ភ្នំពេញ: យុវជនត្រូវពង្រឹងគុណភាពរបស់ខ្លួន ដោយផ្តោតលើគុណភាពអប់រំ គឺជាកត្តាសំខាន់ ហើយអ្នកសារព័ត៌មានមានតួនាទីបំផុសប្រជាជន សិស្ស និស្សិត ឲ្យយល់ដឹងពីទីផ្សារពលកម្ម ដើម្បីឆ្ពោះទៅកាន់សហគមន៍សេដ្ឋកិច្ចអាស៊ានឆ្នាំ២០១២។ នេះជាប្រសាសន៍របស់លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ថ្លែងក្នុងវេទិកាតុមូល ស្ដីពី ដំណើរឆ្ពោះទៅកាន់សហគមន៍សេដ្ឋកិច្ចអាស៊ាន ឆ្នាំ២០១៥ ឱកាស និងការប្រឈមសម្រាប់កម្ពុជា ដែលរៀបចំឡើងដោយក្លឹបអ្នកកាសែតកម្ពុជា សហការជាមូលនិធិខុនរ៉ាដអាដេណៅអ៊ែរ។
លោក ខៀវ កាញារីទ្ធ បានមានប្រសាសន៍នៅថ្ងៃទី២២ ខែសីហា ឆ្នាំ២០១២ នេះថា គុណភាពនៃការអប់រំគឺសំខាន់ណាស់ ហើយអ្នកសារព័ត៌មានត្រូវបំផុស ឲ្យមានជាប្រជាជនរបស់យើងយល់ពីទីផ្សារពលកម្ម អ៊ីចឹងហើយបានជារាជរដ្ឋាភិបាល បានបង្កើតនាយកដ្ឋានតម្រង់ទិសវិជ្ជាជីវៈ នៃក្រសួងអប់រំ។
លោកបានបន្ថែមថា ដើម្បីឲ្យយើងយល់ពីតំបន់សេដ្ឋកិច្ចអាស៊ាននេះ ជៀសឲ្យផុតពីបញ្ហាជាតិនិយម ចង្អៀតចង្អល់ ជៀសឲ្យផុតពីការយកបញ្ហាការងារនេះ ទៅជាឧបករណ៍នយោបាយ គឺយើងត្រូវយល់ពីលទ្ធភាពរបស់យើងមានប៉ុណ្ណា។ លោកពន្យល់ថា "ជាការពិតយើងចាញ់ប្រៀបគេមួយចំនួន ដោយសារថា សាលាយើងមានច្រើន ប៉ុន្តែគុណភាពមានតិច នេះជាចំណុចធំ អ៊ីចឹងអ្នកណាមានលុយអាចទៅរៀនសាលាល្អ មានសមត្ថភាពខ្ពស់អ៊ីចឹងទៅ"។
លោក ខៀវ កាញារីទ្ធ បានលើកឡើងផងដែរថា ក្នុងនាមជាអ្នកសារព័ត៌មាន ត្រូវពន្យល់ពីបញ្ហាប្រឈមដល់ប្រជាជនយើង ឲ្យពួកគាត់យល់ពីបញ្ហាទីផ្សារសមាសហរណកម្មអាស៊ានខាងមុខ ឲ្យបានយល់ ហើយឲ្យសិស្ស និស្សិតរបស់យើង ត្រៀមប្រឈមមុខសម្រាប់កិច្ចការទាំងអស់នេះ។ ប៉ុន្តែការផ្ដល់ព័ត៌មានរបស់យើងនៅមានតិច ដែលនេះគឺជាកង្វះខាត តែអ្នកសារព័ត៌មានត្រូវតែព្យាយាមពន្យល់ដល់ប្រជាជន យុវជន ព្រោះវាគឺជាការចាំបាច់៕