កំពង់ឆ្នាំង: ដើម្បីឲ្យប្រជាពលរដ្ឋនៅតាមជនបទ មានទឹកស្អាតប្រើប្រាស់ លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានឧបត្ថម្ភថវិកាសម្រាប់ការសាងសង់អណ្ដូងទឹកស្អាត ចំនួន ៣០ អណ្ដូង ជូនប្រជាពលរដ្ឋនៅក្នុងស្រុកចំនួន ៥ របស់ខេត្ដកំពង់ឆ្នាំង។ ក្នុងនោះស្រុកទឹកផុសចំនួន ៧ អណ្ដូង ស្រករលាប្អៀរ ៩ អណ្ដូង ស្រុកកំពង់ត្រឡាច ៦ អណ្ដូង ស្រុកបរិបូរណ៍ ៥ អណ្ដូង និងស្រុកសាមគ្គីមានជ័យចំនួន ៣ អណ្ដូង។
ក្រោយពីបានធ្វើការសាងសង់រួចរាល់ជាស្ថាពរហើយនោះ កាលពីថ្ងៃទី២១ ខែសីហា ឆ្នាំ២០១២ លោក អ៊ុន សំអុល ប្រធានគណៈកម្មាធិការសាខាកាកបាទក្រហមកម្ពុជាខេត្ដកំពង់ឆ្នាំង រួមនិងមន្ដ្រីមួយចំនួនទៀត បានចុះប្រគល់អណ្ដូងទឹកស្អាតចំនួន ៣ អណ្ដូង នៅក្នុងភូមិអូលាជ ភូមិត្រពាំងផ្គាំ និងភូមិឫស្សីឌួច ក្នុងឃុំបន្ទាយព្រាល ស្រុករលាប្អៀរ ជានិមិត្ដរូបដល់អណ្ដូងទាំង ៣០ សម្រាប់ឲ្យប្រជាពលរដ្ឋប្រើប្រាស់ជាផ្លូវការ។
ក្នុងឱកាសជួបសំណេះសំណាលជាមួយប្រជាពលរដ្ឋ នៅក្នុងភូមិទាំងបីនោះ លោក អ៊ុន សំអុល បាននាំនូវប្រសាសន៍ផ្ដាំផ្ញើសាកសួរសុខទុក្ខ និងសេចក្ដីនឹងរលឹក ពីសំណាក់លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជានិច្ចកាលតែងតែបានយកចិត្ដទុកដាក់ និងគិតគូរជានិច្ច ចំពោះជីវភាពរស់នៅ និងសុខុមាលភាពរបស់ប្រជាពលរដ្ឋ នៅគ្រប់ទីកន្លែងទូទាំងប្រទេស។
លោក អ៊ុន សំអុល បានមានប្រសាសន៍ផ្ដាំផ្ញើផងដែរ ដល់ប្រជាពលរដ្ឋនៅទីនោះ “ឲ្យបង្កើនការយកចិត្ដទុកដាក់ ក្នុងការដាំដំណាំរួមផ្សំ បន្លែបង្ការផ្សេងៗ និងចិញ្ចឹមសត្វឲ្យបានច្រើន ដើម្បីបង្កើនប្រាក់ចំណូលក្នុងគ្រួសារ ផ្គត់ផ្គង់ជីវភាពឲ្យកាន់តែប្រសើរឡើង។ ចំពោះការរស់នៅ ត្រូវមានអនាម័យល្អ គឺហូបស្អាត ផឹកស្អាត និងរស់នៅស្អាតជានិច្ច និងត្រូវប្រុងប្រយ័ត្នចំពោះជំងឺប្រភេទថ្មី គឺ EV-71 ដែលកំពុងប្រឈមលើកុមារអាយុក្រោម ៥ឆ្នាំ៕
