ភ្នំពេញ: ក្រុមមន្ត្រីនៃចលនាប្រជាធិបតេយ្យសង្គ្រោះជាតិ បានចេញដំណើរទៅកាន់ប្រទេសអាមេរិកហើយ កាលពីព្រឹកថ្ងៃទី៣១ ខែកក្កដា ឆ្នាំ២០១២ បំណងស្វែងរកការជួយអន្តរាគមន៍ពីអាមេរិក និងពីបណ្តាប្រទេសមួយចំនួនទៀត ដើម្បីឲ្យលោក សម រង្ស៊ី ដែលជាប់ឈ្មោះជាទណ្ឌិត បានឱកាសវិលចូលស្រុកវិញ សម្រាប់ការចូលរួមបោះឆ្នោតជ្រើសតាំងតំណាងរាស្ត្រ នៅឆ្នាំ២០១៣។
លោក សម រង្ស៊ី ប្រធានចលនាប្រជាធិបតេយ្យសង្គ្រោះជាតិ បានថ្លៃងតាមរយៈវីដេអូខនហ្វឺរិន ពីកន្លែងលាក់ខ្លួននៅក្រៅប្រទេស កាលពីថ្ងៃទី៣០ ខែកក្កដា មកថា គណៈប្រតិភូនៃចលនាប្រជាធិបតេយ្យសង្គ្រោះជាតិ ដែលលោកដឹកនាំនោះ នឹងទៅជួបមន្ត្រីនៃរដ្ឋាភិបាលអាមេរិក ទៅជួបបណ្តាប្រទេសក្នុងសហភាពអឺរ៉ុប ប្រទេសជប៉ុន និងបណ្តាប្រទេសមួយចំនួនទៀត ព្រមទាំងជួបសហគមន៍ខ្មែរនៅក្រៅប្រទេសផងដែរ ដើម្បីឲ្យមានការដាក់គំនាបមកលើរដ្ឋាភិបាលក្រុងភ្នំពេញ អនុញ្ញាតឲ្យរូបលោកមានលទ្ធភាពវិលចូលស្រុកខ្មែរវិញ ដោយមិនប្រឈមនឹងការចាប់ខ្លួនដាក់ពន្ធនាគារព្រៃស។
លោក ទិត សុធា អនុប្រធាន និងជាអ្នកនាំពាក្យនៃអង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី បានបញ្ជាក់ថា “អ្វីដែលលោក សម រង្ស៊ី អះអាងថា នៅក្នុងការដាក់សម្ពាធលើរដ្ឋាភិបាលកម្ពុជា តាមរយៈការកៀងគរពីបណ្តាប្រទេសផ្សេងៗ ខ្ញុំយល់ថា បណ្តាប្រទេសទាំងនោះ គ្មានឥទ្ធិពលណាមួយនៅក្នុងការដាក់ការគាបសង្កត់មកលើរដ្ឋាភិបាល ដែលបានគោរពត្រឹមត្រូវលើប្រព័ន្ធប្រជាធិបតេយ្យពហុបក្ស និងបានកំពុងលើកស្ទួយនីតិរដ្ឋ តាមរយៈការពង្រឹង និងអនុវត្តច្បាប់”។
លោកបន្តថា អ្វីដែលជាការទាមទាររបស់គណបក្សប្រឆាំង ជាពិសេសបុគ្គល សម រង្ស៊ី នេះ គឺហាក់បីដូចជាមិនបានដើរស្របទៅតាមឆន្ទៈប្រជាពលរដ្ឋទេ ពីព្រោះការធ្វើច្បាប់ ការអនុម័តច្បាប់ផ្សេងៗ មិនមែនធ្វើឡើងតម្រូវចិត្តបុគ្គលទេ។
ចំណែកឯលោក ជាម យៀប សមាជិកសភាមណ្ឌលព្រៃវែង នៃគណបក្សប្រជាជនកម្ពុជា បានមានប្រសាសន៍បញ្ជាក់ថា “ខ្ញុំសូមជម្រាបថា រឿងលោក សម រង្ស៊ី ចូលស្រុកវិញ ជាសិទ្ធិរបស់គាត់ ហើយបើ សម រង្ស៊ី ចិត្តសឿង ស្នេហាជាតិពិត ចូលមក អត់មានអ្នកណាឃាត់ឃាំងគាត់ទេឥឡូវនេះ ប៉ុន្តែចូលមក សម រង្ស៊ី ត្រូវគោរពអនុវត្តតាមសាលដីកា”។
សូមបញ្ជាក់ថា ក្រុមមន្ត្រីនៃចលនាប្រជាធិបតេយ្យសង្គ្រោះជាតិ ដែលចេញដំណើរពីប្រទេសកម្ពុជា ទៅស្វែងរកការជួយអន្តរាគមន៍ពីបរទេស ឲ្យលោក សម រង្ស៊ី បានចូលស្រុកវិញនោះ មានលោក កឹម សុខា អនុប្រធានចលនាប្រជាធិបតេយ្យសង្គ្រោះជាតិ លោកស្រី មួរ សុខហួរ ប្រធានលេខាធិការដ្ឋាន នៃចលនាប្រជាធិបតេយ្យសង្គ្រោះជាតិ រួមទាំងមន្ត្រីមួយចំនួនទៀត។ ក្រុមនេះទៅជួបជាមួយ លោក សម រង្ស៊ី នៅប្រទេសអាមេរិក បន្ទាប់មកនឹងបន្តដំណើរទៅកាន់បណា្តប្រទេសមួយចំនួនទៀតតាមគម្រោង៕ K
