កំពង់ចាម: គណៈកម្មាធិការអាហារូបករណ៍អាស៊ាន ដែលមានលោកបណ្ឌិត ឡី សុភាព ជាប្រធាន បានផ្តល់អាហារូបករណ៍ចំនួន ៥.០០០ នាក់ ដល់និស្សិតក្រីក្ររបស់ប្រទេសកម្ពុជា។ ក្នុងនោះមានចំនួន ១.០០០ នាក់ បានផ្តល់ឲ្យនិស្សិតខេត្តកំពង់ចាម តាមការស្នើសុំពីលោក ហ៊ុន ណេង ជាអភិបាលខេត្តកំពង់ចាម សម្រាប់ឆ្នាំសិក្សា ២០១២-២០១៣។
លោកបណ្ឌិត ឡី សុភាព បានប្រកាសបែបនេះ នៅក្នុងពិធីជួបជុំមួយ កាលពីថ្ងៃទី១៩ ខែសីហា ឆ្នាំ២០១២ នាសណ្ឋាគារ ភ្នំប្រុស ក្រុងកំពង់ចាម ដែលមានការចូលរួមពីលោកបណ្ឌិត ជា ចំរើន អ្នកតំណាងរាស្ត្រមណ្ឌលខេត្តកណ្តាល និងជាសកលវិទ្យាធិការ នៃសកលវិទ្យាល័យចំរើនពហុបច្ចេកវិទ្យា មន្ត្រីមន្ទីរអប់រំយុវជន និងកីឡាខេត្តកំពង់ចាម និងសិស្សានុសិស្ស ក្នុងក្រុងកំពង់ចាមប្រមាណជាង ៤០០ នាក់ ដើម្បីប្រកាសផ្តល់អាហារូបករណ៍ចំនួន ១.០០០ នាក់ ឲ្យដល់និស្សិតក្រីក្រក្នុងខេត្តកំពង់ចាម។
លោកបណ្ឌិតប្រធានគណៈកម្មាធិការអាហារូបករណ៍អាស៊ាន បានថ្លែងថា ក្នុងឆ្នាំសិក្សា ២០១២-២០១៣ គណៈកម្មាធិការអាហារូបករណ៍អាស៊ាន បានសម្រេចផ្តល់ឲ្យនិស្សិតក្រីក្រកម្ពុជាចំនួន ៥.០០០ នាក់ បានទទួលបានការសិក្សារយៈពេលបួនឆ្នាំ នូវអាហារូបករណ៍មួយរយភាគរយ។ ក្នុងនោះផ្តល់ដល់និស្សិតខេត្តកំពង់ចាម ចំនួន ១.០០០ នាក់ តាមការស្នើសុំរបស់លោក ហ៊ុន ណេង។ នេះគឺជាការចូលរួមចំណែក ក្នុងការកាត់បន្ថយភាពក្រីក្រស្របតាមយុទ្ធសាស្ត្រចតុកោណរបស់រាជរដ្ឋភិបាល ពិសេសជាការបង្ហាញមុខមាត់ថ្មីមួយក្នុងនាមប្រទេសកម្ពុជាជាប្រធានអាស៊ាន៕
