ភ្នំពេញ: មន្ត្រីអាជ្ញាធរដែនដី មន្ត្រីជំនាញបានព្រមានខ្លាំងៗដល់មន្ត្រីអាជ្ញាធរដែនដីមូលដ្ឋានណា ដែលព្រហើន បន្តហ៊ានចុះហត្ថលេខា ឬវាស់វែងដីគម្របព្រៃឈើ ដីតំបន់ការពារបរិស្ថាន លក់-ទិញ ធ្វើអំណោយ ឬផ្ទេរសិទ្ធិកាន់កាប់គ្រប់គ្រងការទន្ទ្រានដីព្រៃឈើ នៃផែនទីគម្របព្រៃឈើឆ្នាំ២០០២ និងដីព្រៃតំបន់ការពារបរិស្ថាន។
ការព្រមាននេះ បានធ្វើឡើង ចំពោះមុខមន្ត្រី និងពលរដ្ឋជាង ៦០០នាក់ នៅក្នុងពិធីប្រកាសតំបន់វិនិច្ឆ័យលើការចុះបញ្ជីដីធ្លី ដើម្បីផ្ដល់ប័ណ្ណកម្មសិទ្ធិបឋម និងប័ណ្ណកម្មសិទ្ធិស្ថាពរដល់ពលរដ្ឋឃុំគោកកឋិន ថ្មពួក និងឃុំភូមិថ្មី ស្រុកថ្មពួក នៅក្នុងវត្តភូមិថ្មីឃុំភូមិថ្មី កាលពីថ្ងៃទី២១ ខែសីហា ឆ្នាំ២០១២។
លោក ទ្រី ណារិន អភិបាលរងខេត្តបន្ទាយមានជ័យ ក្នុងបទបញ្ជា និងការណែនាំដ៏ម៉ឺងម៉ាត់នោះ បានព្រមានថា "ខ្ញុំក្នុងនាមខេត្ត និងជំនាញដាច់ខាត មិនអនុញ្ញាតអោយមេភូមិ មេឃុំ ចៅហ្វាយស្រុក/រងស្រុក ចុះហត្ថលេខា ឬចុះវាស់វែងដីគម្របព្រៃឈើ ដីតំបន់ការពារបរិស្ថាន ដល់ភាគីលក់-ទិញ ផ្ទេរ ឬជូនអំណោយ។ បើព្រហើន នឹងមានទោសទណ្ឌ"។
លោកបន្តថា "ពលរដ្ឋដាំដុះបង្កបង្កើនផល លើដីដែលបានធ្វើចាស់ តែរានហែកព្រៃថ្មី ទៀត នៅក្រោយបទបញ្ជាលេខ ០១ និងអនុសាសន៍សម្ដេចតេជោ ហ៊ុន សែន ខែមិថុនា ឆ្នាំ២០១២ នឹងមានទោស ពុំអាចលើកលែងបាន"។
លោក ទ្រី ណារិន និយាយបន្តថា "បើពលរដ្ឋណា ក្រីក្រ និងគ្មានដីធ្លីសង់លំនៅ ដីបង្កបង្កើនផលពិតប្រាកដ អាជ្ញាធរ និងជំនាញ នឹងរកដីប្រគល់ជូនជាសម្បទានដីសង្គមកិច្ច ដោយត្រូវធ្វើសំណើឡើងតាមភូមិ-ឃុំមក។ មានដីត្រៀមរាប់ពាន់ម៉ឺនហិចតា"។
លោក ប្លែក វ៉ារី អភិបាលស្រុកថ្មពួក និយាយថា "ក្នុងនាមពលរដ្ឋនៅឃុំទាំង៣ យើងខ្ញុំសូមថ្លែងអំណរគុណបំផុត ចំពោះសម្ដេចតេជោ ហ៊ុន សែន និងគោលនយោបាយរបស់រាជរដ្ឋាភិបាល ដែលបានអនុវត្តវាស់វែង និងធ្វើប័ណ្ណដី ជូនពលរដ្ឋ ដែលដីប៉ះពាល់តំបន់ដីគម្របព្រៃឈើ និងដីសម្បទានសង្គមកិច្ចនេះ"។
លោក លី សារី ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដី ខេត្តបន្ទាយមានជ័យ នាយកចាត់ការអនុវិស័យរដ្ឋបាលដីធ្លីខេត្ត និយាយថា ក្រុមការងារចម្រុះ ចុះវាស់វែងដីធ្លី ជូនពលរដ្ឋតាមនយោបាយចាស់សកម្មភាពថ្មី របស់រាជរដ្ឋាភិបាល គោលដៅបន្ទាយមានជ័យ បានធ្វើនៅឃុំបន្ទាយឆ្មារ គំរូ និងគោករមៀត ដែលផ្ដើមពីថ្ងៃទី២៩ កក្កដា ឆ្នាំ២០១២ លើដីពលរដ្ឋ ដែលប៉ះពាល់នឹងដីព្រៃតំបន់ការពារទេសភាពបន្ទាយឆ្មារ ដីសម្បទានសេដ្ឋកិច្ច ដីក្នុងដីកាដកហូតឆ្នាំ២០០៥ ឬដីគម្របព្រៃឈើឆ្នាំ២០០២។
លោក លី សារី និយាយបន្តថា កន្លងមក មន្ទីរបានចុះបញ្ជីអត្តសញ្ញាណកម្មដី និងបិទផ្សាយជាសាធារណៈនូវក្បាលដី សម្រាប់ធ្វើសម្បទានសង្គមកិច្ច ជូនអតីតកងកម្លាំងប្រដាប់អាវុធ និងគ្រួសារ នៅឃុំ ៣ គឺឃុំគោកកឋិន ថ្មពួក និងភូមិថ្មី ដែលមានទំហំ ៦.៧៦២ ហិចតា។
លោកបន្តថា ឥឡូវក្រុមការងារ នឹងអនុវត្តជំហាន និងនីតិវិធី ២ ជំហាន ដើម្បីវាស់វែង និងចុះបញ្ជីដីធ្លីពលរដ្ឋ ដែលប៉ះពាល់នឹងដីគម្របព្រៃឈើ និងសម្បទានដីសង្គមកិច្ច។ ហេតុនេះ ស្ថាប័នពាក់ព័ន្ធ និងប្រជាពលរដ្ឋមេត្តាសហការ និងភាពងាយស្រួលដល់ក្រុមការងារចុះបញ្ជីដីធ្លី និងក្រុមយុវជនស្ម័គ្រចិត្ត ដើម្បីអោយការចុះបញ្ជី។ អាជ្ញាធរស្រុក ឃុំ និងមេភូមិ ចាត់វិធានការទប់ស្កាត់ ឬបញ្ឈប់រាល់ការកាប់រុករានដីព្រៃ ឬបញ្ឈប់ការចេញលិខិតបញ្ជាក់ផ្សេងៗ ដូចជា លិខិតលក់-ទិញ ផ្ទេរឬធ្វើអំណោយ ពាក់ព័ន្ធដីព្រៃ។ អាជ្ញធរ និងពលរដ្ឋ កំណត់អោយច្បាស់លាស់ត្រឹមត្រូវ និងបោះបង្គោលរឹងមាំ នូវព្រំប្រទល់ ក្បាលដី ព្រំប្រទល់រដ្ឋបាល។ល។
សូមបញ្ជាក់ថា ភូមិសាស្ត្រឃុំថ្មពួក ភូមិថ្មី និងឃុំគោកកឋិន ស្រុកថ្មពួក មានចលនារានទន្ទ្រានដីព្រៃឈើសេសសល់ ពីឈ្មួញ មានប្រាក់ យ៉ាងខ្លាំងក្លា រហូតពេលនេះ។ ពលរដ្ឋ គ្មានដីពិតប្រាកដ ពុំទទួលបានលាភ ដូចជនទាំងនោះទេ៕
