ដោយ ៖ វណ្ណៈ
ខេត្តកំពង់ចាម ៖ ដោយអនុវត្តន៍តាមការណែនាំពីលោក ហ៊ុន ណេង អភិបាលខេត្តកំពង់ចាម និងលោកឧត្ដមសេនីយ៍ត្រី ឆាយ គឹមសុន ស្នងការនគរបាលខេត្តកំពង់ចាម នៅព្រឹកថ្ងៃទី២២ ខែសីហា ឆ្នាំ២០១២ ស្ថិតនៅក្នុងវត្តស្លែង ឃុំខ្វិត ស្រុកព្រៃឈរ លោកវរសេនីយ៍ឯក ជឹម សេងហុងស្នងការរងទទួលផែនការកណ្ដាលយុត្តិធម៌ បានរៀបចំប្រជុំផ្សព្វផ្សាយច្បាប់ និងផលប៉ះពាល់បណ្ដាលមកពីគ្រឿងញៀន ដោយមានការចូលរួមពីលោក មិន សុផានិត អភិបាលរងស្រុកព្រៃឈរ និងលោក សោម រស់ នាយការិយាល័យប្រឆាំងគ្រឿញៀនប្រចាំខេត្ត កងកំលាំងប្រដាប់អាវុធទាំង ៣ប្រភេទ មន្ត្រីរាជការជុំវិញសាលាស្រុក មណ្ឌលសុខភាព មេឃុំ ក្រុមប្រឹក្សាឃុំ មេភូមិ និងម្ចាស់អាជីវករ ផ្ទះសំណាក់ KARAOE អាជីវករលក់មាសប្ដូរប្រាក់ និងប្រជាពលរដ្ឋសរុប២៥៧នាក់ ។
លោកវរសេនីយ៍ឯក ជឹម សេងហុង បានលើកឡើងអំពីការអនុវត្តគោលនយោបាយភូមិ ឃុំ មានសុវត្ថិភាព លុបបំបាត់អំពើលួចឆក់ប្លន់ អំពើហឹង្សា ក្មេងទំនើង ពេស្យាចារ ការបញ្ចាំងវីដីអូរអាសអាភាស ល្បែងស៊ីសងគ្រប់ប្រភេទ ការចែកចាយសេព្វគ្រឿងញៀនដែល ទាមទាឲ្យមានការសហការផ្ដល់ពត៍មានពីប្រជាពលរដ្ឋដើម្បីឲ្យសមត្ថកិច្ចមានវិធានការ។ លោកស្នងការរងក៍បានបង្ហាញអំពីអត្តសញ្ញាណ អាកប្បកិរិយាអ្នកប្រើប្រាស់គ្រឿងញៀនស្វែងយល់ពីសំណល់ផ្សេងៗ ក្រោយពីអ្នកប្រើប្រាស់គ្រឿងញៀនបន្សល់ទុក ដើម្បីមានមូលដ្ឋានរាយការណ៍ ជូនសមត្ថកិច្ច ។ ត្រូវរួមគ្នាការពារកន្លែងកើតហេតុ ករណីមានបទល្មើសព្រហ្មទណ្ឌកើតឡើង ដើម្បីបង្កលក្ខណៈឲ្យមន្ត្រីបច្ចេកទេសវិទ្យាសាស្ត្រមានលទ្ធភាពប្រម៉ែប្រមូលវត្ថុតាងដើម្បីស្រាវជ្រាវរកជនល្មើសមកផ្ដន្ទាទោស ។ លោកវរសេនីយ៍ឯក ជឹម សេងហុង ក៍បានឲ្យដឹងដែរថា យើងទាំងអស់គ្នាជាមន្ត្រីរាជការ និងប្រជាពលរដ្ឋ មិនបានចូលរួមយល់ដឹង និងទប់ស្កាត់បទល្មើសគ្រឿងញៀននោះទេ អនាគតកូនចៅ និងប្រទេសជាតិទាំងមូលនឹងបាត់បង់ធនធានមនុស្ស ដែលបង្កឲ្យមានការប៉ះពាល់យ៉ាងធ្ងន់ធ្ងរ ដល់ការអភិវឌ្ឍន៍ប្រទេសជាតិមាតុភូមិ ។ ដូចនេះហើយទើបរាជរដ្ឋាភិបាលបានយកចិត្តទុកដាក់ទប់ស្កាត់ បង្ក្រាបរាល់អំពើផលិត ការជួញដូរចែកចាយ និងសេពគ្រឿងញៀន ។
ដោយឡែកនៅខេត្តកំពង់ចាម លោកឧត្ដមសេនីយ៍ ឆាយ គឹមសុន ស្នងការខេត្ត តែងជួយឧបត្ថមជាថវិកាដល់ក្រុមការងារ ដែលបានបង្ក្រាបការជួញដូរ និងចែកចាយគ្រឿងញៀនជាបន្តរបន្ទាប់ផងដែរ៕
