ភ្នំពេញ: មន្ត្រីជាន់ខ្ពស់់រដ្ឋាភិបាលបានសម្លឹងឃើញការបង្កើតសហគមន៍អាស៊ាន ជាឱកាសមួយសម្រាប់កម្ពុជា ទាំងលើទិដ្ឋភាពធនធានមនុស្ស និងការអភិវឌ្ឍសេដ្ឋកិច្ច បើទោះបីជាវានឹងអាចនាំមកនូវបញ្ហាប្រឈមខ្លះក្តី។
នៅក្នុងកិច្ចប្រជុំមួយដែលរៀបរំដោយក្លឹបអ្នកកាសែតកម្ពុជា សហការជាមួយមូលនិធិខុនរ៉ាដអាដេណៅអ៊ែរ អាល្លឺម៉ង់ លោក សុខ ស៊ីផាន់ណា ទីប្រឹក្សាក្រសួងការបរទេស បាននិយាយថា យើងគួរតែមានសង្ឃឹមអំពីការចូលទៅក្នុងទីផ្សារអាស៊ានរួមមួយ ដែលនឹងលេចឡើងក្រោយពីការបង្កើតសហគមន៍សេដ្ឋកិច្ចអាស៊ាន ឆ្នាំ២០១៥។
លោកបានពន្យល់ថា កម្ពុជាដែលមានត្រឹមទីផ្សារមនុស្សជាង ១៤លាននាក់ នឹងត្រូវសម្លឹងឃើញក្នុងរូបភាពមួយដែលទូលំទូលាយជាងនេះ ពោលគឺជាទីផ្សារអាស៊ានមួយដែលមានមនុស្សជាង ៦០០លាននាក់។ លោកគិតថា ខណៈដែលកម្ពុជាមានកម្លាំងពលកម្មថោក ការវិនិយោគអាចនឹងមានលំហូរចូលមកកម្ពុជា ហើយការផលិតទំនិញនឹងអាចសម្រាប់ទីផ្សារអាស៊ានទាំងមូល ជាជាងការសម្លឹងឃើញទីផ្សារត្រឹមប្រទេសកម្ពុជា។
លោកពន្យល់ទៀតថា ចំណែកជំនាញ ក៏នឹងហូរចូលផងដែរជាមួយនឹងទីផ្សារបើកទូលាយនេះ ដោយតម្រូវឲ្យមានការប្រឹងប្រែងពីសំណាក់ប្រជាជនកម្ពុជា នៅក្នុងជំនាញផ្សេងៗ ដែលនឹងហូរចូលកម្ពុជា។ នេះជាឱកាសមួយសម្រាប់ការផ្លាស់ប្តូរចំណេះដឹង ហើយវានឹងតម្រូវឲ្យមានការប្រឹងប្រែង។
លោកបានលើកឡើងពីភាពចាំបាច់ដែលត្រូវពង្រឹងស្តង់ដារមួយនៅកម្ពុជា ដើម្បីឲ្យក្លាយទៅជាស្តង់ដារតំបន់លើ នៃវិស័យផ្សេងៗដូចជាសំណង់ គណនេយ្យ និងពេទ្យជាដើម៕
