ភ្នំពេញ: សាលារាជធានីភ្នំពេញ នឹងចាប់ផ្តើមការដ្ឋានស្ថាបនាសួនច្បារ ចំកណ្តាលទ្រូងផ្លូវជាតិលេខ៦ ចំណុចជ្រោយចង្វារ មានទទឹងប្រវែង ២,៥០ ម៉ែត្រ ដោយមានដាំស្នៅ ផ្កា ដើមជ្រៃ បំពាក់បង្គោលភ្លើងព្រែកជាពីរ ចំកណ្តាលសួនច្បារ លាបគំនូសចរាចរ និងដាក់សញ្ញាចរាចរ។ ការងារនេះនឹងចាប់ផ្តើមអនុវត្ត ចាប់ពីថ្ងៃទី២២ ខែសីហា ឆ្នាំ២០១២ នេះតទៅ។
សេចក្តីជូនដំណឹង របស់សាលារាជធានីភ្នំពេញ ចេញផ្សាយថ្ងៃទី២១ ខែសីហា ឆ្នាំ២០១២ បានលើកឡើងថា សាលារាជធានីភ្នំពេញ មានកិត្តិយសជម្រាបជូនដំណឹង ដល់សាធារណជនទាំងអស់ ឲ្យបានជ្រាបថា កំណាត់ផ្លូវជាតិលេខ៦ ចាប់ពីគល់ស្ពានមិត្តភាពកម្ពុជា-ជប៉ុន ជ្រោយចង្វារ ដល់មុខមជ្ឈមណ្ឌលជាតិប្រយុទ្ធជំងឺអេដស៍ សើស្បែក និងកាមរោគ នៃក្រសួងសុខាភិបាល ដែលមានប្រវែង ៤.០០០ ម៉ែត្រ ទទឹងប្រវែង ២៣,៥០ ម៉ែត្រ ត្រូវបានអ៊ុតកៅស៊ូរួចរាល់ កាលពីខែមេសា ឆ្នាំ២០១២។ ក្នុងរយៈពេលកន្លងទៅនេះ សាលារាជធានីភ្នំពេញសង្កេតឃើញថា បងប្អូនប្រជាពលរដ្ឋខ្លះ បានធ្វើដំណើរឆ្លងកាត់ ដោយប្រើប្រាស់យានយន្តគ្រប់ប្រភេទ ក្នុងល្បឿនលឿនហួសកំណត់ ហើយខ្លះទៀតក៏បើកបរល្មើសហួសខ្សែព្រំដែន ចូលក្នុងតំបន់ដែលត្រូវស្ថាបនាជាសួនច្បារ បែងចែកផ្លូវរត់ទៀតផង។
ចំពោះមុខ សាលារាជធានីភ្នំពេញ នឹងចាប់ផ្តើមការដ្ឋានស្ថាបនាសួនច្បារ ចំកណ្តាលទ្រូងផ្លូវ មានទទឹងប្រវែង ២,៥០ ម៉ែត្រ ដោយមានដាំស្នៅ ផ្កា ដើមជ្រៃ បំពាក់បង្គោលភ្លើងព្រែកជាពីរ ចំកណ្តាលសួនច្បារ លាបគំនូសចរាចរ និងដាក់សញ្ញាចរាចរ។ ការងារនេះនឹងចាប់ផ្តើមអនុវត្ត ចាប់ពីថ្ងៃទី២២ ខែសីហា ឆ្នាំ២០១២ នេះតទៅ។
អាស្រ័យហេតុនេះ សូមសាធារណជនទាំងអស់ជ្រាប និងចូលរួមសហការឲ្យបានល្អ និងសូមមេត្តាមានការប្រុងប្រយ័ត្នលើបញ្ហាសុវត្ថិភាពចរាចរ ចំពោះការបើកបរឆ្លងកាត់ទីតាំងការដ្ឋាន ដោយគោរពឲ្យបានត្រឹមត្រូវតាមច្បាប់ចរាចរផ្លូវគោក នៃព្រះរាជាណាចក្រកម្ពុជា។ ទន្ទឹមនឹងនេះ អាជ្ញាធរមានសមត្ថកិច្ច និងមន្ទីរពាក់ព័ន្ធ ត្រូវអនុវត្តឲ្យបានម៉ឺងម៉ាត់ និងមានប្រសិទ្ធភាពខ្ពស់ ចាប់ពីថ្ងៃចេញសេចក្តីជូនដំណឹងនេះតទៅ៕
