បន្ទាប់ពីចប់ជំនួបនោះ លោក អ៊ាង សុផល្លែត ជំនួយការផ្ទាល់សម្តេចតេជោ ហ៊ុន សែន បានមានប្រសាសន៍ប្រាប់ក្រុមអ្នករាយការណ៍ព័ត៌មានថា នៅក្នុងជំនួបនោះ លោកស្រី Noe Leen HeyZer បានជម្រាបជូនសម្តេចតេជោ ហ៊ុន សែន ថា លោកស្រី មានការរំភើបយ៉ាងខ្លាំងនៅពេលដែលឃើញការអភិវឌ្ឍប្រទេសកម្ពុជា យ៉ាងខ្លាំង ពីព្រោះលោកស្រី ធ្លាប់បានមកជួបសម្ដេចតេជោ ម្ដង កាលពីឆ្នាំ២០០៥កន្លងទៅ តែនៅពេលនេះ កម្ពុជា មានការផ្លាស់ប្ដូរយ៉ាងខ្លាំង។
លោកស្រី ក៏បានសម្ដែងនូវការអបអរសាទរ ជូនចំពោះសម្ដេចតេជោ នាយករដ្ឋមន្ត្រីហ៊ុន សែន ដែលដឹកនាំកម្ពុជា មកកាន់ការអភិវឌ្ឍ ទោះបីជាជួបប្រទះនូវវិបត្តិសេដ្ឋកិច្ចពិភពលោក យ៉ាងណាក៏ដោយ កម្ពុជានៅតែទទួលកំណើនសេដ្ឋកិច្ច ហើយមានការអភិវឌ្ឍប្រកបដោយចីរភាពក្នុងរយៈពេលខ្លីតែប៉ុណ្ណោះ។
លោកស្រី Noe Leen HeyZer ក៏បានវាយតម្លៃខ្ពស់ចំពោះការដឹកនាំរបស់សម្ដេចតេជោនាយករដ្ឋមន្ត្រី ហ៊ុន សែន ធ្វើជាប្រធានអាស៊ាន ក៏ដូចជាការជំរុញគាំទ្រលើវិស័យសមភាពយេនឌ័រ នៅកម្ពុជា ការយកចិត្តទុកដាក់លើវិស័យអប់រំ វិស័យសុខមាលភាព និងការកាត់បន្ថយគម្លាតនៃភាពក្រីក្រ ដែលទាំងនេះ សុទ្ធសឹងជាកត្តាសំខាន់ដើម្បីជំរុញការអភិវឌ្ឍនៅក្នុងប្រទេសកម្ពុជា។
ជាការឆ្លើយ សម្ដេចតេជោនាយករដ្ឋមន្ត្រី បានជម្រាបជូនលោកស្រី Noe Leen HeyZer អំពីដំណើរអភិវឌ្ឍន៍កម្ពុជា ចាប់ផ្ដើមអំពីវិបត្តិសេដ្ឋកិច្ចឆ្នាំ២០០៨។ សម្ដេចបានជម្រាបលោកស្រីបន្តថា ទីណាវិបត្តិ ទីនោះតែងតែបង្កប់នូវកាលានុវត្តភាព ហើយវិបត្តិសេដ្ឋកិច្ចឆ្នាំ២០០៨ ពុំមានផលប៉ះពាល់អ្វីខ្លាំង ដល់កម្ពុជាឡើយ នៅពេលនោះ កម្ពុជានៅតែមានកំណើនសេដ្ឋកិច្ច ទោះបីជាទាបក៏ដោយ។
សម្ដេចតេជោ បានបន្តទៀតថា អ្វីដែលរាជរដ្ឋាភិបាលកម្ពុជាធ្វើនាពេលនោះ គឺយកបទពិសោធន៍វិបត្តិសេដ្ឋកិច្ចអាស៊ាន កាលពីឆ្នាំ១៩៩៧ ដោយយកមកអនុវត្តនៅលើ៖ ទី១. រក្សាសេ្ថរភាពនយោបាយនៅកម្ពុជា, ទី២. រក្សាម៉ាក្រូសេដ្ឋកិច្ច ដោយចាត់វិធានការបម្រុងទុកជាមុនជាមួយនឹងធនាគារ ហើយនៅពេលជាមួយគ្នានោះដែរ ផ្ដល់នូវការបណ្ដុះបណ្ដាលដល់កម្មករ ដែលពុំមានការងារធ្វើ ដើម្បីឲ្យមានមុខរបរថ្មី។
ពាក់ព័ន្ធនឹងការអភិវឌ្ឍប្រកបដោយចីរភាពនេះដែរ សម្ដេចតេជោនាយករដ្ឋមន្ត្រី បានជម្រាបជូនលោកស្រី Noe Leen HeyZer នូវកំណែទម្រង់ដែលមានចារិកជាប្រវត្តិសាស្ដ្រ នោះគឺកំណែទម្រង់លុបចោលឡូត៍នេសាទទាំងស្រុង និងកំណែទម្រង់ដីធ្លី ដែលមានយុវជនស្ម័គ្រចិត្តរាប់ពាន់នាក់កំពុងធ្វើការ ចុះវាស់ដីចែកជូនប្រជាជន។
ពាក់ព័ន្ធទៅនឹងវិស័យអប់រំ និងការបន្ថយគម្លាតរវាងអ្នកមាន និងអ្នកក្រ ជនបទ និងទីក្រុងនោះ សម្ដេចតេជោហ៊ុន សែន បានមានប្រសាសន៍ថា សេចក្ដីការណ៍សន្ទុករបស់សម្ដេចបានទទួលជោគជ័យទាំងស្រុង នោះគឺសេចក្ដីថ្លែងការណ៍ឆ្នាំ២០០២ ដែលសព្វថ្ងៃនេះ សាលាដើររកសិស្ស មិនមែនសិស្សដើររកសាលាដូចមុនទៀតទេ ហើយពាក់ព័ន្ធនឹងបញ្ហានេះដែរ សម្ដេចបានមានប្រសាសន៍ថា អ្វីដែលជាបញ្ហាប្រឈមនោះ គឺគុណភាព នៃការអប់រំ។ ការកាត់បន្ថយគម្លាតក្រីក្រ សម្ដេចបានមានប្រសាសន៍ថា រាជរដ្ឋាភិបាលកំពុងអនុវត្តបញ្ហានេះ សម្ដេចតែងតែចុះទៅធ្វើ ការជំរុញ ការអភិវឌ្ឍហេដ្ឋារចនាសម្ព័ន្ធ ប្រឡាយទឹក៘ ដើម្បីធ្វើយ៉ាងណាឲ្យទីជនបទមានការអភិវឌ្ឍកាន់តែខ្លាំងឡើង៕