រាជធានីភ្នំពេញ ៖ កាលពីល្ងាចថ្ងៃទី៣០ កក្កដា ឆ្នាំ២០១២ នៅសណ្ឋាគារសាន់វេ សហព័ន្ធនិយោជក និងសមាគមពាណិជ្ជកម្មកម្ពុជា ហៅកាត់ថា CAMFEBA បានសហការជាមួយអង្គភាពប្រឆាំងអំពើពុករលួយ (អ.ប.ព) រៀបចំកិច្ចពិភាក្សា និងការផ្លាស់ប្តូរយោបល់មួយលើប្រធានបទ «ការរួមចំណែករបស់វិស័យឯកជនក្នុងការលុបបំបាត់អំពើពុករលួយនៅកម្ពុជា» ក្រោមអធិបតីភាពលោក ឱម យិនទៀង ទេសរដ្ឋមន្ត្រីទទួលបន្ទុកបេសកកម្មពិសេស ទីប្រឹក្សាផ្ទាល់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានអង្គភាពប្រឆាំងអំពើពុករលួយ ។ ពិធីនេះ មានការចូលរួមពីតំណាងនិយោជក និងតំណាងសមាគមពាណិជ្ជកម្មប្រមាណជាង២០០នាក់ ។
ថ្លែងមតិស្វាគមន៍ក្នុងកម្មវិធីនេះ លោក វ៉ាន់ ស៊ូអៀង ប្រធានសហព័ន្ធនិយោជក និងសមាគមពាណិជ្ជកម្មកម្ពុជា CAMFEBA បានមានប្រសាសន៍ថា នេះគឺជាព្រឹត្តិការណ៍ប្រវត្តិសាស្ត្រ ដែល CAMFEBA បានសហការជាមួយអង្គភាពប្រឆាំងអំពើពុករលួយរៀបចំកម្មវិធីនេះឡើង ដើម្បីផ្តល់ឱកាសឱ្យវិស័យឯកជនជួបពិភាក្សា និងផ្លាស់ប្តូរយោបល់ជាមួយថ្នាក់ដឹកនាំអង្គភាពប្រឆាំងអំពើពុករលួយ អំពីដំណើរការនៃការអនុវត្តច្បាប់ប្រឆាំងអំពើពុករលួយ និងការរួមចំណែករបស់វិស័យឯកជន ។
លោក វ៉ាន់ ស៊ូអៀង បន្តទៀតថា វិស័យឯកជនចង់បានបរិយាកាសធុរកិច្ចប្រកបដោយភាពស្អាតស្អំ ពោលគឺគ្មានអំពើពុករលួយ ការស៊ីសំណូក ការបង់សេវាក្រៅផ្លូវការ ។ លោក វ៉ាន់ ស៊ូអៀង ក៏បានថ្លែងអំណរគុណយ៉ាងជ្រាលជ្រៅចំពោះវត្តមានលោក ឱម យិនទៀង ដែលបានលះបង់ពេលវេលាដ៏មានតម្លៃអញ្ជើញចូលរួមជាអធិបតី និងថ្លែងមតិសំណេះសំណាលជាមួយតំណាងសហគ្រាស-ក្រុមហ៊ុននានា ស្តីពីការអនុវត្តច្បាប់ប្រឆាំងអំពើពុករលួយនៅព្រះរាជាណាចក្រកម្ពុជា ។ លោកប្រធានសហព័ន្ធ ក៏បានថ្លែងអំណរគុណដល់សមាជិកទាំងអស់ដែលតែងតែគាំទ្រ និងចូលរួមយ៉ាងសកម្មនៅក្នុងសកម្មភាពផ្សេងៗរបស់សហព័ន្ធ ដែលជាហេតុធ្វើឱ្យសហព័ន្ធមានការរីកចម្រើនជាបន្តបន្ទាប់ ។
សូមបញ្ជាក់ផងដែរថា សហព័ន្ធនិយោជក និងសមាគមពាណិជ្ជកម្មកម្ពុជា (CAMFEBA) គឺជាសមាគមនិយោជកឯករាជ្យមួយ ដែលមានទស្សនវិស័យធ្វើឱ្យធុរកិច្ចទទួលបានជោគជ័យ និងធ្វើឱ្យប្រទេសកម្ពុជាមានភាពរុងរឿង ។ CAMFEBA ត្រូវបានបង្កើតឡើងក្នុងឆ្នាំ ២០០០ និងបានចុះបញ្ជី ព្រមទាំងទទួលស្គាល់ដោយរាជរដ្ឋាភិបាលកម្ពុជា និងអង្គការពលកម្មអន្តរជាតិ(ILO) ថា ជាសមាគមតែមួយ ដែលតំណាងឱ្យនិយោជកនៅលើវិស័យផ្សេងៗនៅក្នុងប្រទេសកម្ពុជា ។ សព្វថ្ងៃនេះ CAMFEBA តំណាងឱ្យសហគ្រាសជាង ១.០០០ក្រុមហ៊ុន រាប់បញ្ចូលទាំងសហគ្រាសមានសហជីព និងគ្មានសហជីព ។
CAMFEBA បានផ្តល់នូវសេវាកម្មយ៉ាងទូលំទូលាយទៅឱ្យសមាជិក តាមរយៈសេវាប្រឹក្សាយោបល់ បញ្ហាការងារ ការចែកចាយ ផ្សព្វផ្សាយព័ត៌មាន ការបណ្តុះបណ្តាល និងការអភិវឌ្ឍ ការតស៊ូមតិ ការផ្តល់សេវាឯកសារគតិយុត្ត ការស្រាវជ្រាវ និងបោះពុម្ពផ្សាយ ។ លើសពីនេះទៅទៀត CAMFEBA គឺជាសមាជិករបស់អង្គការនិយោជកអន្តរជាតិ (IOE) សម្ព័ន្ធនិយោជកអាសីុបា៉សីុហ្វិក (CAPE) និងសម្ព័ន្ធនិយោជកអាស៊ាន (ACE)៕