ឧត្ដរមានជ័យ: ស្រះទឹកមួយកន្លែង ដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន និងលោកជំទាវកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន បានផ្ដល់ជូនប្រជាពលរដ្ឋភូមិគោកតាមោក ឃុំលំទង ស្រុកត្រញំងប្រាសាទ ខេត្ដឧត្ដរមានជ័យ តាមរយៈក្រុមយុវជនស្ម័គ្រចិត្ដរបស់សម្ដេចតេជោ ហ៊ុន សែន បានកសាងរួចរាល់ជាស្ថាពរហើយ។ នេះគឺតាមការបញ្ជាក់ឱ្យដឹងពីលោក ខេង សុមេធ អនុប្រធានក្រុមការងារថ្នាក់កណ្ដាលរបស់ក្រុមគណបក្សប្រជាជនកម្ពុជា ចុះជួយខេត្ដឧត្ដរមានជ័យ កាលពីថ្ងៃទី៣១ ខែកក្កដា ឆ្នាំ២០១២។
លោក ខេង សុមេធ តំណាងឱ្យលោក គន់ គីម សមាជិកអចិន្ដ្រៃយ៍គណកម្មាធិការកណ្ដាល និងជាប្រធានក្រុមការងារថ្នាក់កណ្ដាលគណបក្សប្រជាជនកម្ពុជា ចុះជួយខេត្ដឧត្ដរមានជ័យ នាថ្ងៃទី៣១កក្កដា បានចុះទៅពិនិត្យដល់ទីតាំងស្រះខាងលើ ដោយលោកគូសបញ្ជាក់ថា ស្រះនេះ បានកសាងរួចរាល់ជាស្ថាពរ កាលពីថ្ងៃទី៣០ ខែកក្កដាកន្លងទៅនេះ។
លោក ខេង សុមេធ បានមានប្រសាសន៍ឱ្យដឹងថា ស្រះទឹកខាងលើ ត្រូវបានកសាងឡើងដោយកងវិស្វកម្មតេជោ ហ៊ុន សែន សៀមរាប កាលពីថ្ងៃទី២៥ ខែកក្កដា ឆ្នាំ២០១២ កន្លងទៅ ដោយមានទំហំ ៤០ ម៉ែត្រ គុណ ៥០ ម៉ែត្រ និងមានជំរៅ ៤ ម៉ែត្រ។ ស្រះទឹកខាងលើ បានជីកយ៉ាងស្អាត និងមានមាត់ស្រះ លើកកម្ពស់យ៉ាងមានរបៀបរៀបរយថែមទៀតផង។
លោក ខេង សុមេធ រំលឹកថា ស្រះទឹកនេះត្រូវបានសម្ដេចតេជោ ហ៊ុន សែន ផ្ដល់ជូនប្រជាពលរដ្ឋរស់នៅភូមិគោកតាមោក ឃុំលំទង ស្រុកអន្លង់វែង តាមរយៈក្រុមយុវជនស្ម័គ្រចិត្ដសម្ដេចតេជោ ដែលកំពុងវាស់វែងដីធ្លីជូនប្រជាពលរដ្ឋ នៅចំណុចខាងលើ កាលពីពេលថ្មីៗកន្លងទៅនេះ រួមទាំងមានផ្លូវ ២៥ គីឡូម៉ែត្រ និងអាគារសិក្សាចំនួន ៤ខ្នងថែមទៀត។
លោកបាននិយាយថា ស្រះទឹកដែលជីករួចនោះ នឹងត្រូវបង្ហូរទឹកភ្លៀង ចូលចាប់ពីពេលនេះតទៅ ដើម្បីឱ្យប្រជាពលរដ្ឋ បានប្រើប្រាស់ទឹកនៅរដូវវស្សានេះតទៅ ព្រោះថានៅភូមិរបស់គាត់មុននេះ មិនមានស្រះទឹកសំរាប់ប្រើប្រាស់ឡើយ។ ការប្រើប្រាស់ទឹកប្រចាំថ្ងៃរបស់ប្រជាពលរដ្ឋ នាពេលកន្លងមក គឺអាស្រ័យដោយការដើរដងរែក ពីតាមជ្រលងដងអូរតែប៉ុណ្ណោះ។
លោក សុមេធ បាននិយាយថា ចាប់ពីពេលនេះតទៅ ប្រជាពលរដ្ឋនៅក្នុងភូមិ នឹងលែងចោទជាបញ្ហាខ្វះខាតទឹក ប្រើប្រាស់តទៅទៀតហើយ។ ស្រះទឹកដ៏ធំមួយនេះ ប្រជាជនក្នុងភូមិគោកតាមោក មិនអាចប្រើប្រាស់អស់ឡើយ ព្រោះថាស្រះទឹកនេះ វាផ្ដល់ឱ្យប្រជាពលរដ្ឋងាយស្រួល និងលែងពិបាកទៅដើររែកពន់ទឹកនៅតំបន់ផ្សេងៗ មកប្រើប្រាស់ទៀតឡើយ។
លោកអនុប្រធានក្រុមការងារថ្នាក់កណ្ដាល ចុះជួយខេត្ដឧត្ដរមានជ័យ បាននិយាយឱ្យដឹងទៀតថា ទំនប់ព័ទ្ធជុំវិញ ស្រះដែលលើកកម្ពស់យ៉ាងល្អនោះ លោកក៏ស្នើឱ្យប្រជាជនរៀបចំដាំស្មៅ និងដាំដើមឈើ នៅជុំវិញស្រះ ដើម្បីធ្វើឱ្យសោភណភាពពណ៌បៃតង និងទទួលបាននូវបរិស្ថានល្អតទៅថ្ងៃអនាគត៕