ភ្នំពេញ: សមត្ថកិច្ចខណ្ឌដង្កោ បានចុះទៅចាប់ខ្លួនជនសង្ស័យប្រដាប់ដោយអាវុធខ្លីម៉ាកកា ៥៤ និងអាកា ៤៧ ចំនួន ៥ នាក់ ព្រមទាំងស្ត្រីម្នាក់ បន្ទាប់ពីក្រុមជនសង្ស័យទាំង ៦ នាក់នោះ បានជួលម៉ូតូឌុបម្នាក់ ពីស្រុកអង្គស្នួល មកជើងឯក ហើយល្បួងយុវជនម្ចាស់ម៉ូតូ ឲ្យប្រើប្រាស់ថ្នាំញៀន រួចភ្ជង់ប្លន់យកម៉ូតូមួយគ្រឿង។ តែដោយសារជនរងគ្រោះ ស្រែកឆោឡោឡើង ទើបផ្អើលដល់អ្នកជិតខាង ហើយប៉ូលិសចុះ ទៅចាប់ខ្លួនក្រុមចោរប្លន់ បានភ្លាមៗ។
ហេតុការណ៍ប្លន់ខាងលើនោះ បានកើតឡើងកាលពីវេលាម៉ោង ១៥ និង ១០ នាទី រសៀល ថ្ងៃទី៣០ ខែកក្កដា ឆ្នាំ២០១២ នៅភូមិជើងឯក សង្កាត់ជើងឯក ខណ្ឌដង្កោ រាជធានីភ្នំពេញ។
ជនរងគ្រោះ មានឈ្មោះ វុន ថាន់ណូ ភេទប្រុស អាយុ ១៨ឆ្នាំ រស់នៅភូមិជើងឯក សង្កាត់ជើងឯក ខណ្ឌដង្កោ ជិះម៉ូតូម៉ាកហុងដាសេ១២៥ ពណ៌ខ្មៅ ពាក់ស្លាកលេខភ្នំពេញ 1BA-5306។
ជនរងគ្រោះ បាននិយាយថា រូបគេបានដឹកបក្ខពួកចោរ ពីស្រុកអង្គស្នួលមកភូមិកើតហេតុខាងលើ ពេលដល់ក្រុមចោរ បានចូលផ្ទះបក្ខពួកគេ នៅជើងឯកនេះ ហើយបានល្បួងរូបគេ ឲ្យមកផឹកស៊ី។ នៅពេលកំពុងផឹកស៊ី ជនល្មើសបង្ខំឲ្យប្រើប្រាស់ថ្នាំញៀន និងបានភ្ជង់គំរាម ក្នុងបំណងប្លន់ម៉ូតូជនរងគ្រោះ តែដោយសារជនរងគ្រោះ មិនព្រមធ្វើតាម ក៏ស្រែកឆោឡោឡើង ភ្ញាក់ផ្អើលដល់អ្នកជិតខាង ទើបសមត្ថកិច្ចចុះទៅឃាត់ខ្លួនបានក្រុមចោរទាំងអស់តែម្តង។
ជនសង្ស័យ ដែលចាប់ខ្លួននោះ មានទី១. ឈ្មោះ យ៉ាន ដារាំង ភេទប្រុស អាយុ ១៨ឆ្នាំ ទី២. ឈ្មោះ សុខ ដានិត ភេទប្រុស អាយុ ១៧ឆ្នាំ។ ទាំង ២នាក់ រស់នៅភូមិកើតហេតុខាងលើ។ ទី៣. ឈ្មោះ ឡេង ចាន់ថន ភេទប្រុស អាយុ ២៣ឆ្នាំ ទី៤. ឈ្មោះ ធា សុខណាក់ ភេទប្រុស អាយុ ១៩ឆ្នាំ រស់នៅសង្កាត់ចោមចៅ ខណ្ឌពោធិ៍សែនជ័យ និង ទី៥ . ឈ្មោះ សុខ កុយ ភេទប្រុស អាយុ ៣៣ឆ្នាំ នៅសង្កាត់ដង្កោ ខណ្ឌដង្កោ។ ចំណែកស្ត្រីម្នាក់ទៀត នៅពុំទាន់ស្គាល់អត្តសញ្ញាណ។
ប៉ូលិស បានដកហូតកាំភ្លើងអាកា ៤៧ មួយដើម និងកាំភ្លើងខ្លីម៉ាកកា៥៤ មួយដើម៕