ភ្នំពេញ: រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានក្រើនរំលឹកដល់ចាងហ្វាងការផ្សាយកាសែត ព្រឹត្តបត្រ និងទស្សនាវដ្តីទាំងអស់ ឲ្យបញ្ឈប់ការផ្សាយជាបន្ទាន់នូវរូបភាព ដែលបង្ហាញនូវអំពើហិង្សាកាចសាហាវ រូបភាពគ្រោះថ្នាក់ចរាចរណ៍ ដែលគួរឲ្យរន្ធត់ និងរូបភាពឧក្រិដ្ឋ ដោយមិនបានបិទបាំង នូវអត្តសញ្ញាណ និងមុខមាត់ជនរងគ្រោះ។
លិខិតក្រើនរំលឹករបស់រដ្ឋមន្ត្រីក្រសួងព័ត៌មាន បានធ្វើឡើង កាលពីថ្ងៃទី២៧ ខែកក្កដា ឆ្នាំ២០១២ និងត្រូវបានផ្សព្វផ្សាយដល់អ្នកកាសែត កាលពីថ្ងៃទី៣០ ខែកក្កដា ឆ្នាំ២០១២។
ក្នុងលិខិត លោក ខៀវ កាញារីទ្ធ បានលើកឡើងថា ក្រសួងព័ត៌មាន ឃើញមានអង្គភាពសារព័ត៌មានមួយចំនួនធំ បានខិតខំអនុវត្តយ៉ាងខ្ជាប់ខ្ជួននូវសេចក្តីណែនាំរបស់ក្រសួង ប៉ុន្តែនៅមានអង្គភាពសារព័ត៌មានមួយចំនួនតូច មិនបានយកចិត្តទុកដាក់ទទួលខុសត្រូវ ឲ្យបានខ្ពស់នៅតែធ្វើការផ្សព្វផ្សាយ ឬបង្ហោះតាមគេហទំព័រនូវរូបភាពទាំងនោះ ដែលមើលទៅគួរឲ្យរន្ធត់ភ័យខ្លាចប្រទេសខ្មែរ ហើយដែលទង្វើបែបនេះ វាប្រាសចាកក្រមសីលធម៌ វិជ្ជាជីវៈ និងច្បាប់ស្តីពីរបបសារព័ត៌មាន មិនតែប៉ណ្ណោះបានធ្វើឲ្យប៉ះទង្គិចផ្លូវចិត្តគ្រួសារជនរងគ្រោះ ដែលនាំឲ្យមានការតវ៉ាមកក្រសួងព័ត៌មានអំពីបញ្ហានេះ។
ក្រសួងព័ត៌មាន សូមធ្វើការក្រើនរំលឹកជាថ្មីម្តងទៀត ដល់គ្រប់អង្គភាពសារព័ត៌មានបោះពុម្ពផ្សាយ និងគេហទំព័រទាំងអស់ថា ចាប់ពីពេលនេះតទៅរាល់ការផ្សព្វផ្សាយអំពីរូបភាព បង្ហាញនូវអំពើហិង្សាកាចសាហាវ រូបភាពគ្រោះថ្នាក់ចរាចរណ៍ ដែលគួរឲ្យរន្ធត់ និងរូបភាពឧក្រិដ្ឋ ដោយមិនបានបិទបាំងនូវអត្តសញ្ញាណមុខមាត់ជនរងគ្រោះ ត្រូវតែបញ្ឈប់នូវការដាក់រូបភាពទាំងនោះ នៅលើទំព័រសារព័ត៌មាន និងគេហទំព័ររបស់ខ្លួន។
លោក ខៀវ កាញារីទ្ធ បានគូសបញ្ជាក់ថា លោកមានការសោកស្តាយ ដែលអ្នកកាសែតរបស់យើងចំពោះការផ្សាយរូបភាពកាចសាហាវរន្ធត់ ដោយមិនមានការបិទបាំង។ អ្នកកាសែតបានដឹងហើយ អំពីវិជ្ជាជីវៈ និងក្រមសីលធម៌អ្នកសារព័ត៌មាន។ ប៉ុន្តែលោកគិតថា អ្នកដែលចុះផ្សាយរូបភាពបែបនេះ ប្រហែលជា គាត់មិនដែលបានរៀន ឬក៏ធ្វើជាមិនដឹង មិនឮចំពោះបញ្ហានេះ។ នេះក៏ជាកំហុសមួយ ដែលនគរបាលរបស់យើង បានបញ្ជូនរូបភាពទៅឲ្យអ្នកកាសែត ដើម្បីចុះផ្សាយ។ សំខាន់ គឺមិនត្រូវបញ្ជូនរូបឲ្យទេ។
លោករដ្ឋមន្ត្រី ខៀវ កាញារីទ្ធ បានកត់សម្គាល់ថា "នេះក៏ជាបញ្ហាមួយ ដែលទាក់ទងទៅនឹងក្រមសីលធម៌ធំណាស់ វាហាក់បីដូចជាអ្នកកាសែតខ្មែរយើង មិនបានស្គាល់តម្លៃអំពីមនុស្សធម៌ មិនបានស្គាល់អ្វីជាភាពថ្លៃថ្នូរ និងមិនបានស្គាល់ពីវីជ្ជាជីវៈរបស់ខ្លួន។ ដូច្នេះសូមឲ្យសមាគមអ្នកសារព័ត៌មានទាំងអស់ ពិចារណាឡើងវិញ ហើយក្រុមប្រឹក្សាវិន័យ ត្រូវគិតអំពីបញ្ហានេះ"។
សូមរម្លឹកថា កាលពីថ្ងៃទី២១ ខែកុម្ភៈ ឆ្នាំ២០១២ ក្រសួងព័ត៌មាន បានចេញលិខិតណែនាំម្តងរួចហើយ ទៅដល់បណ្តាអង្គភាពប្រព័ន្ធផ្សព្វផ្សាយទាំងអស់ ឲ្យបញ្ឈប់ការផ្សព្វផ្សាយរូបភាពគ្រោះថ្នាក់ចរារណ៍ ដែលគួរឲ្យរន្ធត់ និងរូបភាពឧក្រិដ្ឋ នៃអំពើហិង្សាលលើស្ត្រី និងកុមារ ដោយមិនបានបបិទបាំងនូវអត្តសញ្ញាណមុខមាត់របស់ជនរងគ្រោះ។ ប៉ុន្តែមកដល់ពេលនេះ នៅតែមានអង្គភាពសារព័ត៌មានមួយចំនួន នៅបន្តការបោះពុម្ពផ្សាយដដែល។ នេះបើតាមការកត់សម្គាល់របស់ក្រសួងព័ត៌មាន៕