ភ្នំពេញ ៖ ប្រធានគណៈបញ្ជាការឯកភាពខណ្ឌទួលគោកលោក សេង រតនៈ បានដាក់បញ្ជាយ៉ាងម៉ឺងម៉ាត់មួយឲ្យលោកមេប៉ុស្ដិ៍ និងចៅសង្កាត់ទាំង១០ របស់អាណាចក្រខណ្ឌទួលគោក ត្រូវធ្វើឲ្យខ្លួនឲ្យបានស្អាតស្អំ ទោះបីក្រក៏ក្រចុះកុំប៉ះពាល់លុយល្បែងស៊ីសងឲ្យសោះ។ បើមូលដ្ឋានរបស់ខ្លួនមានការលួចលាក់លេងល្បែងស៊ីសងនោះលោកមេប៉ុស្ដិ៍និងលោកចៅសង្កាត់នឹងត្រូវប្រឈមមុខយ៉ាងធ្ងន់ធ្ងរជាមួយគណៈបញ្ជាការឯកភាពខណ្ឌមុនគេ។
លោក សេង រតនៈ បន្តឲ្យដឹងថា ការបើមានល្បែងស៊ីសងនៅក្នុងមូលដ្ឋានរបស់យើង វានាំឲ្យកើតមានឡើងនូវបទល្មើសគ្រប់ប្រភេទ ដូចជាលួចឆក់ប្លន់ជាដើម។ ក្រៅពីនេះល្បែងស៊ីសងបង្កើតឲ្យមានអំពើហិង្សាក្នុងគ្រួសារ ហើយមិនត្រឹមតែបំផ្លិចបំផ្លាញខ្លួនឯងប៉ុណ្ណោះទេ គឺបំផ្លាញដល់ក្រុមគ្រួសារថែមទៀត៕
ស្រីរ័ត្ន