ភ្នំពេញ ៖ ក្រសួងធនធានទឹកនិងក្រសួងកសិកម្មបានធ្វើលិខិតឆ្លើយតបទៅវិញទៅមកដាក់គ្នាចំពោះការអនុវត្តន៍លើសកម្មភាពដាក់គ្រឿងចក្រជីកប្រឡាយប្រវែង២គីឡូម៉ែត្រនៅភូមិកាច់រទេះឃុំកំពង់ព្រៀង ស្រុកសង្កែ ខេត្តបាត់ដំបង ដោយក្រសួងកសិកម្មបានផ្ញើលិខិតមួយច្បាប់ស្ដីពីសកម្មភាពនៃការផ្អាកដំណើរការជីកប្រឡាយ ប៉ុន្តែក្រសួងធនធានទឹកក៏បានធ្វើលិខិតឆ្លើយតបភ្លាមៗផងដែរអំពីមូលហេតុការជីកប្រឡាយដើម្បីបំរើផលប្រយោជន៍ប្រជាពលរដ្ឋ។
លោក លឹម គានហោ រដ្ឋមន្ត្រីក្រសួងធនធានទឹកនិងឧតុនិយមបានផ្ញើលិខិតមួយច្បាប់ចុះថ្ងៃទី៣០ខែកក្កដាឆ្នាំ២០១២ទៅលោក ច័ន្ទ សារុន រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទដើម្បីបញ្ជាក់ពីសកម្មភាពនៃការជីកប្រឡាយនោះថា ១-ការផ្អាកសកម្មភាពគ្រឿងចក្រទាំងនេះបានធ្វើឡើងតាំងពីថ្ងៃទី២៥ខែកក្កដាឆ្នាំ២០១២វេលាម៉ោងប្រមាណ៣រសៀលមកម្ល៉េះ។
២-រឿងនេះមិនមែនជារឿងអី្វដែលមានលក្ខណៈធំដុំទាល់តែសោះ។ ឯកឧត្ដមរដ្ឋមន្ត្រីអាចទូរស័ព្ទសួរនាំបាន បើឯកឧត្ដមមានស្មារតីសហការរួមក្នុងនាមសមាជិករាជរដ្ឋាភិបាលដូចគ្នា ហើយដែលស្ថិតក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាតែមួយនោះ។
៣-អ្វីដែលជាការអនុវត្តន៍របស់មន្ទីរក្រោមឱវាទ គឺយោងលើសំណើររបស់ប្រជាពលរដ្ឋ ដោយមានការឯកភាពពីគ្រប់លំដាប់ថ្នាក់ នៃមូលដ្ឋានទើប លោក លឹម គានហោ រដ្ឋមន្ត្រីក្រសួងធនធានទឹកនិងឧតុនិយម សំរេចធ្វើការស្ដារប្រឡាយដើម្បីបំរើផលប្រយោជន៍ប្រជាជននៅទីនោះ។ ប្រឡាយដែលស្នើសុំនិងបានធ្វើកន្លងមកនេះ គឺស្ថិតនៅក្នុងគំរោងអភិវឌ្ឍន៍កង្ហត ជំហាន២ របស់រាជរដ្ឋាភិបាលដែលបានសំរេចកន្លងមក ហើយជំហាន២នៃគំរោងនេះនឹងឈានទៅដល់ចំណុចគោលដៅនាពេលអនាគតដ៏ខ្លីខាងមុខ។ តែដោយសារគណៈពង្រឹងមូលដ្ឋាន និងប្រជាពលរដ្ឋនៅទីនោះទទូចចង់បានដោយសុខចិត្តម្ចាស់ការដោះស្រាយប្រេងទើបមន្ទីរបានបញ្ជូនគ្រឿងចក្រយកទៅជួយព្រោះការងារនេះវាធ្វើអោយចំណេញដល់ផែនការអនុត្តរភាពធារាសាស្ត្ររបស់រាជរដ្ឋាភិបាលថែមទៀត។
ការប្រែប្រួលយ៉ាងណានោះគឺអាស្រ័យលើបច្ចេកទេសជាក់ស្ដែង ឬមួយលោករដ្ឋមន្ត្រីយល់ឃើញថាអោយតែប្រឡាយចាស់ដែលធ្វើកន្លងមកសុទ្ធតែត្រឹមត្រូវទាំងអស់។
លោក លឹម គានហោ រដ្ឋមន្ត្រីក្រសួងធនធានទឹកនិងឧតុនិយមបានថ្លែងទៀតថាអ្វីដែលមន្ត្រីក្រោមឱវាទរបស់ឯកឧត្ដមបានធ្វើសកម្មភាពកន្លងមកវាមានលក្ខណៈធ្ងន់ធ្ងរមិនអាចអធ្យាស្រ័យបានព្រោះថា បើពិនិត្យលើលិខិតបេសកកម្មដែលចុះហត្ថលេខាដោយលោករដ្ឋមន្ត្រីគឺចុះពិនិត្យបទល្មើសជលផល តែធាតុពិតបែរទៅជាធ្វើការខុសទិសដៅទៅវិញ។ត្រង់នេះសបញ្ជាក់អោយឃើញថាពួកគេឥតបានគោរពនូវបទបញ្ជារបស់ឯកឧត្ដមនោះទេ នោះមិនចាំបាច់និយាយដល់រូបខ្ញុំដែលជាប្រធានស្ថាប័នផ្សេងទៀតផង ឬមួយលិខិតបេសកកម្មនេះប្រើប្រាស់បានគ្រប់រឿង និងគ្រប់ទីកន្លែងទាំងអស់? បើពិនិត្យលើច្បាប់តាមក្រមព្រហ្មទណ្ឌមាត្រា៦០៩នោះគឺជាបទជ្រៀតជ្រែកដោយខុសច្បាប់ទៅក្នុងការបំពេញមុខងារសាធារណៈ។
លិខិតឆ្លើយឆ្លងគ្នារវាងរដ្ឋមន្ត្រីនៃក្រសួងទាំង២អំពីបញ្ហាការជីកប្រឡាយទឹកបំរើដល់ផលប្រយោជន៍ប្រជាពលរដ្ឋដែលទង្វើនេះទោះជាក្នុងលក្ខខ័ណ្ឌបែបណាក៏ក្រសួងទាំង២(ក្រសួងធនធានទឹក និងក្រសួងកសិកម្ម)បានរួមគ្នាក្នុងការជួយប្រជាពលរដ្ឋដោយពិតប្រាកដ៕