ភ្នំពេញ: លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានបដិសេធថា លោកស្រី មិនបានធ្វើអត្ថាធិប្បាយណាមួយ ពាក់ព័ន្ធនឹងអំពើហិង្សា ដែលប៉ូលិសបានវាយបង្ក្រាបលើក្រុមស្ត្រីបឹងកក់ ដែលធ្វើឲ្យប៉ះពាល់ដល់ស្ត្រីទាំងនោះទេ។ លោកស្រីរដ្ឋមន្ត្រី បញ្ជាក់ថា លោកស្រីនឹងរង់ចាំនូវលទ្ធផលនៃការអង្កេតលើករណីជម្លោះប៉ះទង្គិចនោះ មុននឹងធ្វើអត្ថាធិប្បាយ។
ក្នុងពេលផ្តល់បទសម្ភាសន៍ដល់ក្រុមអ្នកកាសែត ក្រោយពីជួបអគ្គលេខាធិការរងអង្គការសហប្រជាជាតិ នៅហាងសូត្រ សិនតូហ្សា ក្នុងទីក្រុងភ្នំពេញ នាព្រឹកថ្ងៃទី២២ ខែសីហា ឆ្នាំ២០១២ លោកស្រី អ៊ឹង កន្ថាផាវី បានលើកឡើងថា "ខ្ញុំនិយាយនោះ មុនព្រឹត្តិការណ៍ ថ្ងៃទី២៧ ខែមិថុនា ឆ្នាំ២០១២ ហើយពីរថ្ងៃមុននេះ ( ថ្ងៃទី២០សីហា ឆ្នាំ២០១២ ) គេមកធ្វើបាតុកម្ម នៅមុខក្រសួងរបស់ខ្ញុំ សុំឲ្យខ្ញុំដកពាក្យ។ តែខ្ញុំអត់បាននិយាយអ្វី ទៅលើស្ត្រីទាំងអស់ ( បឹងកក់ ) ដែលគាត់ជួបប្រទះអំពើហិង្សា កាលពីថ្ងៃទី២៧ ខែមិថុនា ឆ្នាំ២០១២។ រីឯវិទ្យុអាស៊ីសេរី បានយកសម្តីរបស់ខ្ញុំ ដែលខ្ញុំបានសម្ភាសន៍ជាមួយគាត់ តាំងពីខែប្រាំ ( ឧសភា ) មកចាក់ គឺនៅមុនព្រឹត្តិការណ៍នោះកើតឡើង។ អាហ្នឹង ដូចដាក់ប្រេង លើភ្លើង។ ភ្លើងកំពុងឆេះ គាត់ដាក់បន្ថែមទៀត"។
ចំពោះករណីតវ៉ារបស់ស្ត្រីបឹងកក់ ហើយមានការបង្ក្រាបដោយហិង្សាលើស្ត្រីទាំងនោះ មិនត្រូវបានលោកស្រីរដ្ឋមន្ត្រី អត្ថាធិប្បាយបែបណាទេ ដោយលោកស្រី អ៊ឹង កន្ថាផាវីអះអាងប្រាប់អ្នកកាសែត នៅថ្ងៃទី២២ ខែសីហា ឆ្នាំ២០១២ ថា លោកស្រីរង់ចាំការស៊ើបអង្កេតសិន ដោយលោកស្រី មិនអាចសន្និដ្ឋានអ្វីបានទេ នៅពេលនេះ។ ការស៊ើបអង្កេតលើករណីហិង្សាលើស្ត្រី និងកុមារ ដែលក្រសួងកិច្ចការនារី ជួបប្រទះនោះ គឺអាចចំណាយពេលពី ៦ ខែ ទៅមួយឆ្នាំដែរ។
កាលពីព្រឹកថ្ងៃទី២៧ ខែមិថុនា ឆ្នាំ២០១២ មានការប៉ះទង្គិចគ្នារវាងក្រុមប្រជាពលរដ្ឋបឹងកក់ និងកម្លាំងបង្ក្រាបបាតុកម្ម ដោយមានការវាយទាត់ធាក់លើក្រុមអ្នកតវ៉ា និងក្មេងៗ ដែលបានស្រែកយំ ទាមទារឲ្យដោះលែងស្ត្រីអ្នកភូមិបឹងកក់ជាប់ឃុំឃាំងចំនួន ១៣នាក់។ ក្នុងព្រឹត្តិការណ៍នោះ នាំឲ្យស្ត្រីម្នាក់ រលូតកូន។
ការតវ៉ានោះ បានធ្វើឡើង ខណៈដែលតុលាការសាលាឧទ្ធរណ៍ បានលើកយកករណីប្រជាពលរដ្ឋបឹងកក់ ១៣ នាក់ មកជំនុំជម្រះ ហើយបានសម្រេចដោះលែងឱ្យមានសេរីភាពវិញហើយ តាមរយៈអំណាច សាលដីកា របស់សាលាឧទ្ធរណ៍ កាលពីថ្ងៃទី២៧ ខែមិថុនា ឆ្នាំ២០១២។
ព្រឹត្តិការណ៍បង្ក្រាបរបស់ប៉ូលិសយ៉ាងហិង្សានោះ ហើយដែលនាំឲ្យកាសែត ស្រង់ប្រសាសន៍របស់លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការី ហើយកាលពីថ្ងៃទី២០សីហា ឆ្នាំ២០១២ ក្រុមស្ត្រីបឹងកក់ ក៏បានលើកគ្នា ទៅកាន់ក្រសួងកិច្ចការនារី ដើម្បីឲ្យលោកស្រី រដ្ឋមន្ត្រីកែតម្រូវអត្ថាធិប្បាយ ដែលស្ត្រីបឹងកក់ ចាត់ទុកថា បានប៉ះពាល់ដល់ពួកគេ។
គួររំលឹកថា ប្រជាពលរដ្ឋបឹងកក់ ១៣នាក់ ត្រូវបានជាប់ឃុំនៅពន្ធនាគារព្រៃស ក្រោមការចោទប្រកាន់ពីបទកាន់កាប់ ដោយខុសច្បាប់ លើអចលនវត្ថុ របស់នីតិបុគ្គល សាធារណៈ និងបទប្រឆាំងនឹងអ្នករាជការសាធារណៈ ដោយតុលាការសាលាដំបូងរាជធានីភ្នំពេញ បានប្រកាសសាលក្រម សម្រេចឱ្យ ៧នាក់ ជាប់ពន្ធនាគារ ២ឆ្នាំ ៦ខែ, ៥នាក់ ជាប់ពន្ធនាគាររយៈពេល ២ ឆ្នាំ ៦ខែ តែអនុវត្តក្នុងពន្ធនាគាររយៈពេល ២ឆ្នាំ និងម្នាក់ទៀតដែលជាស្ត្រីវ័យ ៧២ឆ្នាំ ត្រូវជាប់ពន្ធនាគាររយៈពេល ២ ឆ្នាំ ៦ខែ តែអនុវត្តក្នុងពន្ធនាគារ រយៈពេល ១ឆ្នាំ។ ស្ត្រីទាំងនោះ ត្រូវបានចាប់ឃុំខ្លួន កាលពីថ្ងៃទី២ ខែឧសភា ឆ្នាំ២០១២ ក្នុងជម្លោះដីនៅបឹងកក់៕
