កំពង់ចាម: អាជ្ញាធរ និងសមត្ថកិច្ចស្រុកស្រីសន្ធរ បានរកឃើញដីព្រៃលិចទឹកប្រមាណ ៨០ ហិកតា នៅក្នុងភូមិសាស្ត្រឃុំបារាយណ៍ និងឃុំផ្ទះកណ្តាល ស្រុកស្រីសន្ធរ បាននិងកំពុងរងការកាប់ទន្ទ្រានពីជនខិលខូចវាស់លក់ឲ្យឈ្មួញ ធ្វើការឈូសឆាយកាន់កាប់ ជាកម្មសិទ្ធិ។
លោក លឹម លន់ មេឃុំបារាយណ៍ បានឲ្យ CEN ដឹងតាមទូរស័ព្ទថា កាលពីថ្ងៃទី១៨ ខែសីហា ឆ្នាំ២០១២ នៅពេលលោកបានត្រឡប់ពីប្រជុំនៅឯខេត្តកំពង់ចាម ខាងភូមិស្យាអម្ពិល និងខាងសហគមន៍ បានរាយការណ៍ថា មានអ្នកចូលទៅកាប់ទន្ទ្រាន និងឈូសឆាយដីព្រៃក្នុងផ្ទះទឹកទំនប់នួនស។ ខណៈនោះ លោកបានរាយការណ៍បន្តជូនទៅលោកអភិបាលស្រុកស្រីសន្ធរ ដើម្បីសុំអន្តរាគមន៍ចាត់វិធានការទប់ស្កាត់។
លោកវរសេនីយ៍ត្រី ស្រី ភិរម្យ មេបញ្ជាការមូលដ្ឋានកងរាជអាវុធហត្ថ ស្រុកស្រីសន្ធរ បានឲ្យដឹងថា ក្រោយពីបានទទួលបញ្ជាឲ្យទប់ស្កាត់ និង ព័ត៌មានពីលោកអភិបាលស្រុកស្រីសន្ធរ កាលពីថ្ងៃទី១៨ ខែសីហា ថា មានសកម្មភាពឈូសឆាយព្រៃលិចទឹក ដោយគ្រឿងចក្រជាត្រាក់ទ័រច្រើនគ្រឿងនៅទំនប់ផ្ទះទឹកនួនស ស្ថិតក្នុងភូមិស្យាអម្ពិល ឃុំបារាយណ៍ និងតំបន់បឹងចាំដោះ បឹងលិច ទួលចេតិយ បឹងក្រពើ បឹងកក់ និងបឹងឫស្សី ស្ថិតក្នុងឃុំផ្ទះកណ្តាល គឺយើងបានសហការជាមួយសមត្ថកិច្ចប៉ូលិស និងអាជ្ញាធរ ទៅកាន់តំបន់ខាងលើ។
លោកមេបញ្ជាការបានឲ្យដឹងទៀតថា ទំនងជាបែកការណ៍ គឺនៅពេលសមត្ថកិច្ចចុះ មិនទាន់ដល់កន្លែងឈូសឆាយព្រៃលិចទឹកផង ក៏បានប្រទះត្រាក់ទ័រចំនួនពីរគ្រឿងបានបើកចេញពីទំនប់នួនស សំដៅចូលភូមិ។ យើងបានសម្រេចឃាត់គ្រឿងចក្រនោះ ប៉ុន្តែបានលេចបុរសអះអាងជាម្ចាស់ដីដែលជាអ្នកជួលគ្រឿងចក្រនោះឈ្មោះ ហួ ពៅ អាយុ ៥០ ឆ្នាំ នៅភូមិព្រែកដំបូកលើ ឃុំព្រែកដំបូក ស្រុកស្រីសន្ធរបានឆ្លើយសារភាពថា ខ្លួនពិតជាអ្នកជួលត្រាក់ទ័រឲ្យទៅឈូសឆាយនៅតំបន់ទំនប់នួនស លើផ្ទៃដីប្រហែលប្រាំហិកតាមែន។ ចំណែកឯប្រហែល ៣០ ហិកតាទៀត បានឈូសឆាយហើយនោះមិនមែនជារបស់ខ្លួនទេ។
លោក ស្រី ភិរម្យ បានឲ្យដឹងបន្ថែមថា នៅថ្ងៃទី១៨ ខែសីហា ឆ្នាំ២០១២ យើងបានទៅកាន់តំបន់បឹងជាច្រើន ដូចបានបញ្ជាក់ខាងលើ នៅក្នុងឃុំផ្ទះកណ្តាល ក៏ប្រទះឃើញត្រាក់ទ័រចំនួនពីរគ្រឿងទៀត កំពុងបើកចេញពីធ្វើសកម្មភាពឈូសឆាយព្រៃលិចទឹកទាំងនោះ។ ប៉ុន្តែអត់មានម្ចាស់ដីចេញមុខមកជួបទេ គឺមានតែបុរសជាម្ចាស់ត្រាក់ទ័រជាអ្នកស៊ីឈ្នួលឈូសឆាយ ឈ្មោះ ចង លីមសុង អាយុ៥១ ឆ្នាំមានទីលំនៅភូមិផ្ទះកណ្តាលក្រោម ឃុំផ្ទះកណ្តាល ស្រុកស្រីសន្ធរ ខេត្តកំពង់ចាម គឺខ្លួនបានចេញពីឈូសដីព្រៃលិចទឹកនៅតំបន់បឹងចាំដោះ និង បឹងលិច និងទួលចេតិយឈូសដីឲ្យគេបានប្រហែលប្រាំហិកតា។ ប៉ុន្តែប្រហែលជាង ៥០ ហិកតាទៀតនៅជាប់តំបន់នោះដែរខ្លួនមិនស្គាល់ម្ចាស់ទេ ប្រហែលជានៅទីក្រុង ភ្នំពេញ។
លោកមេបញ្ជាការ ស្រី ភិរម្យ បានបន្តថា ក្រុមការងារជាអាជ្ញាធរ និងសមត្ថកិច្ចបានសម្រេចឲ្យឈ្មោះ ហួ ពៅ ធ្វើកិច្ចសន្យា និងអប់រំឲ្យឈប់បន្តការកាប់រាន និងឈូសឆាយដីព្រៃលិចទឹកបន្តទៀតហើយ។ ចំណែកម្ចាស់ត្រាក់ទ័រ ក៏ធ្វើកិច្ចសន្យាដែរ ឲ្យបញ្ឈប់ការស៊ីឈ្នួលឆាយដីព្រៃលិចទឹកឲ្យគេបន្ត ព្រោះដីព្រៃទាំងអស់ជារបស់រដ្ឋ គឺមានទោសនៅក្នុងច្បាប់ស្តីពីជលផល ហើយបើដីព្រៃនោះមិនស្ថិតក្នុងដែននេសាទទេ ក៏មានទោសដូចគ្នា គឺចូលទៅកាន់កាប់ដីដោយគ្មានការអនុញ្ញាត។
លោកមេឃុំ លឹម លន់ នៅបានឲ្យដឹងថា ទំនប់នួនស ជាអាងស្តុកទឹកមួយមានទំហំបួនពាន់ម៉ែត្រត្រីគុណ សម្រាប់ស្រោចស្រពលើផ្ទៃដីស្រែប្រាំងចំនួនជិត ៣០០ ហិកតា។ ទំនប់នេះស្ថិតក្រោមការគ្រប់គ្រងរបស់សហគមន៍ និងភូមិ ដែលទទួលផលប្រយោជន៍។ ដោយហេតុថា កន្លងមកឃុំបានធ្វើប្រតិភូកម្មទៅគ្រប់ភូមិដែលមានផ្ទៃដីពីមុនជាអាករឃុំ ដើម្បីឲ្យជួយការពារដីសាធារណៈរបស់រដ្ឋ។
លោក លឹម លន់ បានបន្តថា ជាលទ្ធផលយើងបានរកឃើញអ្នកចូលទៅកាប់ឈូស ឆាយដីលិចទឹក មិនមែនជាដែននេសាទនៅតំបន់ទំនប់នួនស ប្រហែល ប្រាំហិកតា និងនៅតំបន់ស្យាបឹងវែង ចំនួនប្រហែលប្រាំហិកតាទៀត។ ឥឡូវបានកោះហៅអ្នកចូលទៅចាប់យកដី និងអ្នកមានគ្រឿងចក្រស៊ីឈ្នួលឈូសឆាយមកធ្វើកិច្ចសន្យាឲ្យបញ្ឈប់សកម្មភាពជាបន្ទាន់ ហើយការចូលទៅកាន់កាប់បែបនេះ គឺខុសច្បាប់ ធ្វើឲ្យបាត់ជម្រកត្រី ទឹកឆាប់រីងពីក្នុងទំនប់ និងឈានទៅអត់ទឹកស្រោចស្រពស្រូវប្រាំងទាំងស្រុង ពិសេសនឹងបាត់បង់ដីរបស់រដ្ឋតែម្តង។
គួររំលឹកថា កាលពីសប្តាហ៍កន្លងទៅ សមត្ថកិច្ចជលផលបានសហការជាមួយអាជ្ញាធរ ស្រុកស្រីសន្ធរ បានចុះទៅស៊ើបអង្កេតរកឃើញផ្ទៃដីលិចទឹកប្រមាណ ៦០ ហិកតា នៅតំបន់ត្បូងដំរី ព្រែកយួន និង តំបន់តម្រុយ តាមបណ្តោយមាត់ទន្លេតូច ក្នុងភូមិសាស្ត្រឃុំប្រាំយ៉ាម ស្រុកស្រីសន្ធរ៕