បន្ទាយមានជ័យ: ខណ្ឌរដ្ឋបាលជលផល បានសហការជាមួយអង្គការក្រុមទ្រទ្រង់ភូមិទិវាមច្ឆាជាតិ នៅអាងត្រពាំងថ្ម ស្រុកភ្នំស្រុក ខេត្តបន្ទាយមានជ័យ នាព្រឹកថ្ងៃ៣១ ខែកក្កដា ឆ្នាំ២០១២ បានព្រលែងកូនត្រី ៣ ម៉ឺន កូនបង្កង២០ម៉ឺន ក្នុងអាងត្រពាំងថ្ម។ ពិធីជួបជុំ លែងកូនត្រី និងបង្កង ត្រូវបានធ្វើឡើង ដោយមានការចូលរួមពីលោក យឹម ឆៃលី ឧបនាយករដ្ឋមន្ត្រី ទទួលបន្ទុកអភិវឌ្ឍន៍ជនបទ លោក អ៊ុង អឿន អភិបាលខេត្តបន្ទាយមានជ័យ នាយខណ្ឌររដ្ឋបាលជលផល និងលោក ស៊ឹម សំអាត ប្រធានអង្កការក្រុមទ្រទ្រង់ភូមិ ព្រមទាំងលោក សេង គី អភិបាលស្រុកភ្នំស្រុក ចូលរួមក្នុងពិធីនោះ។
លោក សុខ សុភ័ក្ត្រ នាយខ័ណ្ឌរដ្ឋបាលជលផលបានអោយ CEN ដឹងថា ទិវាមច្ឆាជាតិនេះ មានគោលបំណងសំខាន់ ដែលបានបង្ហាញដល់ពលរដ្ឋយល់ដឹងរដ្ឋាភិបាលស៊ីវិល បានទ្រទ្រង់លើវិស័យមច្ឆាធម្មជាតិ ដើម្បីជលផល អោយពលរដ្ឋចូលរួមគ្រប់គ្រងជលផលខ្លួន។ ក្នុងនោះ ក៏បង្ហាញអោយពលរដ្ឋយល់ដឹងលើវិស័យជលផល ទុកដាក់យ៉ាងខ្លាំង ដោយធនធានជលផលកើនឡើងភាពសម្បូរឡើងវិញ ពលរដ្ឋមានជីវភាពធូរធាតាមសហគមន៍នេសាទ ដោយមានការលែងកូនត្រី ក្នុងអាងត្រពាំថ្ម អោយធនធានសំម្បូរឡើង។
លោក យឹម ឆៃលី ឧបនាយករដ្ឋមន្ត្រី ទទួលបន្ទុកអភិវឌ្ឍន៍ជនបទ បានអោយដឹងថា ការបង្កើតបរិមាណត្រីធម្មជាតិ តាមរយៈការការពារថែរក្សា និងការទប់ស្កាត់បង្ក្រាប់បទល្មើសនេសាទ និងការជំរុញពលរដ្ឋយល់ដឹងពីសារសំខាន់នៃការចិញ្ចឹមត្រីសហគមន៍ ជាលក្ខណៈគ្រួសារ និងអាជីវកម្មនៅតាមគេហដ្ឋាននាភូមិ ឃុំ និងតាមកន្លែងធ្វើការងាររបស់អង្គភាពស្ថាប័នស៊ីវិល និងកងកម្លាំងប្រដាប់អាវុធរបស់រដ្ឋ គឺពលរដ្ឋចូលរួមចំណែកគ្រប់គ្រងធនធានជលផលភាពសំបូរឡើងវិញ៕