ខេត្ដកំពង់ចាម ៖ មន្ដ្រីក្រុមប្រឹក្សាឃុំរបស់គណបក្សសម រង្ស៊ី ម្នាក់ក្នុងឃុំជាំក្រវៀន ស្រុកមេមត់ ខេត្ដកំពង់ចាម ត្រូវសមត្ថកិច្ចចាប់ឃាត់ខ្លួនកាលពីល្ងាចថ្ងៃទី២១ ខែសីហា ឆ្នាំ២០១២ នៅក្នុងភូមិជ្រៃឡើង ឃុំជាំក្រវៀន ស្រុកមេមត់ បន្ទាប់ពីប្រើអំពើហិង្សាវាយដំទៅលើជនរងគ្រោះម្នាក់បណ្ដាលឱ្យរងរបួសធ្ងន់ ដោយសារតែមានជម្លោះបន្ដិចបន្ដួចក្នុងពេលលេងបាល់ទះជាមួយគ្នា ។
លោក ចាន់ ហោ នាយរងការិយាល័យកណ្ដាលយុត្ដិធម៌នៃស្នងការដ្ឋាននគរបាល ខេត្ដកំពង់ចាម បានឱ្យដឹងថា ជនរងគ្រោះ ក្នុងហេតុការណ៍ខាងលើមានឈ្មោះ ប៊ុន ម៉ៅ ភេទប្រុស អាយុ២៦ឆ្នាំ រស់ក្នុងភូមិ -ឃុំកើតហេតុខាងលើ ចំណែកជនដៃដល់ ១-ឈ្មោះម៉ក់ សំអាន ភេទប្រុស អាយុ៣៣ ឆ្នាំ ជាមន្ដ្រីក្រុមប្រឹក្សាឃុំជាំក្រវៀន មកពី គណបក្សសម រង្ស៊ី និង២-ឈ្មោះគូ សាយ ហៅ គល់ស្វាយ ភេទប្រុស អាយុ២៥ឆ្នាំ អ្នកទាំង២ជាបងប្អូននឹងគ្នា រស់នៅក្នុង ភូមិ-ឃុំកើតហេតុជាមួយជនរងគ្រោះ ។
ប្រភពព័ត៌មានពីប្រជាពលរដ្ឋនៅ កន្លែងកើតហេតុបានឱ្យដឹងថា ក្រុមជន ល្មើសមានគំនុំជាមួយជនរងគ្រោះ ពីព្រោះ តែជនរងគ្រោះបានយកប្រពន្ធជនល្មើស ដែលទើបតែលែងលះគ្នា ហេតុនេះហើយ រវាងជនល្មើសនិងជនរងគ្រោះតែងតែ ផ្លែផ្កាឌឺដងដាក់គ្នាជារឿយៗ ។ ប្រភព ដដែលឱ្យដឹងទៀតថា មុនពេលកើតហេតុ គេឃើញជនដៃដល់និងជនរងគ្រោះនៅ នឹងកន្លែងលេងបាល់ទះជាមួយគ្នា លុះបន្ដិចក្រោយមក ពួកគេក៏បានទាស់ពាក្យសំដី ផ្លែផ្កាដាក់គ្នារហូតឈានទៅដល់ការ ឈ្លោះប្រកែកយ៉ាងខ្លាំង ។
ប្រភពដដែលឱ្យដឹងទៀតថា បន្ទាប់ពីឈ្លោះប្រកែក ជនសង្ស័យដែលមានគ្នា២នាក់ បានធ្វើសកម្មភាពវាយទៅលើជន រងគ្រោះ ដោយម្នាក់ជាអ្នកចាប់ និងម្នាក់ យកឈើជ្រុងវាយបណ្ដាលឱ្យរងរបួសក្បាល ខាងក្រោយផ្នែកខាងស្ដាំជាទម្ងន់ ។ បន្ទាប់ ពីធ្វើសកម្មភាពវាយដំទៅលើជនរងគ្រោះ ជនដៃដល់ឈ្មោះ គល់ ស្វាយ បានរត់គេច ខ្លួនបាត់ ចំណែកជនដៃដល់ម្នាក់ទៀតឈ្មោះ ម៉ក់ សំអាន ជាមន្ដ្រីក្រុមប្រឹក្សាឃុំជាំក្រវៀន មិនបានរត់ទៅណានោះទេ ហើយត្រូវសមត្ថកិច្ចចាប់ខ្លួនបញ្ជូនមកអធិការដ្ឋានស្រុកមេមត់ និងបញ្ជូនបន្ដមកកាន់ស្នងការ ដ្ឋាននគរបាលខេត្ដនៅល្ងាចថ្ងៃទី២២ខែ សីហាឆ្នាំ២០១២នេះ ។
លោក ចាន់ ហោ នាយរងការិយាល័យ កណ្ដាលយុត្ដិធម៌នៃស្នងការដ្ឋាននគរបាល ខេត្ដបញ្ជាក់ឱ្យដឹងថា ចំពោះករណីនេះ ជនដៃដល់ឈ្មោះ គល់ ស្វាយ សមត្ថកិច្ច ជំនាញកំពុងស្រាវជ្រាវតាមរកចាប់ខ្លួន ចំណែកជនសង្ស័យម្នាក់ទៀត សមត្ថកិច្ចបានកសាងសំណុំរឿងបញ្ជូនទៅសាលា ដំបូងដើម្បីចាត់ការតាមនីតិវិធី ៕