ភ្នំពេញ: អង្គការសង្គមស៊ីវិលចំនួន ៤ រួមមាន៖ អង្គការខុមហ្វ្រែល អង្គការនីកហ្វិច អង្គការប្រជាធិបតេយ្យ និងសិទ្ធិមនុស្ស ក្នុងប្រតិបត្តិការ និងអង្គការសម្ព័ន្ធដើម្បីសុចរិតភាព និងគណនេយ្យភាពសង្គម បានផ្តើមយុទ្ធនាការ ស្វែងរកការគាំទ្រឲ្យមានច្បាប់ ស្តីពី ហិរញ្ញវត្ថុនយោបាយ សម្រាប់គណបក្សប្រើប្រាស់នៅពេលបោះឆ្នោត។ ការគាំទ្ររបស់មហាជនលើច្បាប់នេះ ធ្វើឡើងតាម ហ្វេសបុក Facebook អ៊ីម៉ែល និងទូរស័ព្ទដោយផ្ទាល់ ទៅកាន់អង្គការទាំង៤នោះ។
អង្គការសង្គមស៊ីវិលទាំង ៤ បានរួមគ្នាចេញសេចក្តីអំពាវនាវឲ្យមានការបង្កើតច្បាប់ ស្តីពីហិរញ្ញវត្ថុនយោបាយ។ ក្នុងសេចក្តីអំពាវនាវ បានលើកឡើងថា មាត្រា ៧ នៃអនុសញ្ញាអង្គការសហប្រជាជាតិ ស្តីពីការប្រឆាំងអំពើពុករលួយ ដែលក្នុងនោះ កម្ពុជាជារដ្ឋភាគី តម្រូវឲ្យរដ្ឋជាភាគីនីមួយៗ ពិចារណា ចាត់វិធានការសមស្របនានា ដើម្បីលើកកម្ពស់តម្លាភាពនៅក្នុងការផ្តល់ថវិកាដល់បេក្ខជន ដែលឈរឈ្មោះសម្រាប់តំណែងសាធារណៈ និងនៅក្នុងការផ្តល់ថវិកាដល់គណបក្សនយោបាយ ប្រសិនបើអាចធ្វើទៅបាន។
សេចក្តីអំពាវនាវដដែល ក៏បានលើកឡើងថា យោងទៅលើភាពចាំបាច់ និងបន្ទាន់នៃច្បាប់ ស្តីពីហិរញ្ញវត្ថុនយោបាយ ក្នុងការធានាឲ្យមានសមភាព យុត្តិធម៌ តម្លាភាព និងសុចរិតភាព នៅក្នុងការប្រកួតប្រជែងរបស់គណបក្សនយោបាយក្នុងពេលបោះឆ្នោត និងដើម្បីទប់ស្កាត់អំពើពុករលួយ នៅក្នុងវិស័យនយោបាយ ដែលនាំឲ្យជះឥទ្ធិពលអវិជ្ជមានដល់លទ្ធផលនៃការបោះឆ្នោត និងដោយហេតុថា ព្រះរាជាណាចក្រកម្ពុជា នៅមិនទាន់មានច្បាប់នេះសម្រាប់អនុវត្តន៍នៅឡើយ។
សេចក្តីអំពាវនាវដដែល ក៏បានបង្ហាញថា យោងទៅលើអនុសាសន៍ប្រមូលបានពីប្រជាពលរដ្ឋ គណបក្សនយោបាយ និងភាគីពាក់ព័ន្ធដទៃទៀត តាមរយៈការប្រជុំ សិក្ខាសាលា និងវេទិកាសាធារណៈ ដែលបានធ្វើឡើងជាបន្តបន្ទាប់ជាមួយភាគីពាក់ព័ន្ធទាំងនោះ ចាប់ពីឆ្នាំ២០១០មក ដែលភាគីពាក់ព័ន្ធទាំងនោះ ជាពិសេសគណបក្សនយោបាយភាគច្រើន ដែលមានអាសនៈនៅក្នុងរដ្ឋសភា បានបង្ហាញពីឆន្ទៈចង់ឲ្យមានច្បាប់ស្តីពីហិរញ្ញវត្ថុនយោបាយ ដើម្បីចូលរួមចំណែកលើកកម្ពស់ការបោះឆ្នោតដោយសេរី ត្រឹមត្រូវ និងយុត្តិធម៌ ពិតប្រាកដ នៅក្នុងប្រទេសកម្ពុជា។
ក្នុងលិខិតរួមគ្នានោះ បានគូសបញ្ជាក់ថា "យើងខ្ញុំ ដែលជាក្រុមការងារអង្គការមិនមែនរដ្ឋាភិបាល ស្តីពីហិរញ្ញវត្ថុនយោបាយ សូមអំពាវនាវដល់រដ្ឋាភិបាល និងស្ថាប័ននីតិបញ្ញត្តិ មានរដ្ឋសភា និងព្រឹទ្ធសភា ជាដើម សូមរៀបចំឲ្យមានច្បាប់ស្តីពីហិរញ្ញវត្ថុ ឃោសនានយោបាយ ឲ្យបានឆាប់ តាមដែលអាចធ្វើទៅបាន ដើម្បីធានាសមភាព យុត្តិធម៌ តម្លាភាព និងសុចរិតភាព នៅក្នុងការប្រកួតប្រជែងក្នុងការបោះឆ្នោត"។
ក្នុងលិខិតដដែល ក៏បានលើកឡើងថា "ប្រសិនបើលោកអ្នកចង់ចូលរួមគាំទ្រ ឲ្យមានច្បាប់នេះ នៅក្នុងប្រទេសកម្ពុជា សូមចូលទៅកាន់ Facebook.com/political Finance Project in Cambodia រួចចុចពាក្យថា "Like" ឬផ្ញើសារអេឡិចត្រូនិច ( Email ) ទៅកាន់ pfwgcambodia@gmail.com ឬទូរស័ព្ទទៅកាន់៖ អង្គការខុមហ្វ្រែល ( 023 884 150 ) អង្គការនិកហ្វិច ( 023 6395 055 ) អង្គការប្រជាធិបតេយ្យ និងសិទ្ធិមនុស្ស ក្នុងប្រតិបត្តិការ ( 078 322 942 ) ឬអង្គការសម្ព័ន្ធដើម្បីសុចរិតភាព និងគណនេយ្យភាពសង្គម ( 023 6957 204 ) ដើម្បីបង្ហាញពីការគាំទ្ររបស់លោកអ្នក"។
សូមបន្ថែមថា នៅក្នុងច្បាប់ ស្តីពីគណបក្សនយោបាយ ដែលត្រូវបានអនុម័តដាក់ឲ្យប្រើប្រាស់ កាលពីឆ្នាំ១៩៩៧ ត្រង់ជំពូកទី៦ និយាយពីហិរញ្ញវត្ថុរបស់គណបក្សនយោបាយ នៅមាត្រា ២៨ បានកំណត់ថា "រដ្ឋអាចផ្តល់ប្រាក់ពីថវិកាជាតិស្មើៗគ្នា ដល់គ្រប់គណបក្សនយោបាយ សម្រាប់តែប្រើប្រាស់ក្នុងយុទ្ធនាការឃោសនាបោះឆ្នោតជ្រើសតាំងតំណាងរាស្ត្រ។ គណបក្សនយោបាយណាដែលមិនបានទទួលសន្លឹកឆ្នោតគាំទ្រចំនួន ៣% នៃសន្លឹកឆ្នោតបានការសរុបទូទាំងប្រទេស ឬមិនបានទទួលអាសនៈមួយក្នុងសភា គណបក្សនយោបាយនោះត្រូវសងប្រាក់នោះ គ្រប់ចំនួនមករដ្ឋវិញ ក្នុងរយៈពេល ៣ ខែយ៉ាងយូរ ចាប់ពីថ្ងៃប្រកាសលទ្ធផលជាស្ថាពរនៃការបោះឆ្នោត"។
យ៉ាងណាក៏ដោយ ការផ្តួចផ្តើមបង្កើតច្បាប់ហិរញ្ញវត្ថុសម្រាប់គណបក្សនយោបាយ ត្រូវបានធ្វើឡើងជាញឹកញាប់រួចមកហើយ តែមកដល់ពេលនេះ មិនទាន់ចេញជារូបរាងនៅឡើយទេ៕