ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានបញ្ជាក់យ៉ាងច្បាស់ ថាសម្ដេចបានត្រៀមខ្លួនរួចជាស្រេចក្នុងនាមជាប្រមុខដឹកនាំរាជរដ្ឋាភិបាលក្នុងការបកស្រាយនៅរដ្ឋសភាជាតិអំពីបញ្ហាព្រំដែន។
សម្ដេចតេជោ បានថ្លែងយ៉ាងដូច្នេះកាលពីព្រឹកថ្ងៃទី១ ខែសីហា ឆ្នាំ២០១២នៅក្នុងពិធីចែកសញ្ញាបត្រនៅវិទ្យាស្ថានជាតិអប់រំ។ សម្ដេចតេជោ បញ្ជាក់ទៀតថាសម្ដេចបានផ្ញើលិខិតឆ្លើយតបទៅរដ្ឋសភាជាតិដើម្បីដាក់កាលបរិច្ឆេទប្រជុំសភាពេញអង្គរួចហើយ ដោយរង់ចាំតែការកំណត់ពេលវេលាប្រជុំពីរដ្ឋសភាប៉ុណ្ណោះ ហើយសម្ដេចក៏ត្រៀមឆ្លើយតបអំពីបញ្ហាព្រំដែនឲ្យបានច្បាស់លាស់ជូនមតិសាធារណៈឲ្យបានដឹងផងដែរ ដែលការបកស្រាយនោះអាចប្រើរយៈពេលតាមការប៉ាន់ស្មានប្រហែលជា៤ម៉ោងឯណោះ។ សម្ដេចតេជោ ក៏បានស្នើដល់ប្រព័ន្ធផ្សព្វផ្សាយជាពិសេសស្ថានីយទូរទស្សន៍ទាំងអស់ប្រសិនបើអាចផ្សាយផ្ទាល់ពីកិច្ចប្រជុំសភាពេញអង្គដែលសម្ដេចបកស្រាយអំពីបញ្ហាព្រំដែនរវាងប្រទេសជិតខាងបាន ក៏កាន់តែប្រសើរ៕