកដ្ឋាននយោបាយ និងកិច្ចការបរទេសក្រសួងការពារជាតិ បានអញ្ជើញចូលរួមបើកកិច្ចប្រជុំបូកសរុបលទ្ធផលការងារឆមាសទី១ឆ្នាំ ២០១២ និងលើកទិសដៅបន្ដ ដែលប្រព្រឹត្តទៅនៅទីស្ដីការក្រសួងនាព្រឹកថ្ងៃទី៣០ ខែកក្ដដា នេះ។
តាមរបាយការណ៍ បានបង្ហាញថា ជារួមនៅក្នុងឆមាសទី១ឆ្នាំ ២០១២នេះ ក្នុងនាមជាសេនាធិការជូនក្រសួងការពារជាតិអគ្គនាយកដ្ឋានបានប្រមូលផ្ដុំទាំងធនធាន និងឧបករណ៍សំភារៈ មធ្យមបាយនានា ដើម្បីឆ្ពោះទៅធ្វើជាម្ចាស់ផ្ទះកិច្ចប្រជុំរដ្ឋមន្ត្រីការពារជាតិ អាស៊ាន និងកិច្ចប្រជុំពាក់ព័ន្ធឆ្នាំ ២០១២ ដែលជាភារកិច្ចប្រវត្តសាស្ត្ររបស់កងយោធពលខេមរភូមិន្ទ ។ ទន្ទឹមនឹងនេះ បានផ្ដោតការយកចិត្តទុកដាក់ស្រាវជ្រាវឯកសារតាមក្រសួង ស្ថាប័ន សារព័ត៌មានជាតិ-អន្ដរជាតិ និងតាមបណ្ដាប្រទេសនានា ដើម្បីតាក់តែងឯកសារទស្សនទាន សេចក្ដីថ្លែងការណ៍រួម ឯកសារពិចារណា សុន្ទរកថាបើក-បិទ សម្រាប់បម្រីអោយកិច្ចប្រជុំរដ្ឋមន្ត្រីការពារជាតិអាស៊ានលើកទី៦ ដំណើរការទទួលបានលទ្ធផលល្អប្រសើរ ប្រកដដោយជោគជ័យតាមវិធីគ្រោងទុក។
ឯកឧត្តម ឧត្តមសេនីយ៍ឯក ណឹម សុវត្ថិ បានវាយតម្លៃខ្ពស់ចំពោះស្នាដៃដល់ល្អប្រសើរខាងលើ ក្នុងការបម្រើផលប្រយោជន៍សង្គមជាតិ ហើយក្នុងនោះកិច្ចការរបស់អគ្គនាយកដ្ឋាននយោបាយ និងកិច្ចការបរទេសក្រសួងការពារជាតិ គឺបានដើរតួនាទីយ៉ាងសំខាន់ក្នុងការបង្កើនកិច្ចសហប្រតិបត្តិការ ក្នុងវិស័យយោធាជាមួយបណ្ដាលប្រទេសក្នុងតំបន់ និងពិភពលោក។
ឯកឧត្តម ក៏បានជម្រុញបន្ថែមដល់មន្ត្រីយោធាពាក់ព័ន្ធត្រូវខិតខំពង្រឹងសមត្ថភាពការងាររបស់ខ្លួនបន្ថែមទៀត ទាក់ទងទៅនឹងការងារនយោបាយ និងកិច្ចការបរទេសរបស់ក្រសួងការពារជាតិ កម្ពុជា ដើម្បីជាផលប្រយោជន៍រួមគ្នាអភិវឌ្ឍន៍វិស័យយោធា៕